1JOHAN 4 - Laibaibal Thiang (BSI)

¹ Dawtmi hna thlarau kip in va zum hlah u, asinain thlarau kha Pathian sin in an si le si lo kha hniksak hna u, zeicatiah vawlei ah hin profet deu tampi an chuah cang.

² Hitihin Pathian Thlarau cu nan hngalh lai.Thlarau zei pauh Jesuh Krih cu thisa ah â cang tiah a ṭanhtu cu Pathian sin in a si,

³ thlarau zei pauh Jesuh Krih cu thisa in a ra tiah a ṭanh lotu cu Pathian sin in an si lo. Cucu Krih ralchanhtu thlarau a ra lai tiah nan hngalhmi cu a si, atu zongah vawlei ah an um cang.

⁴ Nau le hna, Pathian ta nan si i cuhna cu nan tei cang, zeicatiah nanmah i a ummi cu vawlei i a ummi nâk in a ngan deuh.

⁵ Annih cu vawlei ta an si. Cucaah vawlei ta bangin bia an chim, vawlei nih an bia an ngaih hna.

⁶ Kannih cu Pathian ta kan si. Pathian a hngalmi nih kan bia an ngaih tawn, Pathian ta a si lomi nih cun kan bia an ngai duh lo. Hitihin biatak thlarau le palhnâk thlarau cu kan hngalh khawh.

⁷ Dawtmi hna pakhat le pakhat i daw u sih, zeitintiah dawtnâk hi Pathian ta a si. Dawtnâk a ngeimi pauh Pathian hrin a si i Pathian zong a hngalh.

⁸ Dawtnâk a ngei lomi nih Pathian a hngal lo, zeitintiah Pathian cu dawtnâk a si.

⁹ Hitihin Pathian dawtnâk cu kan cungah langhter a si, Amah thawngin nun kan ngeih khawh nâkhnga, Pathian nih a Fapa ngeihchun cu vawlei ah a run thlah.

¹⁰ Dawtnâk cu hihi a si, Pathian kan dawt hi si loin, Amah nih a kan dawt i kan sualnâk hna ngaihthiamnâk ah a Fapa a run thlahmi hi a si.

¹¹ Dawtmi hna, Pathian nih hi tluk in a kan dawt ahcun, kan nih zong pakhat le pakhat kan i dawt awk a si.

¹² Ahohmanh nih zeitik hmanh ah Pathian an hmu ballo. Pakhat le pakhat kan i dawt ahcun, Pathian kan sinah a hmun, a dawtnâk zong kanmah ah tlam a tling.

¹³ Hitihin Amah ah kan hmun i Amah zong kanmah ah a hmun tiah kan hngalh, zeicatiah a Thlarau a kan pêk cang caah.

¹⁴ Pa nih Fapa cu vawlei khamhtu bangin a thlah tiah kan hmuh i kan hngalhter fawn.

¹⁵ Aho pauh Jesuh hi Pathian Fapa a si tiah a ṭanhtu cu, a sinah Pathian a hmun i anih zong Pathian ah a hmun.

¹⁶ Pathian nih kan ca i a ngeihmi dawtnâk cu kan hngalh i kan zumh. Pathian cu dawtnâk a si, cun dawtnâk i a hmunmi cu Pathian ah a hmun i Pathian zong a sinah a hmun.

¹⁷ Dawtnâk cu kan sinah hitihin tlinter a si: biaceih ni ah ṭihlo tein kan um khawhnâk ah hin, zeicatiah vawlei ah hin Amah bangin kan um.

¹⁸ Dawtnâk ah ṭihnâk a um lo, asinain a tlingmi dawtnâk nih ṭihnâk kha a ṭhawl, zeicatiah ṭihnâk nih dântatnâk a chuahter. Cucaah a ṭihtu pauh cu dawtnâk ah tlin termi a si rih lo tinâk a si.

¹⁹ Akan dawt hmasat caah kan dawt ve.

²⁰ Minih, ‘Pathian ka dawt a ti i a unau a huat ahcun lihchim a si; zeitintiah a hmuhmi unau hmanh a dawt lo ahcun, a hmuh lomi Pathian cu zeitindah a dawt khawh lai?

²¹ Amah sinin hi nawlpêk hi kan ngei, Pathian a dawmi nih cun a unau zong a dawt hrimhrim lai, ti hi.