1JOHAN 3 - Laibaibal Thiang (BSI)

¹ Ngaihmanh u Pa nih a kan dawt ning hi zeitlukindah a ngan! Pathian fale tiah kawh kan si! Cucaah vawlei nih ankan hngalh lo, zeicatiah Amah kha an hngal lo.

² Ka dawt le hna atu ah Pathian fa le kan si i zeidah kan si telai ti tu cu langhter a si rih lo, asinain Amah a langh tikah, Amah bang kan si lai ti kha kan hngalh, zeitintiah Amah cu a sining tein kan hmuh lai.

³ Amah cungah cubantuk ruahchannâk a ngeimi pauh nih, Amah a thian bangin â thianter tawn.

⁴ Sualnâk tuahtu pauh nih nawlbia zong a buar, zeitintiah sual cu nawlbuar a si.

⁵ Amah cu kan sualnâk latu dingah langhter a si cang ti kha nan hngalh, Amah ah sual a um lo.

⁶ Amah ah a hmunmi pauh cu sualnâk an tuah lo. Sualnâk a tuahtu pauh nih Amah a hmu lo, hngalh zong a hngal fawn lo.

⁷ Nau le hna, ahohmanh i hlenter hna hlah u. Amah a din bantukin dinnâk a tuahtu cu a ding.

⁸ Sualnâk tuahtu cu khuachia ta a si, zeitintiah a hramthawk in khuachia nih sualnâk a rak tuah cang. Pathian Fapa a langhchan cu khuachia rianṭuannâk a hrawh nâkhnga caah a si.

⁹ Pathian hrin a simi pauh nih, a chungah Pathian ci a hmunh caah sualnâk an tuah peng lo, Pathian hrin a si caah sualnâk a tuah peng kho lo.

¹⁰ Hitihin Pathian fa le khuachia fa cu langhter a si. Dinnâk a tuah lomi pauh cu Pathian ta an si lo, a unau a daw lotu zong Pathian ta an si lo.

¹¹ Pakhat le pakhat kan i dawt awk a si, tihi a hramthawk in biacah nan theihmi kha a si.

¹² Kain, misuaksual pa ta a simi, mah unau a thattu bangin nan um awk a si lo. Zeicadah a thah? A tuahmi kha a ṭhalo i a naupa tuahmi kha a din caah a si.

¹³ Ka nau le hna, vawlei nih an in huat hna ahcun mak ti hlah u.

¹⁴ Kan unau kan dawt hna ruangah, thihnâk in kan chuak i nunnâk ah kan lut cang ti kha kan hngalh. A unau a daw lotu cu thihnâk ah a hmun ko rih.

¹⁵ A unau a huami pauh cu lainawng a si, lainawngmi cu zungzal nunnâk an chungah a hmun lo ti kha nan hngalh.

¹⁶ Dawtnâk cu hitihin kan hngalh, kan ca i a nunnâk a pêkmi ah hin. Cun kan nih zong nih kan unau caah kan nunnâk kan pêk ve awk a si.

¹⁷ Asinain mi zei pauh nih vawlei thilṭha ngeiin, a unau chambau in hmu sehlaw, a zângfah lo ahcun, zeitindah a chungah Pathian dawtnâk a hmunmi a si khawh lai?

¹⁸ Ka nau le hna, lei le bia lawngin i daw loin tuahnâk le biatak in i daw u sih.

¹⁹ Hitihin biatak ta kan si kha kan hngalh, a hmaiah lungdai te i kan um khawhnâk ah hin.

²⁰ Zeitintiah kan lung nih thiamlo a kan coh ahcun, Pathian cu kan lungthin nâk in a ngan deuh i zeizong vialte hngaltu a si.

²¹ Dawtmi hna kan lungthin nih sual akan phawt lo ahcun, Pathian hmai ah kan ral a ṭha.

²² Cun kan halmi kip kha a sinin kan hmuh, zeicatiah a nawlpêkmi kan zulh i a mit hmuh ah a lawmhnâk thil kha kan tuah caah a si.

²³ A nawlpêkmi cu hihi a si, a Fapa Jesuh Krih min zumh i nawl a kan pêk bangin pakhat le pakhat kan i dawtmi hi.

²⁴ A nawlpêk a zultu cu Amah ah a hmun i Amah zong a chungah a hmun ve. Amah kan sinah a hmun tiah kan hngalh khawhnâk cu Thlarau a kan pêkmi ah hin a si.