1JOHAN 1 - Laibaibal Thiang (BSI)

¹ A hramthawk in a rak ummi nunnâk Bia kong kha, kan hna nih a theih i kan mit nih a hmuh, a zoh zong kan zoh i kan kut hrimhrim nih a tongh-

² cu nunnâk cu langhter a si, kan rak hmuh i kan hngalhpi, cu zungzal nunnâk Pa sinah a um i kan sinah phuan a simi cu nan sin zongah kan phuan,

³ cu kan hmuh le kan theihmi cu nan sinah kan phuan, cucu nanmah he hawikomhnâk kan ngeihkhawh nâkhnga caah a si. Kanmah nan kan hawikomhnâk hi Pa le a Fapa Jesuh Krih he i hawikomhnâk a si.

⁴ Cun nan i lomhnâk a tlin khawh nâkhnga hi thil hna hi nan sinah kan rak ṭial.

⁵ Hihi a sin in kan theihmi biacah nan sinah kan in chimhmi hna cu a si: Pathian cu ceunâk a si i Amah ah muihnâk a um hrimhrim lo.

⁶ Muihnâk ah kan um ko nain Amah he hawikawmhnâk kan ngei kan ti ahcun, lih kan chim i biatak kan nunpi lo tinâk a si.

⁷ Asinain Amah cu ceunâk ah a um bantukin, ceunâk ah kan um ahcun, pakhat le pakhat hawikawmhnâk kan ngei i a Fapa Jesuh Krih thisen in kan sualnâk vialte a kan thenh piak tawn.

⁸ Sualnâk ka ngei lo kan ti ahcun, kanmah le kanmah kan i hleng i kan chungah biatak a um lo.

⁹ Kan sualnâk kha kan phuan ahcun, kan sualnâk ngaithiam ding le kan dinlonâk vialte thianter dingin Amah cu zumhawk a tlâk i a dingmi a si.

¹⁰ Sualnâk kan tuahlo kan ti ahcun, Amah kha lih chim ah ka canter i a bia zong kanmah ah a um lo.