ZEFANYA 2 - ALLAH NIHYET MEM TUNGWATU NYA

Nabi Zefanya hara yok leu binhyepo iba nghim bak sisar

¹ Je di mben di jimmai sut jenti bi e, ma jingon huk niti,

² nipou tirigi jidem kep mitou di nitou mbris bimui bigyo! Ma jingon huk niti nipou tirigi njap di tuhan ndo Nide niggati tau bigyo ba, nipou tirigi tuhan nigga biborti di cig-cai dima cut igkep je bigyo.

³ Je di jingon nggriu kin je di jice tut bijibit tuhan nicukti nya ei minu dini jahagom e, ma jingkwei hanyen ndam tuhan. Ma jiyai jibou tut bijibibit tuhan ningon kanti ba, joom jenti ei Noho bei. Tou rikan tut pia hi rima ingwes ngun leu hukum mem njap dino tuhan ndo Nide niggati ei nibreisi i?

tuhan mikes hukum ei ngkiai nya di ibong ttai minu Israel dip

⁴ Timiei minu ndig Gaza hi di ningwes ngun bi. Hi mibong kep minu ndig Askelon bi lewo minu ndig dima dem kep ha he bong. Siceu mijji timiei minu ndig Asdod nya mem mpia ngket nggimau tug hon nihwen yok krosti leu api icuk timiei minu ndig Ekron nya ikiju bimbut hak leu minu ndig di ide bijo hak ei.

⁵ Je di mben Filistin di jibong bidem muk nipimat e, mijitug ndei nisigion jeti. tuhan kos tut hukum di Noni bindei ba, cut igkep je tu. Noni mibindei sar je leu api hi dima ningwes ngun leu ninda nsi kan bi.

⁶ Jide minu di dideu muk ngeisi minok mintu-minta nidumti di ug ninno ba, gembala nya yohok ide ig jibei kin kandan di domba ide nya ei mpia dima.

⁷ Timiei minu Yehuda di ingwes ngun nya migyai jide minu dima bigyati. Yoni inyohou mindhe-ndhe nimuhup tu di ide nya ei mpia dima bijem mindhe-ndhe nimuhup tu di ide nya leu api icoi ug ei ig di mben Askelon ide nya mem mmun bibong niti. Lewo ide tuhan Allah minyohou yok bibindei ba, ibong kei igwam kei hanyen bu.

⁸ tuhan Di Sindem Bibor pai “Dimiap tut mben Moab kin mben Amon di ighyet kinei sut Ditde limwa nya biba ighyet bicig yok tu. Yoni ingon jei bikan bipia igyai Ditde limwa nya ide dihyei bigyati.

⁹ Da di tuhan diyaijo ba, dinyohou minu Israel de limwa nya. Gima rino midicok tut mben Moab kin Amon nya nipwoi leu ide minu noyam kin gi dicok tut minu ndig Sodom kin Gomora nya. Minu dima yok mimpung tut jui nsim bousi kin mpia ninggek sinsiousi di war nggig-nggwen com niti he nya. Ditde limwa niken-ken di ingwes ngun nya micut igkep timiei minu dima bipos ndigban leu yok bigyai dihyei di ide nya bigyati.”

¹⁰ Timiei minu Moab kin Amon mitug ndei hukum drek dip ide nikon yontiti kin ingon jeisi dima. Yoni mitug ndei hukum drek dip gi ighyet tigut tuhan Di Sindem Bibor De limwa nya.

¹¹ tuhan mibindei ba, ingon ttin bibor. Noni mibindei sar kwar di tungwatu nya ikuk yok bak nya ei dihyeisi dini. Leu api ngkiai nya yahagom mikuk yok bak tuhan bidem yonti ide minu.

¹² tuhan mikes hukum nimai ei timiei minu Sudan nya cem dip.

¹³ Gima leu api tuhan miba Nide nisindemti bihwen mben Asyur bitimek hak. Noni mibindei ba, minu ndig Niniwe nigkumti noyam kin mpia nintiti kin iggum ndigsi di ngoi bibor cem.

¹⁴ Nimpung domba kin kambir nya kin sapi nya ninyeng hi gom hi gom mibong kep inghuisi ei minu dima. Hapug nya mitot yaham ei nigkumti di siceu nya inggek sinsiou dima yok bidwas kwei leu kendera mihyeti nya. Miniwou mitok-tok nyen ei dimbou hui nya. Tungwatu nya minggek buom sra nya bidem ig dima yok hagom ningwig leu.

¹⁵ Mun dima yok hagom micut igkep minu ndig di ninggei ngwig sut nide nisindemti di kan bipia ibong kei igwam kei dima. Timiei nya ikan bipia ide minu ndig dima nindig bibor dor njiriek minu ndig dihyeisi dini hagom. Ayo! Minu dima mpia mbum-bra bibor lewo hi di bong ser bi. Noro mindhe-ndhe bigbehei nya he rino itot yaham eisi! Yo di ikak puig binjiriek minu ndig dima midigit tut ba, ingkek hyenha tut.