ZEFANYA 1 - ALLAH NIHYET MEM TUNGWATU NYA

Nitriti

¹ Zefanya ne Kusyi nipmot ri. Nide pung di ntun him gi ikwop sindam leu bijehei bikui ne inyeng rino Gedalya kin Amazia kin Nibou Ndig Hizkia. tuhan sok nihyet ei Zefanya dip ei mpe di Nibou Ndig Yosia di Amon nipmot ninyeng tak kep minu Yehuda.

tuhan de njap nimbus munhyetti

² tuhan pai “Midibindei sar mun nyeng hagom ei dihyeisi dini bitut

³ tungwatu nya kin mindhe-ndhe nya kin ha nya kin wau nya cem hagom. Midicok tut yo di isibut nya yahagom. Midisindui sut ba, hi ningwes ngun biniyaijo bu bi. Da di tuhan disimbot dat tu.

⁴ Midikes hukum ei timiei minu ndig Yerusalem kin minu Yehuda titut yam dip. Midicok tut yo di ikuk yok bak Baal niken-ken nya yahagom leu mpia dima yok. Apino tungwatu nya ibbwe ser imam nya di igyai midyai mem Baal nya krebou hak.

⁵ Midicok tut yo di ikui ug ei ig bou ninjek dip leu binhyepo ikuk yok bak mpia yaisi kin bed mmun kin ham mpia-bbed him nya yahagom poi hak. Midicok tut yo di ikuk yok biDa di iba neheng pai bipia ingon gom tut Da lo, yeheng bitug hon kwar Milkom ninyeng dima hak ug.

⁶ Midibindei sar yo di ikuk yok biDa bi nya kin yo di yahara Da leu binhyepo dibie tut yok bi nya kin yo di iba inghim biDa kin yo di ikou sut gi ibit dihyet yahagom.”

⁷ tuhan de njap dideu kwei su ba, ei njap dima ne Allah miyai nibou tut Nide limwa nya igyai munti nya. Gima rino ma joom jenti nyahan ei Noho bei hak ug. tuhan tin ei mem gima ba Nide limwa nya yonti njem bibon midut di noyam kin midut nindig mindhe-ndhe ei nimbar hum dokti. Ba, Noni nduk mben Yehuda ide nitok nya kwei mem gima ihwen yok.

^8-9 tuhan pai “Ei njap di diba tungwatu bibon midut noyam kin gi diba mindhe-ndhe bibon midut dima ne midikes hukum ei yo di inyeng jei nya kin nibou ndig nide bat nya di inggimang ndigban bigyai nimai bak hiter leu binhyepo ibipos ndigban bibindei mpung iceu nide ig. Dikes hukum ei yo dima dip drek dip gi igyai bram ngkiai nya igyai kepti nya bikuk yok biDa dem kep nok yo di ikuk yok bak kwar nya.”

¹⁰ tuhan pai “Ei njap dima mijimiap yo di ipim nggruet ei Dimbou Pmem Wau nuhui kin yo di ipim kui jei di tibim kwei leu hanjop nijep ei minu ndig kin ig di lus bibor nya nibimbiti di tibim kwei leu nungug tou nya.

¹¹ Timiei minu ndig nite bijehei jen e, mpe di jimiap gima yok lene ma jipim ba, jibwos-bwos nyen. Lewo nitri-nipek mun cig nya kin yo di idahat mitiei ngwam bak hi ter nya itug ndei nimai hak tu!

¹² Mpe dima lene miditin mini ba, dibiput ser minu ndig Yerusalem. Midikes hukum ei limwa di ingon hou ser yam kin yo di ijoi sut yonti njem kin yo di ikan bipia Da di tuhan dibindei mun di mpu yok kin mun di cut igkep yok bi nya yahagom dip.

¹³ Siceu nya mipos ndigban di ide nya bigya kep ig di ide nya cem bitimek. Timiei minu ndig dima ingot ig noro igibong kep ig dima bi ba, inyohou miai ba anggur nghousi lo, igidut ba anggur ningat ningei bi.”

¹⁴ tuhan de njap nimbus tungwatu ingonti dideu kwei su. Igbit ri! Njap dima dideu bibor bitau kros kep nye ri. Njap dima mpung tut ninghuisi wei bibor di bindei ba, tentara di mimbri kui ingkek nya cem mipim kui jei drek dip ide ningon dahat leusi!

¹⁵ Njap dima ne njap di tuhan ndo Nide nigga biborti kin njap di nggruk kin njap di buhun kin njap di siceu inggek ig bitti kin njap nibindei timekti kin njap nidinditi di dindi-kai nggai kep nye kin njap di mpia com bi kin njap di bumbuhui jun ser nyeti ri.

¹⁶ Njap jei dima ne pun mbrei nibimbiti tibim kin tentara ngot di ighyet sra tut pran binjei ndam minu ndig di bon ngug tig kin tentara nibousi di igya coi nya di ihwen ri.

¹⁷ tuhan pai “Midikes mun di buhun mang bibor ei tungwatu nya dip lene gima bindei ba, itibap-tibap nyen noyam kin yo di igyai tu. Ibon sisar tut Da apino nogindini inggrom siber bidem minyei di biam ba, nimbiam ngut mpiei ei dihyei njek dip.”

¹⁸ Bit bon yo dima ide mas kin perak di inyeng tut nya giteu yok bingwes ngun mem njap di tuhan ndo nigga biborti kan bi. tuhan de nigga biborti di nok hum di cig-cai miyem dihyeisi dini titut yam bitimek bindung-ndiem. Noni muhun tungwatu dihyeisi dini hagom innei leu insi kros.