ZAKHARIA 9 - ALLAH NIHYET MEM TUNGWATU NYA

tuhan migwam nok nikei mem minu di jo ttai minu Israel nya

¹ Gini ne tuhan nihyet di sok ri. Noni kos tut mem gima kes hukum ei minu Hadrakh kin minu ndig Damsyik dip. tuhan ninyeng tak kep keret Israel nya he noro bitut minu ndig pmem di Siria cem.

² Ninyeng tak kep minu Hamat di bikkin minu Hadrakh cem. Mbro nok gino timiei minu ndig Tirus kin Sidon nya ingon ki lo, tuhan ninyeng mitak kep yok cem.

³ Minu ndig Tirus win tentara nibousi di igya coi nya binju mas kin perak mang bibor bikui sur mpia eisi apino mas kin perak dima nimangti noyam kin mun nitu nok iggum ndung kin igkrop di yem mpia ei puigsi.

⁴ Noro tuhan mibindei ba, minu ndig Tirus nuhui mbum. Noni minjei ide mun di inyeng tut nya hagom ug ei muk ngeisi leu api hum miyem minu ndig njem bingkiong.

⁵ Minu ndig Askelon kin Gaza nya ingat gima leu api ittin tut. Minu ndig Ekron cem ngat nicutti dima leu api ningon pus tut. Nibou ndig Gaza mipror lene tungwatu nya mibong ser minu ndig Askelon bu bi leu api mpia mbum-bra bram.

⁶ Ngkiai nya di ibon ide pung di intun him srig yamti mibong ser minu ndig Asdod. tuhan pai “Midibindei timek mben Filistin ide ningon jeisi.

⁷ Hon kep ammani kui lene igyem mikwau di ninggrom huisi kin njita hi ter di dipigig ser bu bi. Yo di ingwes ngun mibicom yam binok Ditde limwa nya ba, ingat yok nok yo di keret gom di leu keret Yehuda ri. Mben Ekron minok nimpung gom bit Ditde limwa nya noyam kin mben Yebus mem nijam gi nipou cem.

⁸ Midiya ser Ditde dihyei bidiggai ser nimpung tentara ngkiai nya di imbut di injiriek nya cem. Midisindui sut ba, nibou nya di ico kep Ditde limwa nya inyeng tak kep yok bu bi. Lewo dingat Ditde limwa nya inghuisi wei bou diyai him tu.”

Nibou ndig di mikwei yo

⁹ Je di timiei nungug Sion e, ma jingon llei bibor! Je di timiei minu ndig Yerusalem e, ma jiba jingon di kei bibor bikon jihyet! Jingat i! Jide Nibou Ndig kwei ndam je ba, bindei timek Nide siceu nya! Noni ne nibou ndig di ningon sren-srau di kwei sut niteu je bijingwes ngunti. Noni ba nibou coi bigwam ei keledai nehen pap ningut gom dip bikwei ndam je.

¹⁰ tuhan pai, “Midicom kroba pran bingwig leu Efraim leu api midibindei ba, kuda pran nya ipror bingwig leu minu ndig Yerusalem. Dibindei dahat hampiap hagom bingwig. Jide nibou ndig mikim mbrap tut keret dihyeisi dini bibindei ba, yahagom ingon kwes kin yam. Ninyeng tak kepti ninyanti ug bikep kin muk ngeisi ei nite hi kikau ug bipek kin muk ngeisi ei nite hi ba, bipek kin Minyei Efrat kikau ug bipek kin minu nohon keti.”

Allah pindi Nide limwa nya

¹¹ tuhan pai bak Nide limwa nya, “Nipou ne dipreu ei mem je leu api jiba mindhe di jibam ei nimbar hum dokti ninggrom bitak buk ser nipreu eisi dima. Gima rino midiba nipreu eisi bikwek je leu jingkiaisi di noyam kin jui di inggam tungwatu nya eisi di minyei pingge leu.

¹² Je di jisima ei jingkiaisi e, ma jingkwei hanyen kwei lewo No di jiyok jingon mem Nonaha. Ma jikwei gwam coi jitimieisi hanyen. Jimiap e, midinjei mun di kei bak jeni mbican bram yam drek dip ninghuisi wei di cut igkep je ei jingkiaisi.

¹³ Midibindei ba, minu Yehuda dem kep nok hampiap di tentara di mimbri kui ningkek krau ei nindati. Midibindei ba, Israel dem kep nok tibor di ditin ei mem gima dibiprindei siceu nya. Midibindei ba, timiei nungug Sion idem kep nok singau simeda di dibimem dinghat tut bidibitot mben Yunani.”

¹⁴ tuhan mindo Nonti ei anai brei bak Nide limwa nya leu api Nide tibor di kri di kes nya noyam kin kigyei di srei. tuhan Di Ninyeng Jei Bibor mimiep pun mbrei pran bimbut nimig sindem bibor kwei dem kep nok sigau di kwei leu nite bei mpia nibiho.

¹⁵ tuhan Di Sindem Bibor miya srak ko hagau Nide limwa nya bibindei ba, ihwen bitimek ide siceu nya yahagom. Tirigi ikon pran bit ide siceu nya ne ighyet misra tut pran noyam kin yo di pes pu yok. Ide siceu nya inggrom silipti ingkek noyam kin ninggrom midut di imam nya isiber ug ei nimbar hum dokti nisiliptiti.

¹⁶ Tirigi tto bou dima dem ne tuhan miteu Nide limwa nya ba, ingwes ngun noyam kin gembala di teu nide domba nya leu mindhe di ham yok. Leu api isieng piga ei tuhan de minu noyam kin tig permata ei topi di iba mas bibon.

¹⁷ Igbit ri! tuhan de dihyei mikei bibor kei ei nidipti. Igbit ri! Dihyei di kei bibor kei bidia-diau kei dima bindei ba, ba anggur kin gandum hei billei kei eisi. Gandum kin ba anggur ngei dima bindei ba, pinai pilei nya kin sop gwam nitta pilei nya ide nisindemti kum eisi bu.