ZAKHARIA 8 - ALLAH NIHYET MEM TUNGWATU NYA

tuhan preu ei mem yok bipia Noni miwin minu ndig Yerusalem hanyen

¹ tuhan Di Sindem Bibor yai nisokti dini bida bipai,

² “Diwis him nituti tirigi dimpu minu ndig Yerusalem lewo dingondut timiei nide nya bibor. Ditde ningondut yokti dima ribindei dino dingon nggrom kep ide nitok nya.

³ Midingkwei hanyen ug ei Ditde minu ndig Yerusalem di kwes kei bidibong ser. Tungwatu nya mikan tut bipia timiei minu ndig Yerusalem nya ingon gom tut Da ba, ijem tuhan Di Sindem Bibor de nungug ninyeng Nungug Di Kwes Kei.

⁴ Andigpoi koi nya kin sindigpoi koi nya di ikoi bibor ba, suar iba tom bitom yok nya migwam ser biyati ndig ei minu ndig Yerusalem.

⁵ Simpak ngot ei minu ndig ninsi nya mimpung tut munggwom di ikek-kek nyen hanyen bu.

⁶ Mpaba bit bon mun dima pek kep hanyen bou timiei di igyaisi jo nya igyai him kan bi lo, nggruk mem Da bi.

⁷ Miditeu Ditde limwa nya leu ingkiaisi di ide siceu nya ikat yok di icom yok ug ei nya,

⁸ bidibuwak yok hanyen kwei leu nite bei mpia nipriti kin nite bei mpia nicutti kwei leu api ibong ei minu ndig Yerusalem hanyen bu. Dibindei ba, inok Ditde limwa nya lene dinok ide Allah. Midiba ningon gom kin ningon sren binyeng tak kep yok.”

⁹ tuhan pai bak Nide limwa nya “Nogindini jimiap mun nyeng di nabi nya indat kep ei mpe di iprion cou mem gima iwin Ditde Ig hanyen ei nitti leusi tu. Gima rino ma mimbri kui jingkek!

¹⁰ Nipou tirigi nijam dima dem bigyo ne hi di sindem mem gima ba mitiei bingot kep tungwatu kin mindhe-ndhe bi lene hi di bong nyahan bi drek dip ide nitok joti di iwaisi yok nya. Dani dibindei ba, Ditde limwa nya yonti iba nitok biyam tu.

¹¹ Noro tini bu ne dibibon Ditde limwa nya di ingwes ngun dini ter leu gi dibibon yo di nipou nya.

¹² Yoni miba ingon di jo nyahan bigimahap ningan ei miaisi. Ide ba anggur nya mingat ningat ba, ningat di kei mintun dihyei njek dip mem yok. Dibindei ba, biget but bibor mem yok. Midinjei mun di kei dima yok hagom bak Ditde limwa di ingwes ngun nya.

¹³ Je di timiei minu Yehuda kin minu ndig Yerusalem e! Nipou pini jug tirigi ngkiai nya isigion yam ne isimbot dat ‘Nnaba mun di buhun di cut igkep minu Yehuda kin Israel nya cut igkep nani cem!’ Noro miditeu je bijingwes ngun apino ngkiai dima yok isimbot dat biyam ‘Nnaba mun di kei di juk kwei mem minu Yehuda kin Israel nya juk kwei mem nani cem!’ Gima rino ma jibrim jingkek ba, jittin tut au!”

¹⁴ tuhan Di Sindem Bibor pai “Tirigi jidigup bat-jidigai bat nya ibindei bidigga yok lene dikos tut mem gima dikes hukum ei yok dip bibor. Diluei dingonti tut Ditde nikos tutti dima bi. Dibindei mbut nikos tutti dima hak.

¹⁵ Noro tini bu ne midinjei mun di kei bak timiei minu ndig Yerusalem kin minu Yehuda nya. Gima rino ma jittin tut au.

¹⁶ Gini ne nicukti di suar jiyai kep nya ri. Gino jimbrap bit yam lene ma jipai mun di igbit biyam. Ma nikei nikos tutti nya hagom sren kei ba, biyai nibong kei nigwam kei.

¹⁷ Ma juhum yam nsi mem gima jibon mun di kinei bibor biyam au. Ma jiris mun bijibeheng tut tug hon tuhan ninyeng au. Dingon mpo tut nisuglai-suglai waisi kin nikei nikos tutti di sren bi kin nimbuk tut yamti.”

¹⁸ tuhan Di Sindem Bibor sok nihyet dini ei da dip bak Nide limwa nya bipai,

¹⁹ “Midut niyem njita bi mem nituti poi di jibon mem bed nibitai kin nimuhwi kin nimuhwindacan kin nisimnai ne midut di mpung tut ningon nggei-hi-nggeisi kin ningon keisi mem timiei minu Yehuda nya ri. Noro ma jibungwam ndam nitti kin ningon kwes kin yamti!”

²⁰ tuhan Di Sindem Bibor pai “Nijam midem leu api timiei minu ndig mang bibor minduk yam kwei ei minu ndig Yerusalem.

²¹ Timiei nya leu minu ndig gom mipai bak timiei nya leu minu ndig hi ter ‘Jikwei ba, yuug kuk nye bak tuhan Di Sindem Bibor ba, yahara bak leu binhyepo njei mun di kei bak nyeni. Ma jibit nye!’

²² Leu api tungwatu nya kin ngkiai nya di isindem bibor nya imang bibor mikwei ei minu ndig Yerusalem mem gima ikuk yok bak Da di tuhan Di Disindem Bibor bingat nadi leu binhyepo dinjei mun di kei bak yoni.

²³ Njap dima dem ne ngkiai nya ibou simnai mikwei ngat mben Yahudi gom ngat bipai bak ‘Nyeni cem nijoi sut ningat ningat di kei noyam kin nani lewo nimiap tut bipia Allah ningat rin ei jikieti.’ ” tuhan Di Sindem Bibor simbot dat tu.