ZAKHARIA 2 - ALLAH NIHYET MEM TUNGWATU NYA

Nabi ngat ningat-hi-ngat tut kuk nibinai nijeisi

¹ Dingat ningat-hi-ngat gom bu tut pinai gom di krau kuk nibinai nijeisi ei nindati.

² Dihig ser noni “Aug hantou rin i?” Noni buhup “Dug nai minu ndig Yerusalem nijeisi kin ninyanti leu binhyepo dikan tut.”

³ Leu api dingat malaikati di mbrap bit da sindi mbut rin lo, malaikati hiter ikwei um noni.

⁴ Malaikati gi nigom pai bak malaikati gi nican “Abrim amig haninyai ba, aug pai bak pinai pilei dima bipia minu ndig Yerusalem mimpung-mpiet tut tungwatu kin mindhe-ndhe nimuhup tu nya. Gima rino bit bon iwin ngug tig di bikrop ttai kan bi.

⁵ tuhan preu ei bipia Nonti ne hum di cig-cai di nok ngug tig di bikrop ttai minu ndig dima binyohou yok lene bigwam tut Nide nisindemti kin ninyeng di jei biborti hagom eisi.”

tuhan jem yo di isima ei ingkiaisi bingkwei hanyen

⁶ tuhan pai bak Nide limwa nya “Dibindei ba, jintek gimahap nima ug nima ug tu.

⁷ Noro je di jibong ei jingkiaisi e, nogindini ma jinang leu minu ndig Babel bijingkwei hanyen kwei ei minu ndig Yerusalem.

⁸ Tou rino njei bihwen je lene gima dem kep nok gi njei bihwen dingon kieti.” Gima rino tuhan Di Sindem Bibor cuk da biditri tut nisokti dini bak ngkiai nya di icut igkep Nide limwa nya bipos ndigban leu yok tu nya,

⁹ “tuhan Nonti mihwen bit jeni! Ba, jide awak di nipou nya mihwen je bipos ndigban jide ningwig leu je. Mpe dino mun dima cut igkep je ne mijikan tut bipia tuhan Di Sindem Bibor cuk da hwou ndam je tu.”

¹⁰ tuhan pai “Timiei minu ndig Yerusalem jen, ma jiba ningon di nggei-hi-nggei bipai doia! Midihwou gwam ei jikieti!”

¹¹ Ei nijam dima lene ngkiai nya imang bibor mikwei ndam tuhan bikuk yok bak binok Nide limwa nya. Noni migwam ei jikieti lene mijikan tut bipia tuhan rino cuk da hwou ndam je a.

¹² tuhan mijem minu Yehuda nok Nide pijum ei Nide minu di kwes kei. Noni midimig minu ndig Yerusalem binok mpia di bong eisi hanyen.

¹³ Ma jahagom jigwam nyahan ei tuhan Noho bei! Lewo Noni sindi jo leu nigwam kepti ei gwamti kwei su.