ZAKHARIA 13 - ALLAH NIHYET MEM TUNGWATU NYA

¹ tuhan Di Ninyeng Jei Bibor pai “Njap dima dem ne minyei yaisi gom mibiam mem gima piap yo di intun Daud him kin timiei minu ndig Yerusalem nya leu ide sisar kin nikuk no bak kwarti di ibon kep tu nya.

² Njap dima dem ne mididip tut kwar di ikuk yok bak nya inyeng leu dihyei dini leu binhyepo hi dima miyok ngon kep ninyeng dima bu bi. Midijji yo di ikon yonti inyeng binok nabi nitrowai nya kin yo di ninnei di kinei ya ingonti nya yahagom.

³ Ba, gino tungwagom mpig nibou tut nimbot kepti nipek kepti ningat rinaha yo ne ma nicig-nipmem nya mipai binoni bipia suar noni tug ndei hukum bimai hak lewo mun di mbot kep dima ne suglai nitu he ri. Gino nihyet jo kep bipia noni ne nabi rin ne suar nicig-nipmem nya iriu noni bimai.

⁴ Njap dima dem ne nabi nya mimmai sut yonti drek dip ide niyai nibou tut nibon mun noyam kin nabiti. Ba, ijuk sinsun nabi leu binhyepo ibiris mun bibinggei sut ide ningat-hi-ngat di ingat cem bu bi.

⁵ Noro ipai ‘Dani ne nabi rin bi. Dani ne no di yai midyai ei miaisi kikau bimai kep ri.’

⁶ Gino ihig ser noni ‘Abok ndei rino jo angget dima i?’ Lene suar noni buhup ‘Ditug ndei dibok dima tirigi disut nyeni nibui yam ei nyende ig.’ ”

Mun di cut igkep no di gembala kin nide domba nya

⁷ tuhan Di Ninyeng Jei Bibor pai “Singau simeda e, ma akiju ba, ahwen gembala di yai midyai mem Da! Ayai nimai bak leu api ide domba nya mintek gimahap. Dihwen Ditde limwa nya ba,

⁸ timiei di ibong bidem minu dini nittou nsi can leu nitou nsi ningai migyai nimai bidem minu hagom.

⁹ Timiei minu dini nittou nsi gom he rima ingwes ngun ug a. Ba, midibindei kwes yo dima noyam kin mas kin perak di iba hum bikwen di pimbai. Lene yoni ingat nadi biDa bidibuhup ighyet. Midipai biyok bipia yoni ne Ditde limwa nya rin ba yoni cem mipai jit bipia Dani ne ide tuhan Allah ri.”