ZAKHARIA 12 - ALLAH NIHYET MEM TUNGWATU NYA

Niteu minu ndig Yerusalem leu siceu nya indati leu api miningwes ngun

¹ Gini ne tuhan nihyet di sok tut Israel ri. tuhan di prion mpia-bbed him bipai tes dihyeisi biyai niyaijo bak tungwatu pai,

² “Dibindei ba, minu ndig Yerusalem midem kep mok mas di anggur ngei joti. Minu di jo ttai no nya midut ningei leu api ibou ngwak sibui-sibui nyen tut bidem kep yo di idut pes di pu yok pimo. Mpe di igyon ttai minu ndig Yerusalem ne migyon ttai minu ndig ngot di jo yo ei minu Yehuda cem.

³ Noro tirigi njap dima dem ne dibindei ba, minu ndig Yerusalem dem kep tig di buhun bibor. Mben di ijo leu tirima-tirima di ibingon mem gima ikon tig dima miyuum mun di buhun drek dip. Mben dihyeisi dini hagom mibicom yam ba, injei bihwen bit minu ndig Yerusalem.

⁴ Njap dima dem ne dibindei ba, kuda nya hagom ibbwe-bbwe nyen ba, mirei bon tungwatu di igwam kuda nya dip cem. Midiya ser timiei minu Yehuda nya noro dibindei ba, kuda di siceu ide nya hagom igyai tu.

⁵ Leu api keret Yehuda de nintun him yamti nya mikan ‘tuhan Di Ninyeng Jei Bibor yai nisindemti bak Nide limwa nya di ibong ei minu ndig Yerusalem.’

⁶ Mpe dima lene dibindei ba, keret Yehuda de nintun him yamti nya idem kep hum di cut ei biei nindig kep hum di inju keyam ei kin hyem di ninjeng cig-cai di sror gandum nintam di len tu. Yoni mibindei sar mben di ibong ttai yok nya yahagom. Noro timiei minu ndig Yerusalem nya ibong nyahan ei ide minu ndig ninsi.

⁷ Da di tuhan midibindei ba, tentara minu Yehuda ibindei timek siceu nya nipou ngig-ngat leu binhyepo ninyeng jeisi di yo di intun Daud him kin timiei minu ndig Yerusalem igyai dima nindig dor njiriek ninyeng jeisi di timiei minu Yehuda nindigsi nya igyai bi.

⁸ Njap dima dem ne midinyohou timiei minu ndig Yerusalem nya ba, yo di inghuisi jet bibor di ibong ikieti nya igyai nisindemti noyam kin Daud de nisindemti. Yo di intun Daud him mikrau inda bibie tut yok dem kep nok Ditde malaikati nibie tut yokti ba, dem kep nok dikrau inda bidibie tut yok.

⁹ Njap dima dem ne midibindei sar bikwop mben di itin ei mem injei siceu bihwen minu ndig Yerusalem.

¹⁰ Leu api midibindei ba, yo di intun Daud him kin timiei minu ndig Yerusalem ingon ya tut ningon ngakei yamti kin ningon ya tut naditi. Igyai mibong kep no di idat leu api ipim nggruet drek dip noyam kin no di pim nggruet drek dip nipmot di nimig gom nimaisi pimo. Yoni iba ingon di ngguk bibor bipim nggruet noyam kin no di nide munggwom mighumbou sar leu no pimo.

¹¹ Njap dima ne nipim nggruet di kiju bibor ei minu ndig Yerusalem noyam kin nipim nggruet ei hanjop Hadad-Rimon ei Mbang Briep Megido.

^12-14 Bikwop nimpung ig bei nsi di ibong ei minu dima ipim nggruet biyongkom. Nimpung ig bei nsi di intun Daud him ipim biyonti ba, nimpung ig bei nsi di intun Natan him ipim biyonti. Nimpung ig bei nsi di intun Lewi him ipim biyonti ba, nimpung ig bei nsi di intun Simei him ipim biyonti lene nimpung ig bei nsi nindigsi di igwam yo cem ipim biyonti. Lo, nimpung ig bei nsi hagom itnem bat nya ipim biyonti.”