ZAKHARIA 11 - ALLAH NIHYET MEM TUNGWATU NYA

Nibou di isibut nya icutti

¹ Hanjop Libanon e, ma akau ade dimbou pmem nya leu binhyepo hum yem ade buom di jei nya!

² Buom nitu nya e, ma jipim nggruet lewo buom di jei nya itti tu. Biei ubbu nya hagom tti tu. Biei ndig ngat di ya ei hanjop Basan e, ma jipim lewo hum cok tut bigbehei di dimbun nya titut yam bijjem hak tu.

³ Jimiap i! Nibou di inyeng tak kep nya rino ipim a! Lewo mun di inyeng tut di ibikon inyeng di jei nya sar tu! Jimiap i! Singa nya no igyau bidem bigbehei drek dip ibong kepti ei Minyei Yordan nyai di ngkiong bingwig leu yok tu.

Gembala cin

^4-6 tuhan Allah pai bida “Abon nanti bidem kep nok gembala di nyohou timiei minu dini titut yam lewo dingon nggriu sut yok bu bi. Yoni noyam kin domba nimpung ndig gom di dinyohou yok leu binhyepo dibui yok nok mikwau. Yo di ipek mikwau dima ikos domba nya binso yonti tut bi. Nitri-nipek domba cig nya ipai ‘Ikon tuhan ninyeng a! Nogindini inyeng tut ndigban kum eisi bu!’ Gembala dima yok igingondut domba di ide di inyohou yok dima bi. (Nihyet dini tibim ei tuhan nuhui him.) Midikes yo dima ei yo di inttig-tta nya indati kin ide nibou ninda nsi. Yo dima ibindei minu dini bitimek. Miditeu yok bingwes ngun leu yo dima inda nsi bi.”

⁷ Gima rino dibon danti bidinok gembala drek dip nitri-nipek domba cig nya di itin ei mem gima ikos nya leu api dibon tom can. Dijem tom gom ninyeng ‘Nisingat tutti’ lene dijem tom gom ninyeng ‘Nibicom yamti.’ Leu api dikinyon ei niya serti bidinyohou domba dima yok.

⁸ Lene dijji gembala ibou ninga pima ei ninsi bed gom. Lene nitri-nipek domba cig nya ibindei ba, ditde noom ningonti ngwig leu da drek dip gi ingon sibui sut da.

⁹ Leu api dipai bak nitri-nipek domba cig nya “Dikou sut gima dinyohou jide domba nya. Ba, domba di suar mai lene nna bimai hak ug. Gi suar sar lene nna bisar hak ug. Leu api niken di igyaijo nya yonti ibindei timek yam hak ug.”

¹⁰ Leu api dikrau tom di ninyeng ‘Nisingat tutti’ ba, didahat hacan. Tug hon nisinati dima ne dibinggek tut gi preu di tuhan preu ei mem mben Israel titut yam.

¹¹ Diyai nok gima ei njap dima hak. Leu api nitri-nipek domba cig dima yok ingig igyai kep da bingon huk niti bipia tuhan no mbrap kep tug hon ditde nibon munti nya.

^12-13 Leu api dipai biyok “Gino jikan bipia dem mem gima jikwas dimuhup tut da ne jikwas tut da hak ug. Gi bi ne nna ug.” Gima rino ikwas mitiei njep ningot ningai he tut da binok dimuhup leu api tuhan pai bida “Ma abindei coi mitiei dima ei bangdopti ei Ditde Ig hak ug.” Gima rino dibindei coi mitiei njep ningot ningai dima ei bangdopti. Mun di ikwas tut da bindo tut ide nibou cut bidati ug ei nok gi ndima!

¹⁴ Gima leu lene didahat tom de gi nican di dijem ninyeng “Nibicom yamti”. Diyaisi dima bindo bipia minu Yehuda kin minu Israel ide ningwes gwam yamti ki hacan tu.

¹⁵ Leu api tuhan pai bida “Abon nanti ba, adem kep gembala mbigom kin bu. Noro gini bu ne anok gembala di bon ninyeng bi.

¹⁶ Lewo dibindei ba, adem kep nok gembala di kinei. Angat i! Ditin ei mem dita gembala gom ei minu dini. Noni miba nikou yai domba di srawir nya buug teu domba di ipror nya bingwes ngun bi lene biyai obat bak domba di ibok nya bi. Noni miyai njita bak domba nya bigyem bindei yok bi. Noro noni miyem domba di nimmau ndok bibor nya inghui bitiba mindhe dima yok injou leu yok.

¹⁷ Gembala di kinei di kes nimpung domba nya ei dima mitug ndei nisigion noti! Pran mibicut mimbri di kui ningkek hak. Ninda pang mijet bibor lene niyai nite bei ninda com mitu hak!”