ZAKHARIA 1 - ALLAH NIHYET MEM TUNGWATU NYA

tuhan jem Nide limwa nya mem gima ingkwei hanyen ndam Noni

¹ Tirigi Nibou Ndig Darius ninyeng tak kep Persia buug cut ari bingwam gi nican ei bed gi nimuhwindaningai ne tuhan sok nihyet dini bida di Nabi Zakharia di Berekhya nipmot ba, Ido nignyon.

² tuhan cuk da leu binhyepo dipai bak Nide limwa nya “Da di tuhan Di Disindem Bibor digga jidigup bat-jidigai bat nya bibor ei nijam gi nipou pini jug.

³ Noro tini bu ne dipai bije bipia ma jingkwei hanyen ndam Da leu api midinyohou je.

⁴ Ma jiyai kep jidigup bat-jidigai bat di nipou nya igyai kepti nya au. Nipou yo ne nabi nya itri tut dihyet bak yoni leu binhyepo imbuk bibor bibon sisar bu au. Noro igimiap kep dihyet ba, ice tut bibit bi.

⁵ Njap di ammani ne jidigup bat-jidigai bat nya kin nabi nya dima ingat rin ei hantou i? Yoni imai bingwig.

⁶ Ditri tut dicukti nya kin disok kepti nya bak jidigup bat-jidigai bat nya tug hon Ditde awak ngot di nabi nya nipou su. Noro igimiap kep dihyet bi apino ibiang igyai munti nibuhunti ug a. Leu api inso yonti bipai bipia Da di tuhan Di Disindem Bibor dikes hukum ei yok dip bit leu ide nitunggweisi ba, gima ne Ditde nikos tutti mem yok ri.”

Nabi ngat ningat-hi-ngat tut kuda ningut poi

⁷ Nibou Ndig Darius ninyeng tak kep Persia ug cut ari bingwam gi nican ei bed gi nisimnaibrimigcan di ninyeng Syebat ei njap nyatungwagom bitai lene tuhan ndat kep nisok nihyetti bida tug hon ningat-hi-ngat gom di dingat mem mmun.

⁸ Ba, dingat lo, tuhan de malaikati kui kuda ningwoi ningut gom bigwam dip. Kuda dima ya tut ei biei murad nghousi ei mbang briep gom lene kuda hi ter ibou poi igya abia kep kuda dima ninghim dip kwei. Kuda dima yok bihi inta ngwoi lene bihi inta ngwoi bidem bitug ningat pimo lene bihi inta tiei.

⁹ Dihig ser malaikati “Andigpoi e, kuda ngot dini yok bindo tut mindei binye i?” Lene noni buhup “Midindo bina yo.

¹⁰ tuhan pinak yok kwei mem gima inyohou tou kep mun di pek kep ei dihyeisi dini.”

¹¹ Kuda dima yok hagom ipai bak malaikati dima “Niya bidem dihyei njek dip dini hagom biningat lo, mun nyeng hi bindei mbriong tungwatu dihyeisi dini hagom apino inghuisi jet.”

¹² Lene malaikati dima pai “tuhan Di Sindem Bibor e, agga minu ndig Yerusalem kin minu ndig ngot ei minu Yehuda bibor kikau mem ari bingwam ningot muhwindacan tu. Agga yok bibor nok gima ba, akos ser ide nitunggweisi nya bi ug bipek apig bu i?”

¹³ Lene tuhan ba nihyet di bigwam ser ningon bibuhup malaikati dima nihyet,

¹⁴ lene malaikati dima cuk da biditri tut nihyet di tuhan Di Sindem Bibor pai dima. Noni pai bida “Da di tuhan dingondut minu ndig Yerusalem di kwes kei dima bibor ba, dingon ngguk bibor tut cem.

¹⁵ Noro digga ngkiai nya di ikan bipia ibong kei igwam kei nya. Lewo tirigi po disindui sut ba, Ditde niggati jo kep Ditde limwa nya bigyo ne ngkiai dima yok ikum ei ninghuisi di weiti bak Ditde limwa nya.

¹⁶ Gima rino dingkwei hanyen kwei ei minu ndig Yerusalem mem gima dikos ser minu ndig dima nitunggweisi. Timiei minu ndig dima miwin Ditde Ig kin minu ndig Yerusalem hanyen leu api ibong kei igwam kei nok gi nipou hanyen bu.”

¹⁷ Malaikati dima cuk da biditri tut nisokti dini bu “tuhan Di Sindem Bibor preu ei mem nye bipia mun nyeng hagom midem mem Nide minu ndig nya hanyen ba, Noni mimpu minu ndig Yerusalem mbigom bu bipai jit bipia nyeng tut minu ndig dima hanyen.”

Nabi ngat ningat-hi-ngat tut sapi nibou nggai poi

¹⁸ Lene dingat ningat-hi-ngat gom kin bu tut sapi bou nggai bitai.

¹⁹ Dihig ser malaikati di mbrap bit da pima “Sapi bou nggai dima yok bindo tut mindei binye i?” Noni buhup “Sapi bou nggai dima yok bindo tut ninyeng tak kepti di sindem nya di ibindei gimahap mben Yehuda kin Israel nya kin timiei minu ndig Yerusalem ri.”

²⁰ Lene tuhan ndo nikinding ngkimom cig ibou bitai di ikrau apak ei indati bida.

²¹ Dihig ser noni “Nikinding ngkimom cig dima yok ikwei mem mindei i?” Noni buhup “Ikwei mem gima igyai ningon di digit bak ngkiai nya ba, ibindei cut yok cem drek dip gi ihwen minu Yehuda di timek bindung kin gi ibindei ba, timiei minu Yehuda nya intek gimahap ri.”