YUNUS 4 - ALLAH NIHYET MEM TUNGWATU NYA

Yunus ningon sibui drek dip Allah di luei ningonti

¹ Yunus joi sut timiei minu ndig Niniwe igyai munti dima bi. Gima rino ningon sibui nindig bibor.

² Lene noni ngat nadi bipai “tuhan e, tirigi dijo leu ditimieisi bigyo ne dikan tut bipia mporo abindei ba, timiei minu ndig Niniwe mittin ser ide sisar. Dikan tut bipia angondut tungwatu nya ba, angon nggriu sut yok. Aom angon tut yok ba, asingat tut yok leu api atin ei mem gima aluei angonti tut hukum di akes ei yok dip. Apino bitig dino dinang leu Ade nicuk dati leu api dinang ug ei minu Spanyol leu a.

³ tuhan e, ayai dinnei hanyen leu da nogindini lene nna ba dimai hak ug lewo dingon bisau ndam gima dimai leu gima diyaisi jo a.”

⁴ tuhan buhup “Mun di apai mem abisu tindei ade ningon sibuisi dima dem bi.”

⁵ Leu api Yunus ug ei nite bei mpia nipriti bohok ig jibei ei mpia dima lene gwam nding leu mpia di wam a. Noni mian ser minu ndig Niniwe hanyen biningon kiju mem mun di mipek kep mem yok.

⁶ Leu api tuhan Allah bindei ba, njita kioi di nimeng nyan hei didiyam dideu Yunus nigwati ba, nimeng nggrou ser mpia dima wam noni. Ningat ne Yunus ningon gwam ba, nillei ngwig sut. Mben Asyur ide minu ndig nibousi Niniwe

⁷ Noro njap bigyoti lene Allah kes briei ngwoi gom ba, wim ninjem apino nimeng mui hak.

⁸ Niabiati mpia pri tu lene Allah kes hou di dut bibor kwei leu nite bei mpia nipriti bikui Yunusti. Mpia cem wam noni lene mpia dima bindei ba, nibou ngwak sibui sut lene ninghuisi bimbriong tut. Apino noni hara “Dingon bisau ndam dimaisi dor njiriek diyaijoti.”

⁹ Noro Allah buhup “Dem mem gima angon sibui drek dip njita nimeng di mui dima bi.” Leu api Yunus buhup “Dem mem gima dingon sibui bidimai drek dip hak ug!”

¹⁰ Lene tuhan pai binoni “Njita nimeng hei bijei mem mmun-njap gom ngat bimui hanyen mem njap bigyoti. Abindei nimeng behei ba, anyohou cem bi. Mbro nok gima lo, angon ngguk tut nimuisi.

¹¹ Dem mem gima dingon nggriu sut timiei minu ndig Niniwe di ningot ndig dima bi e? Lewo minu ndig dima bon munggwom nya imangti ibou sribu sratus gom ba, nyatungwagom di imig mbus mun di kei leu mun di kinei kan bigyo nya bitut mindhe-ndhe nya di bit bon ikwop nimangti kan bi cem.”