YUNUS 1 - ALLAH NIHYET MEM TUNGWATU NYA

Yunus bit tuhan nicuk noti bi

¹ Mpe di gom ne tuhan cuk Yunus di Amitai nipmot,

² bipai binoni “Akiju ba, aug ei minu ndig Niniwe lene ma aba acot pai bak timiei nya bipia Da di tuhan dikan tut ide sisar di kinei bibor tu.”

³ Noro Yunus kiju binang leu tuhan nicuk noti buug ei minu ndig Yopa. Noni ug krau hammi tirigi kibar minyei gom tin ei mem gima mbut bitot minyei ug ei minu Spanyol. Gima rino noni bipbur ba, go gau nonti bak kiten kibar leu api bri bit timiei kibar nsi nya dima biyuug ei minu Spanyol leu binhyepo bong ting bibor leu tuhan niyai him.

^4-5 Yunus juk nyahan buug bong mai ei kibar ninsi di ndam nijou mo jug. Leu api tuhan ba sigau nindig bibor bihwen kibar tut yok ei muk ngwa dip ba, muk tti nindig bibor. Mbigom kin bu ma kibar misar tut yok hak. Gima rino timiei kibar nsi nya yahagom ingon ttin bibor ba, yahara bak ide kwar di ikuk yok bak hi-gom hi-gom mem gima mpu yok. Leu api injei ndigban di kibar nsi ug ei muk mpoti leu ba, kibar nggan lai-lai de.

⁶ Leu api kiten kibar juk ba, ngat Yunus biwin bipai “Nggon rino abong mai nok i? Akiju ba, ahara ade kwar di akuk na bak leu binhyepo noni mpu nye leu gi misar a.”

⁷ Leu api kiten kibar kin Yunus ikui ug ei kibar dip bingat lo, timiei kibar nsi nya ipai biyam “Jikwei ba, iko bibinggok tut no di bindei dino sigau yem nye hak nontini dini ug e.” Tirigi iko bibinggok tut tu lene jo nibreisi mem yok bipia Yunus rino bindei dino sigau yem yok a.

⁸ Gima rino ihig ser noni “Ma apai jit ug e. Nani rino abindei dino mun dini cut igkep nye e? Akwei nggon ei sirini i? Ajo leu hantou ba, ade pung kim tou i?”

⁹ Yunus buhup “Dani ne munggwom Ibrani rin ba, dikuk da bak tuhan di nok Allah ei gwamti di pai tes muk ngei kin mam bei a.”

¹⁰ Lene binut bu bipai “Dinang ug ei ting bibor leu tuhan niyai him.” Imiap tu lene timiei kibar nsi nya ingon ttin bibor ba, ipai binoni bu “Abon mun dini ba, atunggwei sut tuhan nicuk nati!”

¹¹ Sigau yem yok bikum eisi nindig bibor bu. Gima rino timiei kibar nsi nya ihig ser Yunus “Ninggon ndei na leu binhyepo sigau dini kes hon ba, yem nye bi i?”

¹² Noni buhup “Ma jicom da hak ug ei muk mpoti leu binhyepo muk di tti dini mikes hon ba, mpia mbum-bra hanyen. Lewo dikan tut bipia dani rino dibindei dino sigau dini yem je a.”

¹³ Noro timiei kibar nsi nya ibingon mem gima itig minyei sindem bibor leu binhyepo iba kibar bitot ndam mam bei noro indei bi. Lewo muk tti nindig bibor bikum eisi bu.

¹⁴ Gima rino yahara bak tuhan bipai “tuhan e, Nahara bak Nani pia ma akes hukum nimai ei nye dip drek dip gima nicom no di ningon ngun dini ug ei muk mpoti au. tuhan e, Nani rino abindei dino mun di buhun dini cut igkep nye bit leu angon kanti.”

¹⁵ Leu api ikat Yunus bicom noni ug ei muk mpoti apino sigau dima ntus hon ba, mpia mbum-bra.

¹⁶ Hon kep gima rino timiei kibar nsi nya ittin tuhan nindig bibor apino tirigi yuug krau mam bei lene ibui mindhe tut ninggrom bibikuk yok biNoni leu api igyai mun bit leu nok ipreu sut ei mem Noni.

¹⁷ Mpe dima lene tuhan cuk wau ndig krop gom kwei leu binhyepo pinde Yunus titut yam. Noni gwam ei wau ninghopti mem mmun-njap nitindur ningai.