YUDAS 1 - ALLAH NIHYET MEM TUNGWATU NYA

Yudas pigo Allah de limwa nya

¹ Srat dini leu Yudas. Dinok awak mem Yesus Kristus ba, dikindig rino Yakobus. Ba, srat dini mem je dino Icig Allah dimig je tu di jingon dorti tut Nide ningon ngakei jeti kin Yesus Kristus ninyohou jeti.

² Handei kon ba, Allah singat tut je biyai jingon jo nyahan ba, jide ningon ngakei yamti kum eisi bu.

Nisok kepti tut guru nitrowai nya

³ Disut bat di dingon kieti jen, dipi bidipas srat bak jeni tut ide niteu leu sisar kin niyaijo nijepti di pek kep mem nyeni yahagom tu. Noro nogindini dingon hukti tut ba, diba srat dini bibiwin kep jingonti leu binhyepo jibrim jingkek ba, jinyohou jide niba ningon comti di Allah kes bak Nide limwa nya mbigom ngat he bijo kikau.

⁴ Lewo yo di isibut nya ibou poi imbris nyahan bisrig ikieti ba, ikiek-kiek nyen nihyet tut Allah nisingat tut nyeti leu binhyepo ibimbrap gau yonti ingut kanti di kinei di srou yok. Yo dima itte tut bipai sut Yesus Kristus bipia Nongkom ngat ne Iceu kin ide Tuhan rin bi. Allah nihyet pai sut ide hukum di hatap yok mimbrek ngan tu.

⁵ Mbro nok gino jikan tut gini hagom tu lo, dimiep hum kin jingonti tut Tuhan di teu mben Israel bingwes ngun leu minu Mesir. Noro ei niabiati bu ne Noni hwen gi hi di ingon jo kep bi nya di isrig ikieti.

⁶ Ma jiyok ngon kep malaikati nya di ibimangkrei ide nisindemti bipigau hanjop ne ikes itimieisi bihigom ei. Allah ba lante di bit bon hi kwek kan bi biteu yok ei mpia ttou nsi gom di dindi-kai ei dihyei jou kikau bibou itug ndei hukum mem Njap ningwig honti ug e.

⁷ Ma jiyok ngon kep minu ndig Sodom kin Gomora kin minu mien di gahai nya. Lewo timiei minu dima yok igyai bram malaikati dima yok igyai kepti nya bicut tut yam. Pinai yonti icut tut yam ba, sop yonti icut tut yam apino yahagom itug ndei hukum ei hum njengti di bit bon hi mu kan bi. Ba, gima nok mun di bisok kep bijo nibreisi mem yo di yahagom.

⁸ Nok gima cem yo di isibut pima yok ipai bipia ingat ningat-hi-ngat di bindei dino ibon sisar tut yonti ingut apino ingwes pri gau Allah ninyeng di tak kep yokti ba, ikucang ninnei di dia-diau nya ei ginyo kug cem.

⁹ Noro Mikhael di nok nibou ndig mem malaikati nindigsi nya bon nok gima bibrim ningkek kep Bilis hak bi. Tirigi noni kin Bilis isrep yam tut Musa nimai lene Mikhael pai kep Bilis bisriman noni bi. Noro pai hak a Nnaba! Tuhan mikes hukum ei na dip hak ug!

¹⁰ Noro yo dini ighyet kinei sut mun di ingon kiowi tut nya hagom. Inok mindhe-ndhe di niten-pos nya di ibit leu ingut kanti niyai kepti lo, ingut kanti dima bindei cut yonti ba, isar bingwig.

¹¹ Ayo! Notou mem yo dima i? Lewo ico kak puig di Kain mbut kak. Ibindei yonti bicut ei nikineisi drek dip mitiei noyam kin Bileam niyai munti di yai tunggwei. Isrep tut Allah noyam kin Korah di srep tut Musa apino tug ndei nimai.

¹² Tirigi jiyem njita bit yam lene yo dini isrig jikieti bibindei mmai jahagom cem iduhwen njita hak yon ba, ingon hek tut yonti njem he. Inok bumbuhui di hou miep-miep nyen lo, but kan bi. Inok biei di ngat ningat hi bi mem nijam di biei nya ngat ningat. Inok biei mon di tungwatu nya iprim tut nigau di mui bihigom cem.

¹³ Yo dini inok muk di tti nindig bibor. Ingut kanti di kinei di srou yok noyam kin muk nirai di roi-roi nyen. Inok ham di tte leu nipuig ei mpia-bbed him. Allah tin ei mpia ttou nsi di dindi-kai gom di jo ninno bijo kikau mem yok tu.

¹⁴ Lewo Henokh di nok pung nimuhwindacan di ntun Adam him tri tut yo dini mimbrek ngan tu bipai “Jingat i! Tuhan mehei sut Nide malaikati di ingon kwes-kwau nya ibou sribu-ribu kwei,

¹⁵ leu binhyepo mbus tungwatu nya yahagom ingonti. Noni mikes hukum ei yo di isibut nya dip drek dip igyai munti di kinei di srou yok nya kin ighyet di wer mpiahi di ibirom kui Noni cem!”

¹⁶ Yo dini inso-nso nyen cem injei kep hi ter cem igyaijo bit leu ingut kanti di kinei di srou yok cem ingon jei cem iba ninsi dimmau biris tungwatu nya leu binhyepo ibibrim mun di ingat ingwes eisi leu yok.

Yudas sok kep kin ngginau yo di Kresten

¹⁷ Noro disut bat di dingon kieti jen, ma jiyok ngon kep nihyet di yo di igya kui ide Tuhan Yesus Kristus ipai bije nipou su.

¹⁸ Ipai bije bipia tirigi njap ningwig honti son dideu lene tungwatu nya di igyai igbit ingut kanti di kinei di srou yok nya mittau kwei leu api iba ighyet bicig je.

¹⁹ Yo dini ibindei ba, yo di mbusyamei iba nitok biyam. Allah Ninnei sindem tut yok bi noro ingut kanti di ntun dihyeisi dini him om kep yok.

²⁰ Noro disut bat jen, ma jiba jide niba ningon com Yesus Kristusti di kwes-kwau bingot jide niyaijoti noyam kin jingot igya. Lene jibingat nadi kin nisindemti di kwei leu Ninnei Gi Kwes.

²¹ Ma jinyohou jenti leu binhyepo Allah ningon ngakei jeti ppu hum kin jingonti mem nijam di jiyok jingon mem ide Tuhan Yesus Kristus nikwei hanyenti. Noni miyai niyaijo nijep di jo kikau bije tug hon ningon di nggriu sut je.

²² Ma jibiwin kep yo di ingon kiowi niti di isrig jikieti nya ingonti.

²³ Ma jiteu yo di ingon jo kep bi di isrig jikieti ba, ingwes ngun leu hum njengti di yem yok. Ma jingondut yo di igyai igbit ingut kanti di kinei di srou yok nya. Ma jiba jingon di sok kep jenti bimbres jenti leu ide ningut kanti di kinei dima leu binhyepo sisar rap je bi.

Yudas ngat nadi tindei mun di kei mem yok

²⁴ Ma nyeni yahagom inggei sut Allah di sindem mem gima nyohou je leu binhyepo jicut bi ba, sindem mem gima buwak je bitut jingon di llei lo, mun di kinei hi rap je bi kikau ug ei Nonti Noho bei.

²⁵ Nongkom ne Allah di teu nye leu sisar biyai niyaijo nijep binye tug hon ide Tuhan Yesus Kristus ri. Noni ne nibou ndig di kei-kau-kei rin ba, sindem bibor cem. Ninyeng tak kep mun nyeng hagom habiei leu nimbie him kikau kwei bipek ammani kep kikau buug hon nohonti bi! Igbit ri.