YOHANES 5 - ALLAH NIHYET MEM TUNGWATU NYA

Yesus bon mindur gom ei minyei ugyousi Betesda

¹ Niabiati bu ne Yesus ug ei minu ndig Yerusalem bibit yo di ibon pesta kep njap nindig.

² Minu ndig Yerusalem bon ugyousi gom di mben Ibrani ijem ninyeng Betesda di jo dideu Dimbou Pmem Domba. Ugyousi dima bon ig jibei nya ningat muhwi cem bijo ttai minyei nintig dip.

³ Yo di inggwen imang bibor induk yam kwei ei mpia dima drek dip igyai di tu kin imig di lit kin ingut di nggicai cem ba, yahagom ibong sinsiou ei ig jibei nsi nya. [Ingon ya mem minyei ugyou dima niroisi.

⁴ Lewo bikwop njap poi ser lene Allah de malaikati gom coi bibindei roi minyei ugyousi dima. Apino no di kinyon ei minyeiti bibie tirigi minyei roi-roi nyen lene nongkom dima kei hanyen.]

⁵ Tungwagom di nimig lit kikau mem ari bingwam nitindur ningot ningai ba, muhwindaningai cem no rinaha.

⁶ Yesus ngat noni ei nibongti bikan tut bipia nggwen ninno tu. Leu api hig ser noni “Ajoi sut akei hanyen e?”

⁷ No di nggwen dima buhup “Andigpoi e, hammi tirigi minyei roi lene hi ngondut da buusap da ug ei minyei ugyousi bi. Dijjei ndam minyei noro hiter kinyon eisi bibie njiriek da.”

⁸ Gima rino Yesus cuk noni “Akiju ba, akon ade kwo ba, ambut tut hak ug.”

⁹ Hammi tirigi Yesus cuk noni nok rino noni kei hanyen leu api kon nide kwo bimbut tut. Mun dima pek kep mem Njap Nigwam Kep Ninghuisi.

¹⁰ Gima rino nibou mben Yahudi nya isok kep no di sindi kei hanyen dima “Harin dima akon ade kwo di abongti a. Lewo njap di ammani ne Njap Nigwam Kep Ninghuisi ri.”

¹¹ Noro no dima buhup “No di bindei bidikei hanyen cuk da bipia dikon ditde kwo bidimbut tut.”

¹² Ihig ser noni “Tou ricuk na bipai ‘Akon ade kwo ba, ambut tut hak ug’ nok i?”

¹³ Noro no dima kan tut Yesus ninyeng bi lewo Yesus mbut bisrig tungwatu nya imang bibor di ingwig ei mpia ttou nsi dimati.

¹⁴ Niabiati bu lene Yesus ttau kep noni ei Tuhan De Ig bisok kep noni “Amiap e, akei hanyen tu noro ma abon sisar bu au. Leu binhyepo mun di kinei bibor bu micut igkep na hanyen bi.”

¹⁵ Leu api noni kes Yesus leu lene ug mbot kep tut Yesus di bindei ba, noni kei hanyen tu bak nibou pima yok.

¹⁶ Hon kep njap dima kui lene yoni ihwen bit Yesus drek dip gi bindei no di nggwen bikei hanyen mem Njap Nigwam Kep Ninghuisi.

¹⁷ Noro Yesus pai biyok “Dicig yai kep midyai nya kikau kwei bipek ammani kep ba, Dani cem diyai kep midyai nya.”

¹⁸ Yesus nihyet dima bindei ba, nibou mben Yahudi nya ibrim ingkek mem gima igyai nimai biNoni drek dip niyai midyai njiriek nicukti mem Njap Nigwam Kep Ninghuisi he bi noro drek dip nihyet di Noni tri tut bipia Allah ne Nicig ri. Tug hon nisinati dima rino Noni pai sut Nonti bipia Noni kin Allah yahacem noyam.

Allah Nipmot de nisindemti

¹⁹ Yesus buhup yo dima ighyet nok gini. “Dipai nijit bije bipia bit bon Allah Nipmot yai kep midyai bit leu Nonti ningon kanti kan bi noro tou kep Nicig biyai bram Nicig niyaisi. Lewo Nipmot yai kep midyai dem kep nok Nicig niyai kepti nya.

²⁰ Lewo Nicig ningon ngakei Nipmot ba, ndo Nide midyai nya hagom brei biNoni. Lene gima he bi lewo Nicig mindo midyai nindig bibor bu bak Nipmot apino jahagom mijinga leu sut.

²¹ Bit leu nok Nicig win yo di imai nya bibindei ba, igyaijo hanyen lene Nipmot cem bindei ba, tungwatu nya igyai niyaijo hanyen bit leu ningon kanti.

²² Nicig Nonti mbus tungwatu nya ingonti bi noro yai nisindemti hagom bak Nipmot leu binhyepo Nipmot mbus ingonti,

²³ leu binhyepo yahagom ikon Nipmot ninyeng bit leu nok ikon Nicig cem ninyenga. No di kon Nipmot ninyeng bi kon Allah di cuk Nipmot kwei ninyeng cem bi.

²⁴ Dipai nijit bije bipia no di miap dihyet bibit leu api ba ningon com No di cuk Da kwei yai niyaijo nijep di jo kikau ei ningonti tu. No dima mitug ndei hukum bi noro hei leu nimai bicoi ei niyaijo nijepti bu.

²⁵ Ma jiyok ngon kep bipia nituti dem tu ba, mpe dima kwei bu cem yo di imai nya imiap Allah Nipmot nihyet. Leu api yo di imiap nihyet igyai niyaijo nijep.

²⁶ Nicig ne niyaijo nijep nibousi ri. Nicig bindei ba, Nipmot cem nok niyaijo nijep nibousi.

²⁷ Nicig yai nisindemti bak Nipmot leu binhyepo mbus tungwatu nya ingonti lewo Nipmot ne Munggwom Tungwatu Nipmot ri.

²⁸ Ma jinga leu tirigi jimiap tut gini au. Mpe dima kwei bu ne yo di imai nya yahagom imiap Noni nihyet,

²⁹ leu api mikiju leu nimai nya ikieti. Yo di igyai munti kei nya ikiju um niyaijo nijep noro yo di igyai munti kinei nya ikiju um hukum.”

Mun di bindo bipia Yesus ne nijit-jau ri

³⁰ “Bit bon diyai midyai bit leu dingon kanti kan bi. Dimbus tungwatu nya ingonti bit leu nok Allah nicuk Dati. Diba dingon sren-srau bikos tut mun nyeng hi lewo dibit leu Danti dingon kanti bi. Noro dibit leu No di cuk Da kwei ningon kanti.

³¹ Gino dimbrap gau Danti dihyet ne hi di miningon jo kep dihyet bi.

³² Noro hiter mbrap gau Da. Dikan tut bipia mun di Noni pai sut Da dima ne nijit ri.

³³ Nipou ne jisok jihyet ei tungwatu nya ibou poi dip bak Yohanes leu api noni tri tut Da ba, nihyet dima ne nijit ri.

³⁴ Dipai nok gima lewo disuar yo di hiter ighyet di ipai sut Dani bi. Noro leu binhyepo Allah miteu je leu sisar biyai niyaijo nijep bije.

³⁵ Yohanes dima ne mini njeng di piga digai puig mem je rin lo, jijoi sut noni mem njap poi he.

³⁶ Mun nyeng gom di bindo tut Da nindig bibor dor njiriek bindo di Yohanes ndo pima. Dicig cuk Da mem diyai kep midyai apino midyai di diyai kep nya hagom bon ninyeng dor njiriek mun di Yohanes tri tut Da. Ditde midyai nya ndo brei bipia Dicig cuk Da kwei.

³⁷ Dicig di cuk Da kwei cem tri tut Da. Noro jimiap Noni nihyet bijingat Noni bou jiyai him cem bi sren.

³⁸ Jipwoi nihyet ei jingonti bi lewo jingon jo kep Da di Noni cuk kwei bi.

³⁹ Jipikor tut Allah nihyet bokti ninno tu lewo jikan bipia jibiyai niyaijo nijep di jo kikau. Noro Allah nihyet bokti dima ndo tut Da.

⁴⁰ Noro jikou sut gi jikwei bit Da leu binhyepo jiyai niyaijo nijep.

⁴¹ Disuar tungwatu nya inggei sut Da bi.

⁴² Dikan tut jingonti bidikan tut bipia ningat ne jingon ngakei Allah bi.

⁴³ Dikwei sut dicig de nisindemti noro jikou sut Da. Noro gino hiter kwei sut nide nisindemti ne jiya um noni.

⁴⁴ Jingon llei sut ninggei sut yamti noro jibrim jingkek mem gima Allah Gom Ngat nggei sut je bi. Gi nok lene notou mijingon jo kep Da i?

⁴⁵ Ma jikan bipia Dani rino midipai kep je ei Dicig Noho bei au. Ningat ne Musa di jiba jingon com mipai kep je.

⁴⁶ Gino jiba jingon com noni haigtu lene ma jiba jingon com Da cem lewo noni pas kep tut Da.

⁴⁷ Noro gino jiba jingon com mun di noni pas kep dima bi lene notou jingon jo kep dihyet bu i?”