YOEL 3 - ALLAH NIHYET MEM TUNGWATU NYA

Allah migwam nok nikei mem ngkiai nya yahagom

¹ tuhan pai “Mpe dima lene midingkwei timiei minu Yehuda kin timiei minu ndig Yerusalem ide nikei-kau-keisi hanyen bak yoni.

² Midinduk ngkiai nya yahagom kwei ei Mbang Briep Niya Ei Nikei Noho Bei. Leu api midigwam nok nikei mem yok. Midikes hukum ei yok dip drek dip gi ibibon Ditde limwa nya kinei. Lewo ijji mben Israel bibindei ba, intek gimahap ug ei ingkiaisi leu api ikwas Ditde minu Israel tut yam.

³ Iko bibinggok tut yo di ikat yok nya leu binhyepo ikwas yok tut yam bit leu nok gi iko tut pima. Itri munggwom pinai nya kin munggwom sop nya di ikat yok nok awak bibipek mitiei mem gima ibigo gau sop di ibou sibui nya kin ba anggur ngei.

⁴ Je di mben Tirus kin Sidon kin Filistin jahagom e, jinggon ndei Da i? Jiba jimbuk birop biDa e? Gino jiyai nok gima ne ma jitug ndei mun di dibirop hanyen bije haninyai!

⁵ Jipos Ditde mas kin perak kin mun di dinyeng tut nya bijipwoi ba, juug sut ei jide ig di jikuk je bak kwar eisi nibousi nya.

⁶ Jikat timiei minu Yehuda kin timiei minu ndig Yerusalem ug ei ingkiaisi leu api jitri yok nok awak mem mben Yunani bijibipek mitiei.

⁷ Nogindini midibuwak yok hanyen kwei leu ingkiaisi di jitri yok ug eisi lene midibuhup hanyen bije noyam kin gi jibibon yok kinei su.

⁸ Midisindui sut ba, tungwatu nya mitri jipmot bat kin jipmisop bat nya binok awak mem timiei minu Yehuda leu api yo dima mitri yok bak mben Syeba di ibong ei minu ting bibor apino inok awak hanyen bu. Da di tuhan disimbot dat tu.

⁹ Ma jitri tut nihyet dini bak ngkiai nya yahagom bijipai ‘Ma jitin ei mem gima jikon pran bijinjei siceu cem ba, jicuk yo di ikon pran kan yahagom bidem yam bimbut sindem!’

¹⁰ Ma jitug jide ngkimom nitu di jiba sapi bikri mem jibiwim dihyei hagom binok singau simeda lene ma jiprin jide singau koi hagom binok tigtug cem. Ma no di ninghuisi jet brim ningkek bipai ‘Dikon pran kan noyam kin tentara di sindem!’

¹¹ Je di ngkiai nya di jibong bidem minu di gahai dini kou e, ma jibrim jimig kwei! Ma jidem yam ei mbang briepti dinu.” tuhan e, ma acuk Ade tentara nya kwei ba, ihwen yok!

¹² Suar ngkiai nya yahagom itin ei ba, induk yam kwei ei Mbang Briep Niya Ei Nikei Noho Bei. Da di tuhan digwam nok nikei ei mbang briep dima mem ngkiai nya di ibong bidem minu di gahai dini kou.

¹³ Ngkiai dima yok imbuk bibor. Ma akos yok dem kep nok no di kos gandum di len tu. Ma akimut yok noyam kin no di kimut ba anggur ngat ei mun di ibikimut ningei eisi di ut bipias hagau.

¹⁴ Tungwatu ibou sribu-ribu idem yam ei Mbang Briep Niya Ei Nikei Noho Bei. Jei bi ne tuhan De Njap mitau kep yok ei mbang briep dima.

¹⁵ Mpia njap kin bed mmun dindi-kai ba, ham nya jimjit bu bi.

Allah minjei mun di kei bak Nide limwa nya

¹⁶ tuhan ba niyau-yau nyenti bikwei leu Nide mbigdip di Sion. Nihyet di tibim kwei leu minu ndig Yerusalem noyam kin kru di nisu bong bibindei ba, dihyeisi kin mpia-bbed him ugwa-kwei. Noro Noni miya hacan mem Nide limwa nya biya srak ko hagau mben Israel.

¹⁷ “Je di mben Israel e, nogindini mijikan tut bipia Dani ne tuhan bidinok jide Allah ri. Digwam ei Ditde mbigdip Sion di kwes kei. Minu ndig Yerusalem cem miluei nitta binok minu ndig di kwes kei bu. Apino ngkiai nya mikwei kon pran bit minu ndig dima bu bi sren.

¹⁸ Mpe dima lene miai ba anggur nghousi mikieng kep nungug him hagom ba, sapi kin domba nya migya bidem nungug tou nya bigyem abris ei abris nghousi nya. Minyei pmem di biam ei minu Yehuda mipingge hanyen bu bi sren. Minyei di pimbai kei gom mibiam kwei leu tuhan De Ig kikau ug ei Mbang Briep Akasia nisurti-nipekti.

¹⁹ Noro minu Mesir miluei nitta binok iggum ndigsi kin bigum dip. Minu Edom mitimek bingwig noyam kin ha ngunti lewo timiei minu Edom ikon pran bit timiei minu Yehuda bigyai nimai bak yo di ibon mun tunggwei bi nya.

²⁰ Mben Israel mibong kei migwam kei ei minu Yehuda kin minu ndig Yerusalem cem bijo ninno bijo kikau.

²¹ Noro midibirop hanyen bak yo di igyai nimai bak timiei minu Yehuda. Midisindui sut yo di ingon mui nya bingwes ngun bi. Midigwam ei nungug Sion bijo ninno bijo kikau.”