YOEL 2 - ALLAH NIHYET MEM TUNGWATU NYA

Mun di bindo tut tuhan De Njap di mikwei yo

¹ Ma jimiep pun mbrei bijibui brem-brem di bindo tut mun di buhun ei nungug Sion di Allah de mpia di dia-diau kei. Je di timiei minu Yehuda e, ma jinghuisi mpig sut tuhan De Njap lewo dideu kwei su.

² Njap dima mitau kwei sut nidinditi di dindi-kai kin bumbuhui di dindi tut biget leu api hai ceng di nok tentara nimpung di nindig gom mikwei nggai kep nungug him nya noyam kin bumbuhui di ndok bibor. Mun di buhun di nok gini hi cut igkep tungwatu nya nipou bigyo lene micut igkep yok ei nidipti bu bi sren.

³ Hai ceng dima mibindei ba, njita beisi hagom timek bingwig noyam kin hum di yem hagom bingkiong. Jide minu di jo hai ceng nya yoho bei noyam kin Miai Eden noro ei inghim dip ne noyam kin iggum ndigsi di kinei bibor. Njita beisi niken hi jo ba, mahai meng hi ningwes ngun leu yok bi.

⁴ Idem kep kuda. Idor sindem dem kep nok kuda pran di ikinyon ei nikon pranti.

⁵ Ipri-pri nyen ei mbigdip nya ba, nibimbiti noyam kin kroba pran di mbut sindem cem. Ittau kweisi dem kep nok hum di sror ei miai ngausi nibimbiti. Ba, idis yam ei nok tentara nimpung di nindig gom leu binhyepo ikon pran bit ide siceu nya.

⁶ Tirigi hai ceng dima yok injei kwei lene tungwatu nya yahagom idigit tut nindig bibor ba, iimaisi hai sut cem.

⁷ Hai ceng dima injei siceu noyam kin tentara nimpung di isindem bibor bipri gau ngug tig dem kep nok nimpung gom di ita ibou ei gi ikon pranti. Imbut sren kak ide puig nya ba, hagom sur yam kei.

⁸ Imbut ariwace bi. Noro injei mun di ide siceu nya idat ser yok. Bit bon hi bindei ba, ikes hon bingkwei hanyen kan bi.

⁹ Ikon pran bit minu ndig nya bipri gau ngug tig bikui ug ei ig bei cem. Icoi kak kendera mihyeti noyam kin ninggimang mun cig nya.

¹⁰ Tirigi hai ceng dima yok injei kwei lene ibindei ba, dihyei ugwa-kwei. Mpia-bbed him bingmai ba, mpia njap kin bed mmun dindi-kai lene ham nya cem jimjit bu bi.

¹¹ tuhan nihyet di tibim kwei di bicuk Nide tentara di ikon pran kan nya dem kep nok kru di cut a. Yo di ibit nicuk yokti dima imangti ningot ndig ba, isindem bibor. tuhan de Njap dima ne njap di buhun bibor ba, kinei bibor cem rin ba, tou riningwes ngun i?

Nicukti mem ittin ser ide sisar

¹² tuhan pai “Nogindini ma jiba jingon titut yam bingkwei hanyen ndam Da. Ma jisindui njita mem nituti poi bijingon ngguk tut jide sisar ba, jiyai nggwei kibor cem.

¹³ Ma jiba jingon di nggriu-nggrop bindo tut gi jittin ser jide sisar leu gino jirik jide sinsun ei je him he ne dem mem bi.” Ma jingkwei hanyen ndam tuhan di nok jide Allah. Ningon jo nyahan ba, ngondut je biningon nggriu sut je cem. Noni tin ei mem gima kos ser tungwatu nya ide sisar bikou sut gi kes hukum ei yok dip.

¹⁴ Mpaba tuhan di nok jide Allah miluei ningonti lene bindei ba, jide beisi nya hagom minnum kei hanyen e? Gi nok ne mijikwas jide ba anggur ngei kin jide gandum ngat ndrim hi tut Noni.

¹⁵ Ma jimiep pun mbrei ei Nide Nungug Sion. Jicuk jide limwa nya leu binhyepo isindui njita mem nituti poi leu api induk yam ei gom mem gima imbus yam ei.

¹⁶ Ma jinduk tungwatu nya yahagom ei gom. Ma jihig andigpoi nya kin munggwom nya kin ningwoi-ngwoi nya yahagom kwei. Nok gima cem ma pinai wak cam nya kin sop wak cam nya yehei leu ide ig bei ba, idem yam.

¹⁷ Suar imam nya di ibon midut bak tuhan ei nimbar hum dokti kin tuhan De Ig nide bisai ma kwei nikieti igyai nggwei kibor bingat nadi “tuhan e, ma angondut Ade limwa nya. Ma asindui sut ngkiai nya bingwes pri gau nye ba, iba ighyet bicig nye tirigi ipai ‘Mben Israel ide Allah No ritou i?’ ”

Allah bindei ba, ide dihyei nnum kei hanyen

¹⁸ Mpe dima lene tuhan ningon buhun tut Nide dihyei bingondut Nide limwa nya.

¹⁹ Noni buhup “Nogindini midiyai gandum ngat kin ba anggur ngei kin mini zaitun bije nok njita apino mijinggum bu bi. Midisindui sut ba, ngkiai nya ingwes pri gau je bipa ndip je bu bi.

²⁰ Midijji hai ceng nya di inok tentara nya di ikwei leu bei mpia nijjai leu api bihi minang ug ei iggum ndigsi. Midijji gi hi di bie ug ei Igpong Nsimti leu api midijji gi hi di ya abia ug ei Muk Hacanti. Hai di imai nya impiei dem kep nok mindhe nggruau nimpieisi. Midibindei ba, itimek bingwig drek dip gi ihwen bit je.

²¹ Beisi nya e, ma jittin tut au. Noro ma jiyai nillei tug hon mun di kei bibor di tuhan bibon mem je.

²² Mindhe-ndhe nya e, ma jittin tut au. Lewo abris nghousi hagom minnum kei hanyen ba, biei ara ningat kin ba anggur ningat mintun him ninjem di nindig bibor.

²³ Je di timiei minu ndig Sion e, ma jiyai nillei bijingon kei bibor kei lewo tuhan di nok jide Allah njei mun di kei nindig bibor bak jeni. Noni bindei ba, mpia but nok gi dem mem bed di biang mpia ngei ba, biget mbras kwei mem bed di biang hou kin es ba, biget but mem bed di biang mpia kwes hanyenti bit leu nok gi Noni kos tut mem je habiei ei nimbie him.

²⁴ Jide ig gudan di jillet gandum ninjep leu nisina bai eisi mimpung tut gandum ngat lene jide bak di jo simiak mun di jikimut biei ngat eisi ut tut ba anggur ngei kin mini zaitun bimpung pias hagau.

²⁵ Midingkwei mun di sar bingwig leu je ei nijam di hai ceng ningot ndig bibor igyem jide njita hagom bingwig leu je bije hanyen. Lewo Dani rino dicuk hai ceng di nok tentara nimpung ndig gom dima ug ei jide minu.

²⁶ Jide njita beisi midem mem je apino jinghop mpung tut. Gima mibindei ba, jinggei sut tuhan di nok jide Allah lewo Noni bibon mindur mang bibor mem je. Hon kep ammani kui ne ngkiai nya miba ighyet bicig Ditde limwa nya bu bi sren.

²⁷ Je di mben Israel e, mpe dima lene mijo nibreisi mem je bipia Da di tuhan disrig jikieti bidinok jide Allah. Dangkom he rino Allah lene hiter hi bu bi. Hon kep ammani kui ne ngkiai nya iba ighyet bicig Ditde limwa nya bu bi sren.”

tuhan De Njap

²⁸ “Niabiati bu ne miduhug dinnei bikwop ei tungwagom-gom ningonti. Jipmot bat kin jipmisop bat nya mitri tut dihyet. Jide andigpoi nya mimumpriem. Jide pinai pilei nya mingat-hi-ngat cem.

²⁹ Miduhug dinnei bikwop ei awak pinai nya kin awak sop nya ingonti ei nijam ningwig honti dima.

³⁰ Midindo bindo tut nijam dima ei mpia-bbed him kin dihyeisi dini. Gima nok ninggrom di siber kin hum njeng kin hum mmup di ndok.

³¹ Mpia njap dindi ba, bed mmun ngwoi dem kep ninggrom nipou tirigi tuhan de Njap ningwig honti di nindig ba, kei-kau-kei cem mitau kros bigyo.

³² Noro tuhan miteu bibikwop tungwagom-gom di hara Noni leu api yai niyaijo nijep. Bit leu nok Noni pai ‘Timiei minu ndig Yerusalem di didimig ei su nya mingwes ngun.’ ”