YOEL 1 - ALLAH NIHYET MEM TUNGWATU NYA

Nitriti

¹ Gini ne tuhan nihyet di Noni sok ei Yoel di Petuel nipmot dip ri.

Mben Israel ingon buhun tut njita beisi di hai ceng nya igyem bingwig

² Je di andigpoi nya e, ma jingon ya mem dihyet. Je di timiei minu Yehuda jahagom e, ma jiyok ngon kep. Mun di cut igkep je dini cut igkep je nipou su e, he cut igkep jidigup bat-jidigai bat nya nipou su e?

³ Ma jipai sut mun di cut igkep je dini bak jimunggwom bat nya leu api yoni mipai sut hanyen bak imunggwom bat nya bu leu binhyepo yo di intun yok him mikan tut leu api mitri tut hanyen bak yo di intun yok him bu.

⁴ Hai ceng di bit bon hi kwop imangti kan bi iteu ei beisi nya bigyem njita hagom bingwig. Njita di hai ceng nimpung gi nigom igyem leu di niken jo dima jo ei mem nimpung gi nican bu ba, igyem.

⁵ Je di pes pu je e, ma jikiju bijiya! Je di nidut ba anggur ngei cig e, ma jiyai nggwei kibor! Lewo hai ceng nya igyem ningat di sindi ntun ba anggur him bingwig leu je tu.

⁶ Hai ceng nya di inok tentara nimpung nindig gom igya kep ide minu dini. Isindem bibor ba, bit bon hi kwop imangti kan bi cem. Ikwai ninggwenti dem kep nok singa niwek nikwai di tuk di nggwen bibor.

⁷ Hai ceng dima ibindei ba, ide ba anggur hagom timek bingwig. Igyem biei ara cem bingwig ba, gi jo ndia rino ningwam nya he. Ibut biei ngkek bingwig leu ninjem bibindei ba, ninda-nda nya tiei-tiau kei.

⁸ Ditde limwa jen, ma jiyai nggwei kibor noyam kin sop gwam nitta pilei di pim nggruet tut no di pinai di ningon ngakei di yok wa kep no tu nimaisi.

⁹ Gandum ningat kin ba anggur ngei ngwig leu midut nya di ibon ei tuhan De Ig tu. Gima rino imam nya di iba ingon gom bibon midut nya bak tuhan yahagom ingon ngguk tut.

¹⁰ Jide beisi nya hagom dem kep nok iggum ndigsi ba, dihyei ningon ngguk tut gandum ngat di timek bingwig kin ba anggur ngat di ningei ngwig leu kin biei zaitun di ningei ngwig cem.

¹¹ Je di jiyai miai e, ma jingon ngguk bibor! Je di jinyohou ba anggur e, ma jiyai nggwei kibor! Lewo hum yem jide gandum nitu kin gandum-jelai hagom bitut njita nindigsi bijjem bingwig leu je tu.

¹² Biei di ngat ningat ei beisi nya hagom mui bingwig bitut biei anggur kin apel kin ara kin kurma kin delima. Gima rino bit bon jide limwa nya igyai nillei bu kan bi.

¹³ Je di imam di jiya kui nimbar hum dok e, ma jijuk sinsun kron bijiyai nggwei kibor! Ma jicoi ug ei tuhan De Ig leu binhyepo jingon ngguk bibor mem mmun kikau binjap kep! Lewo gandum kin ba anggur ngei di jibikuk je bak jide Allah hi bu bi.

¹⁴ Ma jicuk jide limwa nya leu binhyepo isindui njita mem nituti poi leu api induk yam ei gom mem gima imbus yam ei. Ma jihig jide nibou nya kin yo di inyeng jei nya kin jide limwa di timiei minu Yehuda yahagom kwei ei tuhan De Ig leu binhyepo yahagom yahara Noni kwei mpu yok.

¹⁵ Tto bou di tuhan preu ei mem je dideu su. Njap dima mibindei ba, jahagom jidigit tut lewo tuhan Di Sindem Bibor mibindei ba, jitimek bijingwig.

¹⁶ Njita timek bingwig bou nyeni igyai him. Bit bon igyai nillei ei tuhan De Ig bu kan bi.

¹⁷ Njita ngan di indim ei dihyei di ngoi-nga hagom mui bingwig. Gandum ngat hi dima ninju ei ig gudanti bu bi. Gima rino ig gudan di ngwak nya lus bingwig.

¹⁸ Sapi nya hagom idungwek tut ninggum lewo abris nghousi hi jo bu bi ba, domba nya cem inghuisi jet.

¹⁹ tuhan e, dahara Na. Ma akwei mpu nye lewo abris nghousi kin biei nghousi nya ngoi-nga noyam kin hum sror biyem hagom bingwig leu su.

²⁰ Nok gima cem mindhe-ndhe di yehek bi nya yahara Na di tuhan lewo minyei nya hagom pingge bingwig leu yok apino idut ndia ngei hi kep inggobiausi bi.