YESAYA 57 - ALLAH NIHYET MEM TUNGWATU NYA

tuhan sigion nikuk no bak kwar cig nya

^1-2 Yo di isingat di ingon kwes imai ne hi dima ningon dorti tut biyok ngon kep yok bi. Mbro nok gino mun di kinei kieng kep minu bibor bibindei ba, ide nitok joti nya igyai nimai biyok lo, ingwes ngun leu mun di buhun ba, ibong kep inghuisi bibong nyahan.

³ Noro je di nimpung nibon sisar e, ma jikwei bidimbus jingonti! Lewo jikei dor njiriek nung cig kin no di cut tut hi nitnem-hi nijjep cem kin sop di nibou buwei bi!

⁴ Tou rino jiba yok bikek i? Tou rino jiba jihyet bicig i? Apo jeni rino jintun nisuglai cig kin nimpung bigbehei cig nya him bi e?

⁵ Jikuk je bak kwar nibindei nnum njita kioi nya lene jibisindui sut jenti ba, jicut tut yam ei biei pigig behei kin biei ndig di nimeng nggrou nibehei nya. Jiba jimunggwom bat nya bibon midut nindig yok ei nimbar hum dokti ei tig nggreti ei minyei mbangti nya.

⁶ Jimbus kru kwai ei mpia dima keyam bijikuk je bak ba, jiba ba anggur ngei biprok kru kwai dima leu api jiba nibon midut gandum bikuk je bak cem. Jikan bipia dingon kei sut jiyai munti dima yok hagom e?

⁷ Jikui ug ei nungug ninggram him nya mem gima jibon midut nindig mindhe-ndhe ei nimbar hum dokti bijijou yam ei sirima bit leu jingut priti.

⁸ Jitas jide kwar nikrar kep yamti ei jide dimbou hui nya lene jiba jinghim bak Da. Jijuk sinsun leu je bijiba jingat ngu bikui ug ei jibongti di nyan. Leu lene jingot kep no di jibou buwei kep bikwei jou je ei sirima ba, jibijou noni kep jingut priti.

⁹ Jiba mini ibou kin mini di ui-gwang kei nya bidip je leu api juug kuk je bak kwar Molokh. Jicuk tungwatu nya biyuug nggok kwar hiter nya ei minu ting kin minu nimai ide nya cem.

¹⁰ Jimuhup sar drek dip gi jinggok tut kwar di jikuk je bak nya lo, jingon gingkwei leu bi. Jikan bipia kwar dima yok ibindei sindem je ser nhyepo jinghuisi wei bi.

¹¹ tuhan pai “Kwar di jikuk je bak dima yok di ibindei di jittin tut yok ritou nya i? Ibindei di jiris mun biDa ba, jigiyok ngon kep Da bi. Apo gi jikuk je biDa bu bi dini drek dip gi digwam nyahan ninno tu dini rin e?

¹² Jikan bipia jide nibon munti nya hagom igbit noro midindo jiyai munti di kinei dima brei bak tungwatu nya. Mpe dima lene bit bon jide kwar nya impu je kan bi.

¹³ Nnaba jahara kwar dima yok biteu je bijingwes ngun hak ug! Hou dimiep yok bibit hou nimig leu api ipror hak tug hon hou di bindei hei ninnei leu nuhui him mbigom ngat he! Noro yo di iba ingon com Dani mima minu dima nok minu ninda rom lene ibikuk yok biDa ei Ditde Ig.”

Allah nipreu ei mem yokti tut gima mpu yok bindei ba, ikei hanyen

¹⁴ tuhan pai “Ma jitot lentes bijitin puig mem Ditde limwa nya. Ma jinjei mun nyeng di bigen ser puig dima hagom.”

¹⁵ Lewo Allah Di Ninyeng Jei Bibor di Kwes-kwau cem gi ninyeng tak kep bijo ninno bijo kikau cem pai “Digwam ei mpia di anai di nok mpia di kwes-kwau. Noro digwam ei yo di yoom kep ingonti kan nya kin yo di ingon ngguk tut ide sisar nya ikieti cem leu binhyepo dipui dihyet tut ide nibrim ningkekti kin ide niba ningon comti hanyen.

¹⁶ Midiyai niyaijo nijep bak Ditde limwa nya. Midinjei kep yok dem kep nok yo di itunggwei nya bidigga yok bijo ninno bijo kikau bi. Diyai nok gima leu binhyepo ingon dahat bi.

¹⁷ Ide sisar nidrui bou ngwakti ribindei dino digga yok a. Gima rino dikes hukum ei yok dip leu api dibikes yok ei cem. Noro ingkek ndok ba, imbus ide puig bit leu yonti ingon kanti.

¹⁸ Dingat igyai munti nya tu noro midibindei ba, ikei hanyen. Midikrau inda bidicen yok cem. Dibimpu yok bidigwam ser yo di ingon ngguk nya ingon cem.

¹⁹ Midibindei yo di yahagom bitut yo di ibong dideu kin yo di ibong ting cem mibong nyahan. Midibindei ba, Ditde limwa nya ikei hanyen.

²⁰ Noro yo di isibut nya idem kep muk di roi kikau ba, bit bon ntus hanyen kan bi. Ningwa dip di roi ug-roi kwei dima ttei mumpiang kin igkrop.

²¹ Bit bon yo di ibon sisar nya mibong nyahan kan bi. Da di tuhan disimbot dat tu.”