YESAYA 44 - ALLAH NIHYET MEM TUNGWATU NYA

tuhan Nongkom ngat he rino Allah

¹ tuhan pai “Je di mben Israel di jinok Ditde awak nya kin je di jintun Yakub him di didimig je ei su jahagom e, ma jingig jitingou mem dihyet.

² Dani ne tuhan ba, dipai tes je habiei ei jipmem ninghopti bidimpu je tu. Ma jittin au lewo jinok Ditde awak di didimig ei su nya ba, dingon ngakei je.

³ Midisiber minyei ug ei dihyei ningga biborti leu api midibindei ba, minyei nya biam ei iggum ndigsi. Midiyai nisindemti bak jimunggwom bat nya ba, midinjei mun di kei bak jide nintun him yamti di bram yam nya.

⁴ Yoni miyehei nok minta di nnum kei di hei igbit ninnumti kin biei gandarusa di hei ei mam bei cem.

⁵ Ngkiai nya gom-gom sindam mipai jit bipia dikuk da bak tuhan. Yoni miba yok bikum yo di intun Yakub him. Bikwop yo dini yahagom miwim tuhan ninyeng ei inda pang bipai sut yonti bipia yoni ne tuhan de limwa nya ri.”

⁶ tuhan Di Sindem Bibor di ninyeng tak kep mben Israel binyohou yok pai “Dangkom ngat he rino Allah ei nimbie him kikau ug ei ningwig honti cem.

⁷ Tou rinoyam kin Dani i? Jicuk no dima kwei ba, ndo nonti biDa! Ma noni tri tut mun di bindo tut gima biDa! Tou ritri tut nisinati tut nijam di nimbie him kikau ug bipek nijam di ningwig honti kan i?

⁸ Ditde limwa jen, ma jittin au! Dangkom he rino ditri tut nisinati tut nijam di nimbie him kikau kwei bipek nijam di nogindini. Jingat gini hagom bou jiyai him tu bijiya kui Da. Ninyohou kep je cig hiter hi bi. Dingat hi bou diyai him bi sren.”

tuhan ningwes om kwar nya

⁹ Neheu kep kwar cig nya yahagom ikinei-kinau ba, ide kwar di inggei sut nya hagom mikui-kausi he. Yo di ikuk yo bak kwar dima yahagom igyai tu ba, ingon mbum apino mimmai sut yonti.

¹⁰ Tungwatu nya di iba ngkimom nitu bibon kwar bikuk yok bak nya igyai munti dima mikui-kausi!

¹¹ Ningat ne yo di ikuk yok bak kwar nya mimmai sut yonti. Neheu kep kwar cig nya inok tungwatu dihyeisi dini he. Gino jicuk yok ug ei nikei noho bei ne yoni mittin tut ba, immai sut yonti.

¹² Tukan ngkimom yai ngkimom nitu ninggop gom bikes ei hum di dut biborti lene tug-tug nyen. Noni ta nibou eisi ba, nahanggwap mbilen leu api nggum binggobiau cem apino ninghuisi wei.

¹³ Tukan biei nai biei ut gom nijeisi lene pas kwar ningwes eisi. Leu api ba nide oi mien beheu biei lene bindei ba, kwar niimaisi kei bibor. Leu api tas kwar dima ei nide ig.

¹⁴ Mpe hi noni ba biei buom kin eru kin terpentin bibon kwar dima. Mpe hi bu lene noni ta biei salam nikioi bibet ningon mem mpia but apino biei dima hei bijei.

¹⁵ Lene noni wim biei dima ninjem gom birop bihi nok biei nindig lene bed bihi ei beheu nok kwar. Noni ba biei nite hi bindig hum di wam noni lene bikang roti ba, heu nite hi bu binok kwar bikuk no bak.

¹⁶ Igbit ri! Noni ba biei mui pima bindig hum leu api bam mikwau eisi biyem. Hum dima wam noni leu api noni pai “Hum dini piga kei ba, wam da bidingon kei sut!”

¹⁷ Lene noni heu biei nindigsi nok kwar bikuk no bak bikon ninyeng. Lene ngat nadi bak bipai “Nani ne ditde kwar di dikuk da bak rin ba, ateu da bidingwes ngun!”

¹⁸ Yo di igyai nok gima ingkek ndok bibor! Imut igyai ba, ingon ndok ser lewo ingon hukti tut mun di igyai dima haigtu bi.

¹⁹ Neheu kep kwar cig dima kan-kan nyen tut niyai munti dima bi. Noni kan “Sirop biei njem bisindig bihi kep hum lene siba bihi bikang roti ba, sibibam mikwau cem bisiyem. Lene siba biei nindigsi bibon kwar bou sinda him. Ningat ne sikuk sa bak biei ttou dima he!”

²⁰ Niyai munti dima dem kep nok no di yem kep atriem ndung. Ningon kanti di mbum bibor dima ris noni apino bit bon hi mpu noni kan bi. Ningkek ndok ser leu ba, ningon gi dorti tut bipia kwar di noni krau ei nindati dima ne kwar rin bi noro mun di biris noni ug ei nikineisi.

tuhan ne Nipai Tes Mun Cig kin Niteu Kep Tungwatu Nya Kan Cig ri

²¹ tuhan pai “Je di mben Israel e, ma jiyok ngon kep bipia jinok Ditde awak. Dipai tes je bijinok Ditde awak. Midingon prion ser je bi sren.

²² Dicok tut jide sisar noyam kin dicok tut bumbuhui. Ma jingkwei hanyen ndam Da lewo dikwek je leu mun di kat je tu!”

²³ Mpia-bbed him e, ma ambos-hi-mbos! Dihyei jou e, ma ayai nillei! Mbigdip nya e, ma jimbos-hi-mbos! Baham tindurti bitut biei nya hagom e, ma jiyai nillei! Lewo tuhan ndo Nide nikei-kau-keisi brei tirigi Noni teu Nide limwa nya.

²⁴ Jide tuhan di teu je leu jide sisar bipai tes je ei jipmem bat nya inghopti pai “Dani ne Nipai Tes Mun Cig ri. Dangkom diprion mpia-bbed him ei anai. Tirigi dipai tes dihyeisi lene hi mpu Da bi.

²⁵ Dibindei ba, yo di iko mun bibinggok tut ndiyok ingon mbum ba, diba yo di nung kui yok bikek. Dibigen ser yo di ingon ki nya ighyet bidikiek ingon di kimbo bidibindei ba, ingon mbum hanyen.

²⁶ Dibindei ba, Ditde awak niji ngkiem. Tirigi disok dihyet bidikes dingon kanti ei no di dipinak hwou dip lene dingon kanti dima hagom mipek kep mem tungwatu nya. Dipai sut minu ndig Yerusalem bipia tungwatu nya mibong ser minu ndig dima hanyen ba, midiwin minu mien nya ei minu Yehuda hanyen bu. Midipindi ide ig kum kroi nya ba, wer ig hanyen.

²⁷ Dipai bak muk ngei “Ma asri ba, anok ningga biborti hak! Midibindei ba, ade minyei nggram nya pingge hanyen hak ug.”

²⁸ Dipai bak Kores ‘Anyeng mitak kep limwa nya mem Da leu binhyepo ayai munti nya hagom bit leu dingon kanti. Acuk tungwatu nya leu binhyepo iwin minu ndig Yerusalem ba, ita cou nipmem nya mem tuhan De Ig hanyen.’ ”