YESAYA 41 - ALLAH NIHYET MEM TUNGWATU NYA

Allah win mben Israel ingonti

¹ Allah pai “Je di timiei minu ting nya e, ma jigwam nyahan bijimiap kep dihyet. Ma jitin ei mem gima jinduk yam ei nikei noho bei bijipai brei binoni tut jide munhyet. Jikwei ba, isimbot kep biyam tut jide munhyet ba, ikos tut gi hi di ningon ngun kin gi hi di yai mun tunggwei.

² Tou pingok ei nibou ndig di sindem bibor gom ningonti bibuwak noni kwei leu nite bei mpia nipriti i? Tou ribindei ba, noni hwen nide siceu nya bitimek bingwig bidem minu i? Tou risindem tut noni leu binhyepo co kep mben nya bikuk nibou ndig nya ei nimig him i? Noni ba nide simeda bitot yok lene bindei ba, yahagom inok dihyei ndung. Nide tibor nya bindei ba, inang bingwig noyam kin minta mui di bit houa.

³ Mpe dino noni jji nide siceu nya lene hi dima bigen ser nide puig bi. Noni mbut sindem bibor ba, nimig prioi mpam meng he.

⁴ Tou ribindei dino mun dini yok cut igkep tungwatu nya i? Tou ribindei ba, nibohon hagom bit leu nonti ningon kanti i? Da di tuhan dingat rin habiei ei nimbie him ba, midingat rin kikau ug bipek ningwig honti cem.

⁵ Timiei minu ting nya ingat diyai munti nya bou igyai him bittin tut ba, inghuisi mpig sut. Leu api yahagom idem yam ei ba, ittei yam kwei.

⁶ Yahagom impu yam ba, ibiwin kep yam ngonti.

⁷ Tukan biei biwin kep tukan mas ningonti ba, tukan nindigsi nya ibiwin kep yam ngonti. Ipai biyam ‘Ayai midyai dima nok igbit.’ Lene iba paku bipek kwar di ibon dima bitas bingkiem-kiau ei niyati.

⁸ Noro je di mben Israel e, jinok Ditde awak nya ba, didimig je ei nok Ditde limwa nya tug hon gi jintun Abraham di disut him.

⁹ Dibuwak je kwei leu minu nohon keti kin minu ting bibor ba, dipai bije ‘Jinok Ditde awak nya. Bit bon dikou sut yo di didimig yok ei su nya kan bi.’

¹⁰ Ma jittin au lewo dingat rin bit je. Ma jikrau jingon tut mun nyeng hi hi bu au lewo Dani ne jide Allah ri. Midisindem tut je bidimpu je cem ba, diba dinda di sindem bibor bibie tut je.

¹¹ Jingat i! Midihwen yo di ingon sibui sut je ba, itimek apino immai sut yonti. Midikes hukum nimai ei yo di ikon pran bit je dip ba, dicok tut yok ningwig a.

¹² Gino jinggok ser yo di isrep tut je mijingat yok bi. Yo di ikon pran bit je pima tini bu ne itimek bingwig bipror leu su.

¹³ Dani ne tuhan ba, dinok jide Allah ri. Disindem tut je ba, dipai dingkiem jeti gima rino ma jittin au lewo midimpu je.”

¹⁴ tuhan pai “Je di mben Israel e, mbro nok gino jimang bi ba, jinghuisi wei lo, ma jittin au. Lewo Da di tuhan midimpu je. Dani ne mben Israel ide Allah Di Kwes-Kwau ba, diteu je bijingwes ngun.

¹⁵ Jitou kep midibindei bijinok lat di sapi nya ikri di bon paku kin ninggwen nijep mang bibor ei nijou leu api midiba lat dima binging nungug nya kin nungug tou nya cem ba, dibidime kep hagom bisur yam cem.

¹⁶ Mijicig yok leu api ibit hou nimig lene hou sigau bindei ba, ipri didiei. Mpe dima lene jingon minggei-hi-nggei lewo Dani ne jide Allah ri. Mpe dima lene mijinggei sut Da lewo Dani ne mben Israel ide Allah ri.

¹⁷ Mpe dino Ditde limwa di indwau nya inggobiau sut minyei binggok ser lene Da di tuhan midibuhup ide nadi. Dinok mben Israel ide Allah. Dikes yok ei bihigom bi sren.

¹⁸ Midibindei ba, minyei nya biam bidem nungug tou nya di bon njung nghousi. Minyei bousi nya mibiam ei mbang briepti nya ba, iggum ndigsi miluei nitta binok igpong hanyen bu lene minyei bousi nya mibiam kwei leu ninggati.

¹⁹ Midita buom kin biei zaitun kin biei murad kin biei meng dia ei iggum ndigsi. Midibindei ba, biei eru kin berangan kin buom mehei ei mpia ngoisi.

²⁰ Mpe dino tungwatu nya ingat gini bou igyai him ne mijo nibreisi mem yok bipia Da di tuhan dipai tes hagom. Ingon dor niti leu api igyok ngon kep bipia mben Israel ide Allah Di Kwes-Kwau bibon mun dima yok hagom.”

tuhan pai kep kwar nya

²¹ tuhan di mben Israel ide nibou ndig pai bak kwar nya “Jisimbot dat jide munhyet ei nikei noho bei bijipai mun di jibisu tindei mun di srou je nya!

²² Jikwei ba, jimbot kep tut mun di mipek kep mem tungwatu nya ei nidipti bu leu binhyepo nikan tut nicunti. Ma jipai nisinati tut mun di pek kep mem tungwatu nipou su nya ei nikei noho bei bitut nisinati nya cem.

²³ Ma jipai igbit tut mun di mipek kep mem tungwatu nya ei nidipti bu leu binhyepo nikan mungkun tut bipia jeni ne kwar di nijit ri. Ma jibindei ba, mun di kei pek kep ba, mun di kinei micut igkep tungwatu nya leu binhyepo ninga leu sut.

²⁴ Nijit ne jenti kin jiyai munti nya bon ninyeng bi ba, diwok yo di ikuk yok bije.

²⁵ Didimig tungwagom di bong bei mpia nipriti ei su leu api dihig noni kwei leu mpia nijjai bikon pran. Noni mico kep nibou ndig nya noyam kin gi ico kep igkrop. Noni ne niba igtuyap bibon kep dibijig cig di co kep igtuyap ri.

²⁶ Jigom mbot kep tut mun dini yok nipou su e? Leu gi nok ne nice tut jihyet. Noro jigom tri tut mun dini yok bi ba, hi miap tut cem bi.

²⁷ Da di tuhan ditri tut nihyet di kei nimbie him bak Sion. Disok dihyet di kei ei no di mitri tut bak mben Yerusalem.

²⁸ Mpe dino diyok diyai kep kwar di ikuk yok bak nya lene bit bon hi pai nisinati tut bibuhup dihyet kan bi.

²⁹ Nijit ne kwar dima yok hagom bon ninyeng bi. Yahagom inok kwar di isindem bi di tungwatu nya ibon bou inda him. Yahagom inghuisi jet. Isindem mem gima ibon mun nyeng hi bi.”