YEREMIA 1 - ALLAH NIHYET MEM TUNGWATU NYA

tuhan nimbrap kep bit Yeremiati

¹ Srat dini pai sut Yeremia nihyet. Nicig rino Imam Hilkia di bong ei minu ndig Anatot ei hanjop Benyamin.

² tuhan mbrap bit Yeremia mem nijam di Yosia di Amon nipmot nok nibou ndig mem minu Yehuda ba, ninyeng tak kep limwa nya ei ari bingwam simnaibrimigningai su.

³ tuhan cuk noni mbirimang mem nijam di Yoyakim di Yosia nipmot ya luei nohoti nok nibou ndig kikau ug bipek nijam di Zedekia di Yosia nipmot nok nibou ndig mem ari bingwam simnaibrimiggom tu. Noro ide siceu nya ikat timiei minu ndig Yerusalem nya ug ei ingkiaisi mem bed nimuhwi ei ari bingwam nisimnaibrimiggom dima.

tuhan dimig Yeremia

⁴ tuhan pai bida,

⁵ “Nipou tirigi dipai tes na ei apmem ninghopti ba, noni srek tut na bigyo lene didimig na bidikon anyeng nok nabi mem mben dihyeisi dini hagom.”

⁶ Lene dibuhup “Na di tuhan Di Anyeng Jei Bibor e, diji nggan bi lewo dimahan bigyo.”

⁷ Noro tuhan buhup “Ma apai sut nanti bipia amahan bigyo nok au. Gino dipinak na ndam tungwatu nya lene ma ambut hak ug ba, atri tut nihyet di disok ei nani dip hagom biyok.

⁸ Ma attin tut yok au. Midingat rin bit na leu binhyepo dinyohou na. Da di tuhan disimbot dat tu!”

⁹ Gima ngwig lene tuhan su ninda bingget duhui ngkek lene pai bida “Ma amiap kep dihyet lene ma atri tut hagom hanyen bak tungwatu nya.

¹⁰ Njap di ammani dipinak na leu binhyepo aba ahyet buhun bisok kep mben dihyeisi dini kin ninyeng tak kep limwa nyati hagom. Aba ahyet buhun dima bisrep tut nibou ndig nya ba, abinggek tut inyeng di tak kep ide limwa nya bingwig cem. Abindei sar yok cem leu api awin minu jep ba, ayai miai cem.”

Yeremia ngat-hi-ngat bingat mun nyeng can

¹¹ tuhan hig ser da “Yeremia e, angat mindei i?” Dibuhup “Dingat biei badam ninda gom.”

¹² Lene Noni pai bida “Igbit ri. Ditou kep dihyeisi mu leu binhyepo dihyet di disok ei na dip mipek kep mem tungwatu nya.”

¹³ tuhan hig ser da mbigom kin bu “Angat mindei bu i?” Dibuhup “Dingat yeng di kiak ei nite bei mpia nijjai lo, mbigom kin bu ne yeng dima mitti ba, nirai com gau kwei ndam da.”

¹⁴ tuhan pai bida “Nirai dima bindo tut mun di buhun di mikwei leu nite bei mpia nijjai dima bindei sar timiei minu dini yahagom ri.

¹⁵ Midipinak ngkiai nya di ibong ei nite bei mpia nijjai nya yahagom kwei leu api inyeng mitak kep minu ndig Yerusalem. Yoni minggek ngug tig kin dimbou pmem nya ei minu ndig dini kin minu ndig nindigsi ei minu Yehuda hagom cem bingwig.

¹⁶ Midikes hukum ei Ditde limwa nya dip drek dip ide sisar. Yoni iba inghim bak Dani ba, ibon midut bak nung di ikuk yok bak cem ibon kwar bou inda him bikuk yok bak cem tu.

¹⁷ Yeremia e, ma atin ei! Aug ngat yok ba, atri tut dicuk nati nya hagom biyok. Ma attin tut yok au. Leu binhyepo dibindei ba, attin yok nindig bibor bu tirigi aya ei yoho bei bi.

^18-19 Amiap e! Timiei minu dini bitut nibou ndig nya kin yo di igya kui noni kin imam nya kin ide limwa nya mite tut nani. Noro njap di ammani dibindei ba, anok minu ndig di bon tentara nibousi kin cou nipmem ngkimom nitu kin ngug ngkimom-tembaga. Bit bon ibindei cut nani kan bi lewo midingat rin bit na bidiya srak ko hagau na cem. Da di tuhan disimbot dat tu.”