YEHEZKIEL 34 - ALLAH NIHYET MEM TUNGWATU NYA

Mben Israel ide gembala nya

¹ tuhan pai bida,

² “Na di tungwatu di ayaijo kikau bi e, ma apai kep nibou ndig minu Israel. Da di tuhan Di Dinyeng Jei Bibor disok dihyet ei na dip bak yo dima ba, apai ‘Je di gembala Israel nya e, mun di buhun bibor micut igkep je lewo jehek tut jenti noro jehek tut jide domba nya bi.

³ Jidut domba nido ngei lene jinap ninta nok sinsun mem jenti lene jibui gi hi di nimmau ndok nok mikwau cem noro jehek tut domba dima bi sren.

⁴ Jittei gi hi di inghuisi jet ei jinggibi dip bi. Jiyai obat bak gi hi di inggwen bi. Jingot kep gi hi di imig bok bi. Jinyohou jem gi hi di imbut ariwace bi. Jinggok ser gi hi di israwir cem bi. Noro jimbuk tut domba dima yok.

⁵ Domba dima yok intek lewo ibon ide gembala hi bi ba, israwir leu api mindhe-ndhe di niten-pos nya yaham yok bingwig.

⁶ Gima rino Ditde domba nya imbut-mbut wai apino israwir bidem nungug him kin mbigdip di jei bibor nya. Intek gimahap bidem dihyei nisurti-nipekti lewo gembala hi hek tut yok ba, nggok bram yok cem bi.

⁷ He, je di gembala e, ma jingig jitingou mem mun di Da di tuhan Di Dinyeng Jei Bibor dipai bije.

⁸ Deheng bitug hon Danti di Allah di diyaijo dinyeng bipia ma jiyok ngon kep dihyet! Mindhe-ndhe di niten-pos nya yaham domba nya ningwig lewo ibon ide gembala hi bi. Je di gembala jingkek ndok tut domba dima yok. Jehek tut jenti noro jehek tut jide domba nya bi.

⁹ Gima rino ma jingig jitingou mem dihyet.

¹⁰ Da di tuhan Di Dinyeng Jei Bibor dibon Danti bidinok jide siceu. Midiyai Ditde domba nya hanyen leu je bidisindui sut ba, jinok gembala mem yok bijehek tut jenti bibie bu bi sren. Miditeu Ditde domba nya ba, ingwes ngun leu jinda nsi ser nhyema jibui yok nok mikwau hanyen bu bi.’ ”

Gembala di joi bibor

¹¹ tuhan Di Ninyeng Jei Bibor pai “Dangkom midinggok ser Ditde domba nya leu api dehek tut yok,

¹² noyam kin gembala di hek tut nide domba nya di noni jem hanyen kwei leu israwir eisi. Midijem yok hanyen kwei leu minu di israwir eisi hagom mem njap di mmun ken nggai kep yok ei mpe di po icut bak ide siceu nya pima.

¹³ Miditeu yok bingwes ngun leu mben dihyeisi dini ikieti kin ingkiaisi nya ba, midimbus yahagom keyam lene dibuwak yok hanyen kwei ei itimieisi. Dijem yok hanyen kwei kep minyei nggram nya ei nungug him ei minu Israel. Midihyen kep yok ei abris nghousi di nnum kei.

¹⁴ Ningat ne miditin ei abris nghousi di nnum kei mem yok ei nungug him kin mbang briep nya ei minu Israel. Yoni mibong kep inghuisi ei minu dip dima biba ingon di jo nyahan biyem kep abris.

¹⁵ Midibon Danti bidinok gembala mem Ditde domba nya. Miditin ei mpia ttou nsi mem gima ibong kep inghuisi eisi. Da di tuhan Di Dinyeng Jei Bibor disimbot dat tu.

¹⁶ Midinggok ser gi hi di imbut ariwace. Dingot kep gi hi di ibok bidiyai obat bak gi hi di inggwen cem. Noro midibui gi hi di immau ndok kin imbut sindem hagom ba, imai bingwig lewo Dani ne gembala di nijoi bibor ri.

¹⁷ He Ditde domba jen, ma jingig jitingou mem dihyet. Da di tuhan Di Dinyeng Jei Bibor dipai bije bipia midigwam nok nikei mem bikwop jahagom leu api didimig gi hi di kei leu gi hi di kinei ikieti. Mididimig domba nya leu kambir nya ikieti.

¹⁸ Lewo jibou poi jingon cut hon gi jiyem kep abris di kei bibor he bi noro jico kep gi hi di jiyem bi ariwace kindi-kindok! Jidut minyei di pimbai kei he bi noro jico kep minyei di jidut bi bijibindei nghet!

¹⁹ Suar Ditde domba nindigsi nya igyem kep abris di jico kep bidut minyei di jibindei nghet.

²⁰ Gima rino je di jinok domba di jimmau ndok nya e, Da di tuhan Di Dinyeng Jei Bibor dipai bije bipia midigwam nok nikei ei domba di imbut sindem nya kin domba di inghuisi jet nya ikieti.

²¹ Jiba jibou nggai bidat yok ba, jirok gi hi di inghuisi jet nya ei jitta bigya ting leu domba nindigsi nya.

²² Noro miditeu Ditde domba nya bingwes ngun leu binhyepo hi ba nimbuk biyai yok bu bi. Midigwam nok nikei ei Ditde domba nya ikieti ba, didimig gi hi di kei leu gi hi di kinei nya.

²³ Midita nibou ndig gom di noyam kin Ditde awak di Daud ba, noni ne ide gembala gom ngat di hek tut yok ba, joi bibor ri.

²⁴ Da di tuhan midinok ide Allah lene nibou ndig gom di noyam kin Ditde awak di Daud ninyeng mitak kep yok. Da di tuhan disimbot dat tu.

²⁵ Midipreu ei mem yok bipia ibong kei igwam kei. Dijji mindhe-ndhe di niten-pos nya bingwig leu ide dihyei nisurti-nipekti leu binhyepo Ditde domba nya iba ingon di jo nyahan biya-ya nyen ei abris nghousi bibong kep inghuisi ei bahamti cem.

²⁶ Midinjei mun di kei bak yoni bidisindui sut ba, ibong ttai Ditde mbigdip di kwes-kwau. Tirigi isuar biget ne midibindei ba, mpia but mem yok ei minu dip dima.

²⁷ Ide biei kin beisi nya mingat ningat mang bibor leu api tungwatu nya yahagom mibong kei migwam kei bidem itimieisi. Tirigi dibindei ba, lante di ibiteu Ditde limwa nya hagom tun bingwig ba, diteu yok bingwes ngun leu yo di yuubon yok nok awak inda nsi lene mijo nibreisi mem yok bipia Dani ne tuhan ri.

²⁸ Ngkiai nya di ingon tindur nya mihwen yok bipos ndiyok bingwig leu yok lene mindhe-ndhe di niten-pos nya yaham yok bu bi sren. Lewo yahagom mibong kei migwam kei. Tungwatu nya mibindei bittin bibor bu bi sren.

²⁹ Midibindei ide beisi nya hagom nnum kei apino bed di biang ninggum mitau kep yok ba, mben ngkiai nya ingwes moom kep yok bu bi sren.

³⁰ Tungwatu dihyeisi dini hagom mikan tut bipia mben Israel ne Ditde limwa nya rin ba, diya srak ko hagau yok. Da di tuhan Di Dinyeng Jei Bibor disimbot dat tu.

³¹ Jit-jit! Jeni ne Ditde domba nya rin bidihyen kep je. Jinok Ditde limwa nya. Da di tuhan Di Dinyeng Jei Bibor disimbot dat tu.”