YEHEZKIEL 33 - ALLAH NIHYET MEM TUNGWATU NYA

Allah ta Yehezkiel binok no di ya ser mben Israel

¹ tuhan pai bida hanyen bu,

² “Na di tungwatu di ayaijo kikau bi e, ma atri tut mun di micut igkep ade limwa nya tirigi dibindei ba, ide siceu nya ikon pran bit yok. Timiei minu dima indo tungwagom leu ikieti bita noni nok no di ya ser ide siceu nya ikweisi.

³ Gino no dima ngat lo, siceu nya imbris nyahan ba, idideu kwei su lene bui brem-brem bitto nide limwa nya tut mun di micut igkep yok leu binhyepo yahagom itindei ser ide siceu nya.

⁴ Tungwa tou rino miap brem-brem di nibimbi bong di bitto limwa nya tut mun di micut igkep yok bitindei ser bi apino siceu nya ikwei hwen noni bimai ne nonti mibiang nitunggweisi dima nibuhunti.

⁵ Suar noni buhup hanyen tut nimaisi lewo ningkek ndok tut brem-brem di nimbimbi bong. Ne gino nitingou dile tut brem-brem nibimbi di bitto yok tut mun di buhun dima ne ningwes ngun.

⁶ Ne gino no di ya ser ngat siceu nya di idideu kwei su noro bui brem-brem di bitto tut siceu nya ikweisi bi leu api ikwei hwen yo di ibon sisar ne suar no di ya ser buhup hanyen biDa tut yahagom imaisi.

⁷ Na di tungwatu di ayaijo kikau bi e, dita nani ba, anok no di ya ser mben Israel ide siceu nya ikweisi. Ma atri tut mun di disok ei na dip dini biyok.

⁸ Gino ditri tut bipia no di mbuk mitug midut noro asok kep noni leu binhyepo luei ningonti tut niyai munti nya leu binhyepo ningwes ngun bi ne noni mimai ei nide sisarti noro suar abuhup hanyen biDa tut nimaisi.

⁹ Ne gino asok kep no di mbuk dima tu noro noni kes hon bi ba, bon sisar kikau lene noni mitug midut noro suar abuhup hanyen tut noni bi ba, angwes ngun.”

Suar tungwagom-gom biang nide niyai munti nibuhunti

¹⁰ tuhan pai bida “Na di tungwatu di ayaijo kikau bi e, ma andat kep mben Israel ighyet dini hanyen biyok “Nyeni inghuisi jet drek dip ide sisar kin mun di igyai tunggwei nya di buhun tak nye. Notou nyeni inyohou igyaisi i?”

¹¹ Ma apai biyok bipia deheng bitug hon Danti di tuhan Di Dinyeng Jei Bibor cem Allah di niyaijo cem dinyeng bipia dingon kei drek dip no di mbuk nitug midutti bi. Noro dijoi sut gino noni ttin ser nide sisar leu binhyepo hek tut niyaisi. Je di mben Israel e, ma jimbres jenti leu sisar hagom. Nggon rino jingon llei sut gi jitug ndei nimai i?

¹² Na di tungwatu di ayaijo kikau bi e, ma apai bak mben Israel bipia gino no di niyaijo kei bibor bon sisar ne bit bon niyai munti di kei bibor nya teu noni leu sisar kan bi. Gino no di mbuk mbres nonti leu sisar ne no dima mitug ndei hukum bi. Gino no di niyaijo kei bibor ngkwei hanyen kep sisar ne bit bon no dima ningwes ngun kan bi.

¹³ Gino dipreu ei mem no di niyaijo kei bibor bipia miditeu noni ba, ningwes ngun leu hukum lo, noni sindi bon kep sisar hanyen bu bikan ei ningonti bipia niyai munti di kei di nipou nya nok gi dem mem gima bindei ba, ningwes ngun leu hukum lene no dima ningon kiowi niti nindig bibor. Midiyok ngon kep niyai munti di kei bibor nya bu bi. Leu api noni mitug ndei nimai drek dip nide sisar nya.

¹⁴ Gino disok kep no di mbuk bipia jei bi ne noni mitug ndei nimai apino noni mbres nonti leu sisar biyai kep mun di kei bibor kin mun di igbit,

¹⁵ bitut gi tug mun di bindo hanyen bak no di dahat ningwam leu noni ba, tug mun di noni nggimang hanyen bak niceu bibon sisar bu bi noro bit niggai serti di bie ndam niyaijo di kei bibor ne no dima mitug ndei nimai bi.

¹⁶ Midiyok ngon kep nide sisar di noni bon kep dima bu bi leu api noni mehek tut niyaisi lewo niyai munti nya dima kei bibor ba, igbit cem.

¹⁷ Noro limwa dima yok ipai bipia diyai munti nya igbit bi! Ningat ne yoni rino igyai munti nya igbit bi a.

¹⁸ Dindat kep mbigom kin bu bipia gino no di ningon sren kes hon bibon kep mun di kei bibor bu bi noro sindi bon kep sisar hanyen lene noni mitug ndei nimai drek dip.

¹⁹ Gino no di mbuk mbres nonti leu sisar biyai kep niyai munti di kei bibor nya kin mun di igbit lene no dima hek tut niyaisi.

²⁰ Mbro nok gima lo, mben Israel ipai bipia diyai munti dima yok igbit bi! Dipai mun di mungkun bipia midigwam nok nikei di kos tut bikwop yo dima yahagom igyai munti nya.”

Nibimbiti tut minu ndig Yerusalem nicut bak mben Babelti

²¹ Ug ei hon njap nimuhwi ei bed nisimnai mem ari bingwam nisimnaibrimigcan mem nijam di nibong ei ningkiaisi ne no di ningwes ngun leu minu ndig Yerusalem kwei pai bida bipia minu ndig dima cut tu.

²² Mmunti nipou tirigi noni kwei krau bigyo ne tuhan ningat rin bit da ba, Nide nisindemti pijuk dingonti. Gima rino tirigi no dima kwei krau mem njap di hyep bu rino tuhan bindei ba, diji nggan bidimbrap hanyen bu.

Mben Israel igyai munti di mbuk bibor nya

²³ tuhan pai bida,

²⁴ “Na di tungwatu di ayaijo kikau bi e, mben Israel nindigsi di ibong ser itimieisi isimbot kep biyam bipai ‘Abraham nyeng tut minu dini nisurti-nipekti noro noni ne tungwagom ngat he ri. Tini bu ne nimang bibor tu. Gima rino suar nyeni niyai dihyei dini nok dihyei ninda rom.’ ”

²⁵ Da di tuhan Di Dinyeng Jei Bibor disok dihyet ei na dip bak yo dima, “Jiyem mikwau di ninggrom huisi cem jikuk je bak kwar nya cem jihwen mun cem kikau. Nggon rino jikan bipia dihyei dini nok jide dihyei ninda rom i?

²⁶ Jiba jingon com jide simeda bijiyai munti nya hagom mpiei bibor ba, jicut tut hiter nitnem cem kikau. Nggon rino jikan bigya dihyei dini ne jide dihyei ninda rom i?

²⁷ Deheng bitug hon Danti di Allah di diyaijo kin tuhan Di Dinyeng Jei Bibor cem dinyeng bipia yo di ibong ser itimieisi di timek bingwig su dima mitug midut. Mindhe-ndhe di niten-pos nya miyaham yo di ibong ei mpia nintiti ba, nsuwer ajar mihwen yo di iku yok nyahan bibong ei nungug him kin hak mihyeti nya.

²⁸ Midibindei ba, itimieisi dima noyam kin iggum ndigsi kin ha ngunti leu api ide nisindemti di ingon jei sut mingwig hon nohonti. Nungug him ei minu Israel minok baham nitindurti di mpia mbum-bra apino bit bon hi tin puig di bikwam ug eisi bu kan bi.

²⁹ Mpe dino dikes hukum ei yo dima dip drek dip ide sisar lene dibindei ba, itimieisi nok iggum ndigsi kin ha ngunti cem ne mijo nibreisi mem yok bipia Dani ne tuhan ri.”

Nabi nihyet rinok bu tan mem mben Israel

³⁰ tuhan pai “Na di tungwatu di ayaijo kikau bi e, tirigi ade limwa nya induk yam dideu ngug tig nya kin ide dimbou hui nya bikkin dat anghapti biyam ne icuk yam bipai ‘Ma induk yam biyuug miap kep tuhan nicuk nyeti mem njap di ammani.’

³¹ Induk yam bingwig ttai na ba, intu kep ahyet noro ibit acuk yokti nya bi. Iba ighyet di mmau bibuhup ahyet noro idrui bou ngwak ba, ikan-kan nyen tut mun di kei mem yonti he idrui bou ngwak kikau.

³² Ibibon na noyam kin no di pai doia bikiek yo di impig bou keyam kin no di kek nggong mbrei he. Intu kep ahyet hagom noro ibit bi sren.

³³ Nihyet di tibim ei ahui him hagom mipek kep mem yok. Tirigi tto bou dima dem ne mijo nibreisi mem yok bipia nabi gom ngat no srig ikieti.”