YEHEZKIEL 31 - ALLAH NIHYET MEM TUNGWATU NYA

Iba minu Mesir bibingon nok buom minu Libanon

¹ Nijam di nibong ei ningkiaisi dima ug ei njap gi nigom mem bed gi niningai ei ari bingwam gi nisimnaibrimiggom lene tuhan pai bida,

² “Na di tungwatu di ayaijo kikau bi e, ma atri tut Ditde nisokti dini bak nibou ndig minu Mesir kin nide limwa nya yahagom bipia, Nani ne ndigpoi ndig di mipbor ngat nijit ri! Hi di noyam kin nani bi!

³ Adem kep buom minu Libanon di nddong kei bimpung tut ninda di tti tut nimeng di nggrou kei ba, kei bibor kei cem. Ninjem sren kei ba, ninggrupti di sren kei dima kui sur bumbuhui nijunti.

⁴ Minyei dem apino buom dima hei bijei a. Minyei di jo dihyei jou yai njita bak biprok nigau nya hagom lene biam bindei ninjem nindigsi nya cem bindot.

⁵ Minyei di pingge leu bi dima bindei ba, buom dima hei kin gi nnum ba, ninda nindig ngat ba, jei cem. Noni rino jei ndig bibor bidor njiriek biei bigbehei nya hagom.

⁶ Ha nya ninyeng hagom itot yaham ei ninda nyati. Mindhe-ndhe di hek nya ibep imien nya ei ninda behei a. Ngkiai nya di igya bidem dihyeisi dini hagom igwam kep inghuisi ei nibehei di bon nohousi a.

⁷ Imian huk buom dima lene ingat lo, kei bibor kei. Ninjem sren kei ba, ninda nya jei ndig cem. Nigau tibim dihyeiti nimo jug buug ninno ba, ug krau minyei bousi di jo dihyei jou.

⁸ Dem mem gima ibinai buom ngot di hei ei Allah de miai Eden kin noni bi. Buom di kui sur noni kin biei di ninda jei ndig nok noni hi bi. Jit, biei di kei bibor kei nok noni hi hei ei Allah de miai bi.

⁹ Dani rino dibindei di kei bibor kei di bitut ninda nya di jei ndig ngat di nimeng nggrou kei dima. Biei ninyeng hi di hei ei Allah de miai mitou ngohousi kin biei nghousi ibou dut ser noni.

¹⁰ Gima rino tuhan Di Ninyeng Jei Bibor pai bije tut mun di mipek kep mem biei di kui ninno di ninggrupti kui sur bumbuhui dima. Nijeisi kum eisi bibindei ba, nikon nonti cem bikum eisi,

¹¹ apino dirok noni ei bidikes noni bak nibou ndig ngkiai gom di mibibon noni drek dip niyai munti di kinei bibor a.

¹² Tentara ngkiai di yoom ingonti kan bi miwim noni leu api indig kep hum a. Ninda di dahat micut bipang yam dip bidem nungug dip nya kin mbang briep nya ei minu dima. Ngkiai nya di ibong nibehei yahagom minang ningwig leu ba, ibikes noni hak ei.

¹³ Ha nya mikwei teu ei biei di tti tu dimati ba, mindhe-ndhe di yehek nya mikwei co kep ninda nya nyen-nyen.

¹⁴ Gima yok hagom pek kep leu binhyepo hon kep ammani kui lene biei hi mehei bijei ndig nok gima bu bi. Mbro nok gino biei hi um minyei mang-mang lo, ninggrupti kui kikau bikimbas ei bumbuhui nijunti nok gima hi bu bi. Hagom mimui noyam kin tungwatu di niyaijo kikau bi di ibicom yam bit yo di ijuk ug ei minu nimai nya ide tu.”

¹⁵ tuhan Di Ninyeng Jei Bibor pai “Mpe dino biei dima juk ug ei minu nimai nya ide lene midibindei ba, minyei di jo dihyei jou biam buut kep noni ba, bindo tut ningon nggukti. Midijung ser minyei nimig bidisien kep ser minyei pmot nya. Midikes nidinditi binggai kep nungug him ei minu Libanon nya hagom lewo biei dima mui bitti lene bindei ba, biei bigbehei nya hagom nimeng mbris ningwig a.

¹⁶ Mpe dino dicom biei dima ug ei minu nimai nya ide lene nitti ug ei dihyeisi nibimbiti biyai mben nya bingon ttin bibor. Biei ei miai Eden kin biei di kei bibor kei ei minu Libanon di minyei bindei ba, nggrou kei nya hagom di ijuk ug ei minu di jo dihyei jou ngat nipou su nya ingon kei sut biei dima nittiti.

¹⁷ Yoni minjei bit ug ei minu nimai nya ide ba, ibicom yam bit biei di tti bicut nipou su nya. Lene yo di nipou yo igwam coi biei behei dima yahagom intek gimahap bibong ei mben ngkiai nya ikieti.

¹⁸ Biei dima bindo tut nibou ndig minu Mesir bitut nide limwa nya. Biei di hei ei miai Eden hi gi jei bibor ba, kei-kau nok biei dima bi. Noro tini bu ne biei dima juk ug ei minu nimai nya ide noyam kin biei Eden nya bibicom yam bit yo di ikan tut Allah bi kin yo di ikrop ei pranti nya. Da di tuhan Di Dinyeng Jei Bibor disimbot dat tu.”