YEHEZKIEL 30 - ALLAH NIHYET MEM TUNGWATU NYA

tuhan mikes hukum ei mben Mesir dip

¹ tuhan mbrap bu bipai,

² “Na di tungwatu di ayaijo kikau bi e, ma atri tut ahyet ba, abipai bak mben Mesir tut mun di Da di tuhan Di Dinyeng Jei dipai biyok nya.

³ Ma aba nihyet dini bahara ba, abibwos-bwos nyen cem bipia, Ayo! tuhan de njap dideu kwei su o! Noni miyai nibou tut haninyai ug rin o! Njap dima dindi ba, wer bumbuhui ningkom ei nituti di ngkiai nya mitug ndei hukum o!

⁴ Mun di buhun di nindig micut igkep minu Sudan o! Pran micut ei minu Mesir o! Nimbiam ngut mikrop ei yam dip ba, siceu nya mipos ndigban bidem minu leu lene minu dima miwer ig kum kroi o!

⁵ Tentara ningot kep yokti nya di leu minu Sudan kin Lidia kin Libia kin Arab kin Kub kin Ditde mben nya mitug ndei nimai ei pranti dima ug ri o.”

⁶ tuhan Di Ninyeng Jei Bibor pai “Mben Mesir ide tentara ningot kep yokti nya yahagom mikrop ei pranti ei minu ndig Migdol ei nite bei mpia nijjai kikau ug ei minu ndig Aswan ei nite bei mpia nibiho. Tentara Mesir di ikon yonti mitimek sinsiou ningwig a. Da di tuhan Di Dinyeng Jei Bibor disimbot dat tu.

⁷ Minu dima minok minu di mpia mbum-bra bram dor njiriek minu nindigsi nya ba, minu ndig nya hagom miwer ig kum kroi hak.

⁸ Mpe dino dindig minu Mesir ba, dibiyai nimai bak nide tentara ningot kep yokti nya yahagom lene ikan tut bipia Dani ne tuhan ri.

⁹ Mpe di njap dima dem ba, minu Mesir timek tu lene midipinak tungwatu nya di ibri kibar minyei nya mem gima yuug bigyai mben Sudan ingon di digit biyok lewo ikan tut minu Mesir nicutti bi. Ba, gima mibindei ba, igwam nittinti. Ningat ne njap dima dideu su!”

¹⁰ tuhan Di Ninyeng Jei Bibor pai “Midiba Nibou Ndig Nebukadnezar leu minu Babel bindei timek ndigban di mben Mesir inyeng tut nya hagom.

¹¹ Nebukadnezar kin nide tentara di ikan tut noom ningon tut tungwatuti kan bi dima mikwei ba, ibindei timek minu dima. Yoni iba singau simeda bihwen mben Mesir leu api nimbiam ngut mikrop sinsiou ei minu dima.

¹² Midibindei pingge Minyei Pmem Nil leu api midikes mben Mesir yahagom ei yo di isibut nya indati. Ngkiai nya migya kep minu dima titut yam bisar. Da di tuhan disimbot dat tu.”

¹³ tuhan Di Ninyeng jei Bibor pai “Midiya kep kwar nya kin mun di yo dima ikuk yok bak ei minu ndig Memfis bitimek ningwig a. Minu Mesir mibon nibou ndig di ninyeng tak kep yok bu bi sren. Dibindei ba, timiei minu Mesir nya yahagom ittin bibor.

¹⁴ Dibindei minu Mesir ei nite bei mpia nibiho ba, mpia mbum-bra bram. Midindig minu ndig Soan ei nite bei mpia nijjai bidibikes hukum ei minu ndig pmem Tebe dima cem dip.

¹⁵ Midibindei sar nide mun di nyeng tut nya hagom bidikes Ditde nigga biborti ei Pelusium di minu Mesir de tentara nibousi di igya coi di ngkiem kei dima dip ba,

¹⁶ mpia dima miyai ninghuisi wei nindig bibor. Ningat ne midindig minu Mesir ningwig a. Ngug tig di bikrop ttai minu ndig Tebe milus lene minyei di su mihwen minu ndig dima.

¹⁷ Pinai pilei ei minu ndig Heliopolis kin Bubastis nya mikrop ei pranti leu api siceu nya mikat timiei sop nya nok awak biyuug sut yok.

¹⁸ Ei nituti dima lene dibicut minu Mesir ninyeng di jei ningwigsi ba, dibiyai nide nisindemti di ningon jei sut leu lene nidinditi minggai kep minu ndig Tahpanhes. Siceu nya mikat timiei sop nya nok awak biyuug sut.

¹⁹ Dikes hukum dima ei minu Mesir dip lene ikan tut bipia Dani ne tuhan ri.”

Minu Mesir ninyeng jeisi ngwig hon

²⁰ Nijam di nibong ei ningkiaisi dima ug ei njap gi nimuhwindacan mem bed gi nigom ei ari bingwam gi nisimnaibrimiggom tu lene tuhan pai bida,

²¹ “Na di tungwatu di ayaijo kikau bi e, didahat nibou ndig minu Mesir ninda pang tu ba, hi di ngot kep ninda pang di dahat dima cem hi di prioi kep nidahati cem bibindei ba, kei hanyen bisindem mem gima mem ninghat tut singau simeda cem ningat rin bi.

²² Da di tuhan Di Dinyeng Jei Bibor dipai bipia nibou ndig minu Mesir de nitok riDani. Mididahat ninda pang hacem. Didahat ninda pang di sindem yo kin gi hi di dahat tu cem. Leu api singau simeda dima micut leu ninda hak.

²³ Midibindei ntek mben Mesir ba, intek gimahap bibong-bong nyen bidem dihyeisi dini hagom.

²⁴ Leu api midibindei sindem nibou ndig minu Babel ninda pang leu api midikes Ditde singau simeda ei nindati. Noro mididahat nibou ndig minu Mesir ninda pang nya leu api noni mahara nidut-niwei bimai ei nide nitok di nibou ndig minu Babel noho bei.

²⁵ Midibindei nibou ndig minu Mesir ba, ninghuisi jet-jop noro diyai nisindemti bak nibou ndig minu Babel. Mpe dino diyai Ditde singau simeda binoni bisrer bisu ndam minu Mesir lene yoni mikan tut bipia Dani ne tuhan ri.

²⁶ Midibindei mben Mesir bintek gimahap bidem dihyeisi dini nisurti-nipekti. Leu api yoni mikan tut bipia Dani ne tuhan ri.”