YEHEZKIEL 28 - ALLAH NIHYET MEM TUNGWATU NYA

Nimbot kepti tut nibou ndig Tirus

¹ Lene tuhan pai bida,

² “Na di tungwatu di ayaijo kikau bi e, ma atri tut mun di Da di tuhan Di Dinyeng Jei Bibor dipai bak nibou ndig Tirus bipia aba angon di jei bikon nanti ba, agwam ei banggo mbrei dip ei muk ningwa dip leu api ade limwa nya ikuk yok bina. Abon nanti nok no di ikuk yok bak ug lo, ma ayok ngon kep bipia nani ne tungwatu nitu he ri.

³ Akan bipia angon ki dor njiriek Danel apino mimun hi di jo nding leu nani bi ug a.

⁴ Aba ade ningon di ki kin ningon di huk niti bimbus ndigban kin mas kin perak keyam ba, anyeng bibor.

⁵ Jo nibreisi bipia ade ningon ki tut nitri-nipek munti bindei ba, njap di ammani ne anyeng bibor. Ba, mun di anyeng bibor tut dima bindei ba, angon jei ba, akon nanti cem!”

⁶ tuhan Di Ninyeng Jei Bibor pai, “Nibou ndig Tirus e, akon nanti noyam kin Allah.

⁷ Gima rino midipinak tentara ngkiai di iten-pos nya kwei mem gima ihwen na. Yoni mibindei timek ade nikei-kausi nya di atug ndei tug hon ade ningon kiti kin ade ningon di huk niti hagom bingwig leu na.

⁸ Tentara dima migyai nimai bina lene ibitig angut ug ei muk jou.

⁹ Tto bou dima dem ne mpaba apai sut nanti bipia nani ne Allah rin e? Noro yo di ikwei yai nimai bina mingat bou igyai him bipia nani lene tungwatu nitu he ri.

¹⁰ Tungwatu di ikan tut Allah bi nya migyai nimai bina ba, amaisi dima noyam kin yo di ibon inyeng bi nya imaisi. Da di tuhan Di Dinyeng Jei Bibor disimbot dat tu.”

Nibou ndig minu ndig Tirus nicutti

¹¹ tuhan pai bu bida,

¹² “Na di tungwatu di ayaijo kikau bi e, ma apim nggruet tut nibou ndig Tirus. Ma apai sut mun di Da di tuhan Di Dinyeng Jei Bibor dipai sut noni bipia nipou pini jug ne abon nanti nok bindo tug hon ade nikei-kau-keisi. Nipou yo ne angon ki bibor ba, awer ubbu ngat cem!

¹³ Ba, abong ei Allah de miai Eden. Aba tig permata ninyeng hagom bimau sinsun ade ba, tig permata dima rino tig delima kin tig intan kin tig topas kin tig pirus kin tig yakut kin tig ratna kin tig cempaka kin tig nilam kin tig zamrud kin tig alkali ningwoi cem. Aba mas cem mang-mang bimau nanti. Ndigban dima yok jo nijoti mem na mpe di dipai tes nani.

¹⁴ Dikes malaikati di bibon ninggap leusi kui na mem gima ya ser na. Agwam ei Ditde nungug dip di kwes ba, ambut ei tig permata di jimjit kei ikieti.

¹⁵ Ade nibon munti kei-kau-kei habiei leu mpe di dipai tes na ug bipek mpe di acut ei nibon mun di kineisi.

¹⁶ Abou ngwak sibui sut nitri-nibipek mun apino gima bindei ade nimbuk biborti kin nibon sisarti ug a. Apino dicom na leu Ditde nungug di kwes ba, malaikati di ya ser na jji na leu mpia di tig permata di jimjit kei dima joti a.

¹⁷ Aimaisi di ubbu ngat dima bindei ba, angon jei. Anyeng jeisi bindei ba, aba angon di mbum bibon mun. Gima rino dinjei na ug ei dihyeisi. Dibindei ba, anok bindo di bipingok nibou ndig nindigsi nya ingonti leu binhyepo ibiyok ngon kep.”

¹⁸ tuhan pai, “Minu ndig Tirus e, abindei bimap kui ade mpia di akuk na bak kwar eisi nya tug hon ade nitunggweisi kin niyem hiter nimuhupti mpe di atri-apek mun. Gima rino dindig na ba, ajjem ug ei dihyeisi. Yo di icap na yahagom ingat lo, nani ne atriem ndung he ri.

¹⁹ Apror bihigom bijo ninno bijo kikau. Mben nindigsi di ikan tut na idigit bittin tut leu ma yoni cem mitug ndei hukum noyam kin nani.”

Nimbot kepti tut hukum di micut igkep mben Sidon

²⁰ Lene tuhan pai bida,

²¹ “Na di tungwatu di ayaijo kikau bi e, ma asigion minu ndig Sidon.

²² Atri tut bak timiei nya bipia Da di tuhan Di Dinyeng Jei Bibor dipai ‘Minu ndig Sidon e, Da dini ne ade nitok ri. Tungwatu nya mikon dinyeng tug hon Ditde niyai nibou tut nati. Mpe dino dikes hukum ei ade timiei nya dip ne ikan tut bipia Dani ne tuhan di Kwes-Kwau ri.

²³ Midibindei ba, nsuwer ajar hwen na ba, nimbiam nggrom biam bidem ade simpak nya. Ade nitok nya leu nima kwei-nima kwei mihwen na bigyai nimai bak ade timiei nya. Leu api akan tut bipia Dani ne tuhan ri.’ ”

tuhan minjei mun di kei bak Israel

²⁴ tuhan pai “Minu ngkiai di gahai Israel di ighyet wer mpiahi tut yok idem kep ndia nggwen di biyai nidut bak Israel bu bi. Minu dima yok ingon huk niti bipia Dani ne tuhan Di Ninyeng Jei ri.”

²⁵ tuhan Di Ninyeng Jei Bibor pai “Midinduk mben Israel kwei leu minu ting di dibindei ntek gimahap yok ug eisi nya ba, diba yok bicom yam hanyen. Apino ngkiai nya yahagom mikan tut bipia dikwes-kwau. Mben Israel mibong ei idihyei po diyai bak Ditde awak Yakub pima.

²⁶ Yoni mibong kei migwam kei ei minu dima bingot ide ig nya ba, ibiyai ide miai ba anggur nghousi nya cem. Midikes hukum ei yo di ngkiai di ibong ttai yok di ighyet wer mpiahi tut yok nya yahagom dip. Leu api mben Israel mibong nyahan ba, mun hi binggek yok bi. Mpe dima lene ikan tut bipia Dani ne ide tuhan Allah ri.”