YAKOBUS 5 - ALLAH NIHYET MEM TUNGWATU NYA

Yakobus sok kep yo di inyeng nya

¹ Disut bat je di jinyeng bibor e, ma jingig jitingou mem ditde nipingok jeti ug e. Ma jiyai nggwei kibor ba, jipim nggruet cem tut mun di buhun bibor di micut igkep je hak ei nidipti bu!

² Jide ndigban di jinyeng tut nya hagom mpiei ba, cipo kkin jide sinsun nya cem tu.

³ Prap yem jide mas kin perak di jinju kok yam ei hagom. Prap dima ne mun di bindo tut jidrui bou ngwakti kin jingon di mui ei njap ningwig honti rin ba, yem jinghuisi noyam kin hum di yem tungwatu nya.

⁴ Jitak kep awak di igyai miai nya imuhup leu yok bijiyem imuhup bingwig su. Suar jintu kep mun di yoni inso je tut! Jide awak di igyai njita kwei leu beisi nya ighyet tibim kikau ug ei Allah Di Sindem Bibor nitingou nsi tu.

⁵ Jibong kei jigwam kei ei dihyeisi dini ba, jiba joho rok mun di jingat jingwes eisi. Gima tereu nok jibindei mmau jenti bijimmau ndok ei mem njap dino ibui je dem kep nok ibui mikwau.

⁶ Jijem nimai gau yo di ingon ngun nya bijihwen yok lo, igyai mun tunggwei bihwen bit je bi.

Ningginausi tut nibet ningon kin ningat nadi

⁷ Gima rino disut bat jen, ma jibet jingon mem Tuhan nikwei hanyenti. Dem kep nok no di ndim ningan di bet ningon kikau ba, njita len kep. Noni bet ningon mem bed di biang mpia di but kwei kin bed di biang bigeda.

⁸ Ma jeni cem jibet jingon ba, jingon nddong cem lewo Tuhan nikwei hanyenti dideu su.

⁹ He disut bat jen, ma jinso yam bijinjei kep yam nyen-nyen au leu binhyepo Allah kes hukum ei je dip bi. Lewo Nikei dima ttau ei dimbou heisi kwei su.

¹⁰ Disut bat jen, ma jiyok ngon kep nabi nya di itri tut Allah nihyet di ingon jo nyahan tut yo di ihwen bit yok nya. Ba, yoni indo bindo di kei bibor binye tug hon nisinati dima.

¹¹ Ipai sut yok bipia ingon nggei-hi-nggei lewo ingon jo nyahan tut yo di ihwen bit yok. Jikan tut Ayub di ningon jo nyahan leu api Allah njei mun di kei bak noni drek dip ug e. Lewo Allah ngondut nye nindig bibor bisingat tut nye di tungwatu.

¹² He disut bat jen, ma jiba gwamti kin dihyeisi dini kin mun nyeng hi kin bu beheng au. Gini ne nicukti di ya bibie mem nindigsi nya ri. Gino jice lene ma jipai “I!” hak. Gino jisrep lene ma jipai “Bi!” hak. Tug hon nisinati dima ne Allah mikes hukum ei je dip bi.

¹³ Gino jigom ningon buhun lene ma noni ngat nadi. Gino jigom ningon llei lene ma noni pai doia binggei sut Allah.

¹⁴ Gino jigom nggwen lene ma noni hig nibou mbusyamei nya kwei leu binhyepo ingat nadi tindei noni. Leu api itin ampou tut mini bibidip noni tug hon Tuhan ninyenga.

¹⁵ Ide nadi di ingat tug hon niba ningon com Yesus Kristusti mibindei ba, no di nggwen miyai ningkek ngun eisi. Allah misindem tut noni bikei hanyen bikos ser sisar di bon nya.

¹⁶ Gima rino ma jipai jit jide sisar brei biyam leu api jingat nadi tindei yam leu binhyepo Allah bindei ba, jikei hanyen. Nadi di tibim ei no di ningon sren nuhui him sindem bibor.

¹⁷ Bingon leu nok Nabi Elia di tungwatu noyam kin nyeni. Noro ta nibou ei naditi ser nhyema mpia but bi leu api mpia but bi kikau mem nijam ari bingwam ningai biniken.

¹⁸ Mpe hi bu lene noni ngat nadi leu api mpia but mbras ba, njita kioi hei hanyen bu.

¹⁹ He disut bat jen, gino tungwagom ngkwei hanyen leu puig di nijit lene hiter brim noni kwei ei puig di nijitti hanyen,

²⁰ lene ma jiyok ngon kep bipia no di brim no di srawir leu puig di kinei biteu noni leu nimai eisi bindei ba, Allah kos ser nide sisar di mang bibor dima tu. Nipigo leu dani, Yakobus