TIMOTIUS GI NIGOM 6 - ALLAH NIHYET MEM TUNGWATU NYA

¹ Suar awak di ingon jo kep nya ibou cut bak iceu bat nya bikon inyenga leu binhyepo ibindei ba, Allah ninyeng kin side niba ningon com Kristusti di sitri tut kinei bi.

² Awak nya di igyai midyai mem iceu bat di ingon jo kep nya lene ma ingwes pri gau iceu bat nya drek dip gi inok yo di Kresten au. Noro ma iba ijoi biborti di dor njiriek bu biyai midyai mem iceu bat nya lewo yoni ne yo di ingon jo kep nya rin ba, ide awak nya ingon ngakei yok. Suar angginau yo di mbusyamei nya ba, asok kep yok tut nipingokti.

Ningginausi tut nihyet di nitrowai kin niba noho rok mitieisi

³ Gino tungwagom nipingok yokti titer bu ba, ce tut bibit nihyet di nijit tut ide Tuhan Yesus Kristus kin ide niba ningon com Kristusti cem bi ne,

⁴ no dima ningon jei ba, ningon mbum cem! Noni mibimbeu sut gima liriem tungwatu nya tut mun di bon ninyeng bi. Ba, gini bindei ba, tungwatu nya ingon kinei sut yam cem ibroi leu yam cem irom ighyet kui yam cem iba ingon kan yam cem,

⁵ isibui ighyet ei yamti kikau buug hon nohonti bi cem. Yo dini intin kiek bikrau kep nihyet di nijit bu bi. Ikan bipia gino iba ingon com Kristus lene gima bindei ba, inyeng bibor.

⁶ Ningat ne niba ningon com Kristusti bindei ba, bihi inyeng bibor gino ingon cut hon mun di jo biyok.

⁷ Lewo ipwoi mun nyeng hi kwei ei dihyeisi dini bi ba, bit bon ipwoi mun nyeng hi biyuug sut leu dihyeisi dini cem kan bi.

⁸ Gima rino mun di jo mem nye nok njita di igyem kin sinsun di ijuk lene gima dem.

⁹ Lewo yo di ibisau sut ninyeng biborti ibiam bon di srou yok. Ba, bon dima ribindei dino iba yoho rok mun di bon ninyeng bi kin mun di binggek yok cem ba, gima hagom ngot kep yok lene bindei timek yok bingwig hak.

¹⁰ Lewo niba noho rok mitieisi rinok nibousi mem sisar ninyeng hagom. Tungwatu nya ibou poi di iba yoho rok mitiei ikes hon ba, ingon jo kep bu bi lene ibimangkrei ingonti ba, israwir tu.

Ningginausi nya mem Timotius nonti

¹¹ He na di Allah de awak e, ma ambres nanti leu mun pima yok hagom. Ma ahuk bram ningon srenti kin niyai munti bit leu Allah ningon kanti kin niba ningon com Kristusti kin ningon ngakei tungwatu nyati kin ningon nddongti kin ningon jo nyahanti.

¹² Suar ador sindem bibor kak puig tug hon ade niba ningon com Kristusti kikau ug bipek nipekti leu binhyepo ayai niyaijo nijep di jo kikau. Lewo Allah hig na mem gima ador sindem kak puig dima nipou tirigi atri tut ei yo di imang bibor yoho bei bipia angon jo kep Kristus.

¹³ Disok dihyet mem na ei Allah di yai niyaijo bak Nide nipai testi nya hagom niyai him kin Kristus Yesus di tri tut Nide niba ningon comti ei Pontius Pilatus noho bei bipia,

¹⁴ aba angon di gom bipwoi Allah nicukti nya ei angonti leu binhyepo bit bon hi pai na kinei kikau ug bipek ide Tuhan Yesus Kristus nikwei hanyenti kep kan bi.

¹⁵ Allah mibindei ba, Kristus ttau hanyen kwei dem igbit tto bou. Allah ningon nggei-hi-nggei ba, Nongkom ninyeng jei bibor. Noni ne Nibou Ndig di ninyeng tak kep nibou ndig nya yahagom ba, Tuhan di ninyeng tak kep tungwatu nya yahagom ri.

¹⁶ Nongkom niyaijo kikau. Noni ningat rin ei nipigati di sieng-siau kei di bit bon tungwatu nya icem kep kan bi. Hi ngat Noni bou niyai him bi sren lene bit bon hi ngat Noni kikau bi sren. Tungwatu nya yahagom mikon ninyeng ba, Nide nisindemti ug hon nohonti bi sren! Igbit ri.

¹⁷ Ma asok kep yo di inyeng tut ndigban di mipror yon mem nijam dini. Ma ingon jei sut biba ingon com mun di inyeng tut au. Noro ma iba ingon com Allah di yai mun nyeng hagom binye leu binhyepo ingon kei drek dip.

¹⁸ Ma asok kep yok leu binhyepo isingat cem inyeng tut midyai di kei nya cem ingondut tungwatu nya cem ikwas mun di jo biyoni tut hiter cem.

¹⁹ Tug hon nisinati dima lene yoni minju mun di kei di pror yon kan bi keyam binok nitriti mem nijam di nidipti bu. Leu api idem mem gima igyai niyaijo nijep di jo kikau ba, niyaijo dima ne niyaijo di nijit-jau ri.

²⁰ Na di Timotius e, ma anyohou mun di Allah ba ningon com na tut! Ma ambres nanti leu nisimbot kep biyamti di nok nihyet minyei kin tungwatu nya di iba ighyet dahat yam hyet tut mun di iba ingon kiowi bijem ninyeng “Nikan tutti.”

²¹ Lewo ibou poi ipai sut yonti bipia itug ndei “Nikan tutti” nok gi dem leu api ikrau tunggwei Allah nicuk nyeti di ingon jo kep nipou su ba, israwir. Handei kon ba, Allah singat tut jahagom. Nipigo leu dani, Paulus