TIMOTIUS GI NIGOM 3 - ALLAH NIHYET MEM TUNGWATU NYA

Nidimig nibou mbusyamei nya

¹ Mun di dipas kep dini ne mun di nijit ri. Gino tungwagom joi sut ninyeng nibou mbusyamei ne noni ba noho rok midyai di bon ninyenga.

² Suar nibou mbusyamei ningon sren ba, bit bon hi pai noni kinei kan bi. Suar noni wak sop gom ngat he ba, om kep ningon kan. Suar ningon nddong ba, nyohou dimig niyaijoti cem. Ma noni cigit ngkiai nya kui ig ba, ningon dorti tut ningginau tungwatuti cem.

³ Suar noni mbres nonti leu mun di pu tungwatu nya. Ma noni gga igkei au. Noro ma ningon jo nyahan. Ma noni ngat ningwes ei mitieiti au.

⁴ Suar noni bie tut nide ig bei nsi nya mungkun kei binyohou pingok nimunggwom bat nya ingonti leu binhyepo ikuk yok binoni bibit nihyet.

⁵ Leu gino noni nyohou bie tut nide ig bei nsi nya kan bi ne notou noni nyohou bie tut Allah de mbusyamei i?

⁶ Ma ata no di sindi nok no di Kresten nijep-jep binok nibou mbusyamei au. Leu gi nok ne ningon jei apino Allah misigion noni noyam kin Bilis di tug ndei nisigion noti.

⁷ Suar no dima ningon kwes kin yo di ingon jo kep bi nya. Leu gi bi ne noni biam bon di Bilis ndin mem noni apino mmai sut nonti.

Nidimig yo di igya kui nibou nya

⁸ Suar yo di igya kui nibou nya ingon kwes ba, ingon gom cem. Ma idut ba anggur ngei nindig di pu yok au lene ma ingon pri kep mitiei nindig bibor au.

⁹ Suar iba ingon mien di kwes kei bikrau kep Allah nicuk nyeti di nijit di Noni ndo binye tu hagom.

¹⁰ Ma abingon yo dini nipou ug e. Gino mun di kinei hi rap yok bi ne ata yok nok yo di igya kui nibou nya.

¹¹ Nok gima cem suar itnem bat nya ingon kwes. Ma ipai kep tungwatu nya inghapti bidut mun di pu yok au. Noro suar iba ingon di gom biyai kep ide midyai nya hagom.

¹² Suar yo di igya kui nibou nya iwak sop gom ngat he ba, inyohou pingok imunggwom bat nya ingonti kan ba, ibie tut ide ig bei nsi nya nok mungkun kei.

¹³ Gino yo di igya kui nibou nya igyai kep ide midyai nya nok gi mungkun kei lene yo di mbusyamei nya mikon inyeng ba, mibrim ingkek mem gima itri tut ide niba ningon com Kristusti.

Ide niba ningon com Kristusti ne mimun di mindur ri

¹⁴ Diyok dingon mem gima jei bi lene dihwou ngat na lo, dipinak srat dini hwou ndam na nipou ug e,

¹⁵ leu binhyepo gino dibinyen lene srat bokti dini mipingok angonti tut notou nye di mbusyamei igyai kep ide midyai nya. Nyeni ne Allah Di Niyaijo Nide bat nya ri. Allah de mbusyamei rinok cou di sindem tut nihyet di nijit ba, nyohou nihyet dima cem.

¹⁶ Bit bon tungwa hi tte tut ide niba ningon com Kristusti di nok mimun di mindur kan bi. Kristus luei nitta bindo Nonti nok tungwatu leu api Allah Ninnei ndo brei bipia Allah joi sut Kristus niyai munti nya leu api malaikati nya ingat Noni bou igyai him. Nide limwa nya itri tut Noni bak mben dihyeisi dini hagom leu api tungwatu nya bidem dihyei nisurti-nipekti hagom iba ingon com Noni leu api Allah kon Noni hanyen ug ei gwamti.