ROMA 9 - ALLAH NIHYET MEM TUNGWATU NYA

Allah de limwa nya di Noni dimig ei su

¹ Kristus nyeng tut da ba, dipai jit bidibicum bi. Allah Ninnei di ninyeng tak kep dingon mien bindei ba, dingon ngkiem tirigi dipai bipia,

² dingon buhun ba, dingon ngguk bibor cem,

³ drek dip disut bat di ditig mbier tut yok nya. Lewo danti dijoi sut Allah sigion da bimbres da leu Kristus mem yoni.

⁴ Yoni ripo intun mben Israel him tug hon Allah nidimig yok eisi ba, inok Nide limwa nya cem. Noni nek yok nok nipmot bat nya bindo nisindemti biyok cem. Allah kin yoni ipreu ei mem yam tug hon Puig Yahudi niggai serti ba, ikan tut nisinati mem gima ikuk yok biNoni mungkun kei cem. Igyai Nide nipreu ei mem yokti leu Noni ba,

⁵ intun idigup bat-idigai bat nya him cem. Kristus di bon ningut noyam kin tungwatu nya ingut ntun yoni him ba, ninyeng jei dor njiriek nindigsi nya yahagom. Ma tungwatu nya inggei sut Allah bijo ninno bijo kikau! Igbit ri.

⁶ Dipi bidipai bije bipia Allah nipreu ei mem Nide limwa nyati cut bi. Noro ningat ne mben Israel yahagom inok Nide limwa di Noni dimig ei su nya bi.

⁷ Yo di yahagom di intun Abraham him ne Allah nimunggwom bat nya rin bi. Lewo Allah pai bak Abraham “Yo di intun Ishak him he rino amunggwom bat nya.”

⁸ Ningat ne yo di intun Abraham him tug hon Allah nipreu ei mem noti yongkom he rino Allah nimunggwom bat di nijit nya lene nindigsi leu gima di intun Abraham him nya ne nimunggwom bat nya rin bi.

⁹ Lewo Allah preu ei mem noni bipai “Dem igbit tto bou ne midikwei hanyen leu api Sara misrek tut nipmot.”

¹⁰ Ba, gima he bi. Ribka srek tut nipmot bat cin di munggwom nggre di yahacem icig gom ngat di Ishak ba, noni ne pung di nyeni intun him ri.

¹¹ Nipou tirigi Ribka srek tut nipmot bat cin di munggwom nggre dima bigyo lene Allah ndo igbit nikos tutti mem nidipti bu bak noni. Nikos tutti dima ntun yo cin dima igyai munti nya him bi noro ntun Allah Nonti nidimig igomti leu munggwom nggre cin dima. Lewo nipou tirigi Ribka nipmot bat cin di munggwom nggre dima ibon mun di kei e, he mun di kinei e, bigyo

¹² ne Allah pai bak Ribka “Apmot mighumbou minok awak mem nikinjoi.”

¹³ Bit leu Allah Nihyet pai bipia Allah pai “Dijoi sut Yakub noro dikou sut Esau.”

¹⁴ Nirop ninda ndigsi pai mindei binye i? Allah ningon srep e? E bi!

¹⁵ Lewo Noni pai bak Musa “Dingon nggriu sut tungwa tou rino didimig ei su ba, dingondut tungwa tou rino dingon llei sut.”

¹⁶ Gima rino Allah nikos tutti tug hon tungwatu nya ingon kanti kin igyai munti nya bi noro tug hon Allah ningon di nggriu sut yo di Noni dimig ei su nya.

¹⁷ Lewo Allah Nihyet pai sut Allah di pai bak nibou ndig minu Mesir “Dita nani nok nibou ndig bit leu dingon kanti gom ngat he. Dindo Ditde nisindemti bina leu binhyepo tungwatu nya mitri tut dinyeng jeisi kikau ug bipek minu nohon keti.”

¹⁸ Gima rino Allah ngondut igom bit leu ningon kanti bibindei igom ningon tindak bit leu ningon kanti.

Allah ningon sibui ba, ningon nggriu cem

¹⁹ Mpaba jigom hig ser da “Gi nok lene nggon rino Allah njei kep nye i? Tou riyai nisindemti mem gima tte tut Allah ningon kanti i?”

²⁰ He disut na e, nani ne tungwatu dihyeisi dini he ri! Ma ahap aji ba, abirop Allah nihyet au! Ma dibijig hig ser nibon dibijig cig “Nggon rino abon da bou anda him nok gini i?” E bi!

²¹ Nibon dibijig cig dima op igtuyap bit leu ningon kanti. Ba, noni ba igtuyap ninggop gom boop dibijig ningat can bou ninda him bikon gi hi di kei bibor kei ei mem njap nindig lene bimangkrei gi hi di wer kei lai-lai de bikwop njap-njap.

²² Nok gima cem tut Allah niyai munti nya. Noni kos tut bipia ndo ningon sibui sut sisarti brei bak tungwatu nya leu binhyepo ingon huk niti tut Nide nisindemti. Noro om ningon tut yo di suar itug ndei hukum drek dip gi ibindei ningon sibui sut yok.

²³ Ba, Allah kos tut bipia ndo nikei-kau-keisi di ug hon nohonti bi brei binye. Noni njei nikei-kau-keisi dima bak nye di Noni tin ei nye tu nya lewo ningon nggriu sut nye.

²⁴ Nyeni ne yo di Noni hig nye ei su nya rin noro hig leu mben Yahudi nya ikieti he bi noro hig leu ngkiai nya cem ikieti.

²⁵ Lewo Allah tri tut Nihyet tug hon srat Nabi Hosea nibokti bipai, “Tut yo di inok Ditde limwa bi nya ne midihig yok ‘Ditde limwa nya’ ri. Lene tut mben di dingon ngakei yok bi nya ne midihig yok ‘Dimunggwom Bat di dingon him ngat nya’ ri.

²⁶ Ei mpia ttou nsi di hi pai sut yok ‘Jinok Ditde limwa nya bi’ lene Noni mipai sut yok ei mpia dima ‘Yoni ne Allah Di Niyaijo nimunggwom bat nya rin’.”

²⁷ Lene Nabi Yesaya simbot dat tut mben Israel bipai “Mbro nok gino mben Israel imangti dem kep iggum ei muk nipimat lo, ibou poi he migyai niteu leu sisarti kin niyaijo nijep.

²⁸ Lewo Allah mikes hukum haninyai ei tungwatu dihyeisi dini hagom dip.”

²⁹ Gima cem Nabi Yesaya pai “Gino Allah di Sindem Bibor sindui sut nye ba, ibou poi ingwes ngun bi ne nyeni yahagom isar bingwig dem kep nok minu ndig Sodom kin Gomora.”

Nihyet Di Kei mem mben Yahudi cem

³⁰ Nirop ninda ndigsi pai mindei binye i? Ngkiai nya inggok puig mem gima igyai ingon di kwes kin Allah hanyen bi. Noro Allah yai ingon di kwes kin Noni hanyen tug hon ide niba ningon com Noti.

³¹ Lo, mben Israel inggok ser niggai serti di biyai ingon di kwes kin Allah noro ingat hi bi.

³² Nggon rino ingat puig dima bi i? Lewo inggok puig dima tug hon ide niba ningon com Allahti bi noro tug hon yonti igyai munti nya. Apino indrat “Tig Di Bindei Tungwatu Nya Indrat.”

³³ Allah Nihyet pai sut tig dima, “Jingat i! Diprion tig mma ei Sion ba, tig dima mibindei tungwatu nya indrat. Tig nindig dima mibindei tungwatu nya ikinoi. Noro no di ba ningon com No dima ningon pus tut drek dip bi.”