ROMA 8 - ALLAH NIHYET MEM TUNGWATU NYA

Niyaijoti di bicim tindei Allah Ninnei ningon kanti

¹ Nogindini Allah mikes hukum ei yo di inok gom kin Kristus Yesus dip bi.

² Lewo Allah Ninnei niggai serti di bindei ba, igyaijo nok gom kin Kristus Yesus kwek da leu niggai ser dati dibindei sisar kin nimai kat da dima tu.

³ Ingut kanti di ntun dihyeisi dini him bindei ba, bit bon Puig Yahudi niggai serti kwek nye kan bi. Noro Allah nggek tut sisar nisindemti ei ingut kanti di ntun dihyeisi dini him tug hon Nipmot di Noni pinak kwei tereu nok tungwatu dihyeisi mem gima biciu ser sisar.

⁴ Allah yai mun dini leu binhyepo ibrim ingkek mem Allah ningon kanti di jo nibreisi ei Puig Yahudi niggai serti dima leu binhyepo bindei mbut ningon kanti ei nyenti njemti bit leu Allah Ninnei ningon kanti noro bit leu ingut kanti di ntun dihyeisi dini him bu bi.

⁵ Ningut kanti di ntun dihyeisi dini him pingok kep bikwop tungwatu nya di igyai mun bit leu ingut kanti di ntun dihyeisi dini him ibou ngwakti. Noro Allah Ninnei ningon kanti pingok kep bikwop tungwatu nya di igyai mun bit leu Allah Ninnei nijoi sutti.

⁶ Gino ningut kanti di ntun dihyeisi dini him pingok kep jibou ngwakti ne nimai ntun him. Gino Allah Ninnei ningon kanti pingok kep jibou ngwakti ne niyaijo nijep kin ningon di jo nyahan ntun him.

⁷ Gino ningut kanti di ntun dihyeisi dini him pingok kep tungwagom ne noni ba nitok bak Allah lewo noni bit Allah nihyet bi. Ningat ne bit bon noni bit Allah nihyet kan bi.

⁸ Bit bon Allah joi sut yo di ikuk yok bak ingut kanti di ntun dihyeisi dini him kan bi.

⁹ Noro jiyai mun bit leu jingut kanti di ntun dihyeisi dini him nicuk jeti bi. Noro jiyai mun bit leu Ninnei Gi kwes nicuk jeti gino ningat ne Allah Ninnei ningat rin ei jingonti. Gino Kristus Ninnei ningat rin ei tungwagom ningonti bi ne Kristus nyeng tut no dima bi.

¹⁰ Gino Kristus ningat rin ei jingonti ne mbro nok gino jingut mipror yon drek dip sisar lo, Allah Ninnei yai niyaijo nijep bije lewo Allah yai jingon di kwes kin Noni bije tu.

¹¹ Gino Allah Ninnei di kon Yesus hanyen leu nimai eisi ningat rin ei jingonti ne Allah gom ngat dima mikon jingut di mipror yon hanyen tug hon Allah Ninnei di ningat rin ei jingonti.

¹² Gima rino disut bat jen, ibon ningwam noro ibon ningwam bak ingut kanti leu binhyepo igyai mun bit leu nicuk nyeti bi.

¹³ Leu gino jiyai mun bit leu jingut kanti di ntun dihyeisi dini him ne jimai. Noro gino jiba nisindemti leu Allah Ninnei bimu kep sisar di jibon nya ne jiyaijo.

¹⁴ Yo di ibit Allah Ninnei nibie tut yokti inok Allah nimunggwom bat nya ri.

¹⁵ Lewo Allah Ninnei di Allah yai bije bibon je tereu nok awak leu dima jiyaijo ei ningon di ttinti bi. Noro Ninnei bindei jeni bijinok Allah nimunggwom bat nya. Apino bikwop nyeni iba Allah Ninnei nisindemti bihig Allah nok Icig bipai “Arig e! Arig e!”

¹⁶ Allah Ninnei bicim tindei nyeni innei bipai sut nyeni bipia nyeni ne Allah nimunggwom bat nya ri.

¹⁷ Gino nyeni ne nimunggwom bat nya rin ne imbun mun di kei di Noni bet ei mem nimunggwom bat nya. Ba, imbun mun di Allah bet ei mem Kristus cem lewo inok gom kin Noni. Leu gino ipriet kin Kristus ninghuisi wei ne ipriet kin Kristus nikei-kau-keisi nya cem.

Ipriet kin nikei-kau-keisi ei nidipti bu

¹⁸ Diba dingon srip huk bipia bit bon ibinai sut inghuisi wei gom-gom di cut igkep nye ei dihyeisi dini kin nikei-kau-keisi di Allah bet ei mem nye dima iba nye kep kan bi.

¹⁹ Allah nipai testi hagom ingon wis him nituti tirigi Noni ndo nimunggwom bat nya ei nibreisi.

²⁰ Lewo Noni sindui sut nipai testi hagom ba, nna ei. Nipai testi kos tut nok gima bi noro Allah kos tut nok. Mbro nok gima lo, Allah yok Ningon mem,

²¹ nidipti bu tirigi Noni mikwek nipai testi hagom leu nisindemti di bindei hagom pror yon apino nipai testi mipriet kin niyati kwesti kin nikei-kau-keisi bit Allah nimunggwom bat nya.

²² Ikan tut bipia nipai testi hagom ilua kwop tut ninghuisi wei leu nimbie him kwei bipek ammani kep tereu nok sop di ninghim dut tut munggwom.

²³ Noro nipai testi he rino lua kwop tut ninghuisi wei bi. Nyeni cem ilua kwop ei ingon mienti. Mbro nok gino igyai Allah Ninnei nok munkwas di Noni njei bak nyeni nimbigom tu lo, igyok ingon mem nituti di Allah mikwek nyenti njem leu api nek nye nok nimunggwom bat nya.

²⁴ Noni ba ide niyok ningon mem biteu nye leu sisar biyai niyaijo nijep binye. Gino ingat mun di igyok ingon mem bou igyai him ne jo nibreisi bipia gima ne niyok ningon memti di nijit rin bi. Tou riyok ningon mem mun di ngat ningat bou niyai him i?

²⁵ Noro gino igyok ingon mem mun di ingat bou igyai him bi ne ibet ingon mem hak ug.

²⁶ Nok gima cem Allah Ninnei kwei mpu nye lewo isindem bi ba, ikan tut nisinati mem gima ingat nadi tindei mun nyeng hi bi. Mpe dima lene Allah Ninnei Nonti kwei ya hacan mem nye ei Allah Noho bei lene ba nahamuisi di imiap bi bingat nadi mem nye.

²⁷ Leu api Allah di ngat mun di jo nding ei tungwatu nya ingonti kan tut Allah Ninnei ningon kanti lewo Noni ngat nadi bit leu Allah ningon kanti mem Nide limwa nya.

²⁸ Ikan tut bipia gino tungwatu nya ingon ngakei Allah di hig yok bit leu ningon kanti ne Noni nyohou dimig mun nyeng hagom di pek kep mem yok bibie tut yok.

²⁹ Habiei ei nimbie him ne Allah kan tut yo di Noni hig su nya bidimig yok leu binhyepo inoyam kin Nipmot Yesus Kristus. Tug hon nisinati dima Noni bindei Nipmot nok mighumbou mem Nide bat nya imang bibor.

³⁰ Lene Allah hig yo di Noni dimig ei su nya biyai ingon di kwes kin Noni leu api bindei ba, yo di ingon kwes kin Noni ipriet kin Nide nikei-kau-keisi.

Allah ndo ningon ngakei nyeti tug hon Yesus Kristus

³¹ Gima hagom nok lene notou ibuhup hanyen bu i? Gino Allah tti kin nye ne tou ribindei cut nye i?

³² Allah jem Nipmot bou Nonti bingondut Noni bi noro kes Noni ei mem nyeni yahagom. Gima rino Noni miyai mun nyeng nindigsi hagom binye mikuisi bi e?

³³ Gino Allah simbot dat tut Nide limwa di nyeni bipia ingon kwes kin Noni ne tou ripai kep nyeni i?

³⁴ Gima rino tou rima pai sut nyeni bipia ingon mui i? Hi bi! Lewo Kristus mbrap gau nyeni ei Allah Noho bei! Noni ripo mai ei biei salibti he bi noro kiju hanyen leu nimai eisi biya kui Allah ninda com.

³⁵ Mindei rino mbres nye leu Kristus ningon ngakei nyeti i? Bit bon mun di cut igkep nye kin ninghuisi wei kin yo di ihwen bit nye kin ninggum kin angwei tig naham ei nyeti kin nimbuk tut nyeti kin igyai nimai hagom mbres nye leu Kristus ningon ngakei nyeti kan bi.

³⁶ Bit leu nok Allah Nihyet pai, “Tungwatu nya ijem nimai gau nye drek dip Nani bidem njap ngwa hagom ba, ibibon nye tereu nok domba di ibui nok mikwau.”

³⁷ E bi! Igyai nisindemti mem gima ibindei cut mun nyeng hagom bihigom tug hon No di ningon ngakei nye!

³⁸ Lewo diba dingon com bibor bipia bit bon nimai kin niyaijo kin malaikati nya kin nibou nya bitut nisindemti nya ei mpia-bbed him kin mun di pek kep mem nye nogindini kin nidipti bu,

³⁹ kin mun di jo ei mpia-bbed him kin mun di jo ei dihyei jou kin mun nindigsi bidem Allah nipai testi cem ba, hagom mimbres nye leu Allah ningon ngakei nyeti di tug hon ide Tuhan Kristus Yesus kan bi sren.