ROMA 6 - ALLAH NIHYET MEM TUNGWATU NYA

Igyai niyaijo nijep ei Kristusti

¹ Gi nok lene mipai mindei i? He ma ibon sisar kikau leu binhyepo ibindei Allah nisingat tut nyeti mikum eisi bu e?

² E bi! Sisar tak kep nye bu bi. Gima rino nggon rino ibon kep sisar kikau bu i?

³ Jikan tut bipia tirigi itur nye ei minyeiti lene Kristus Yesus bindei ba, inok gom kin Noni bi e? Nitur nye ei minyeiti dima bindo bipia imai bit Noni tug hon nimai eisi.

⁴ Ibicom yam bit Nide nimai eisi ba, itig nyeni bimai bit Noni tug hon nitur nyeti dima leu binhyepo ikiju hanyen bibrim ingkek mem niyaijo nijep noyam kin Kristus di kiju leu nimai eisi tug hon Nicig De nisindemti di kei-kau-kei.

⁵ Leu gino inok gom kin Noni tug hon gi ibit Noni ug ei nimaisi lene inok gom kin Noni tug hon gi icoi bit nikiju hanyen ndam niyaijoti noyam kin Noni.

⁶ Ikan tut bipia tirigi ipek Kristus kin biei salib ne ipek Noni bitut ide niyaijo nitimieisi cem ei biei salibti leu binhyepo Noni bindei cut ingut kanti di bon sisar leu nye. Tug hon nisinati dima ne sisar ubon nye bitak kep nye bu bi.

⁷ Lewo tirigi tungwagom mai leu su ne sisar de nisindemti om kep noni bu bi.

⁸ Gino imai bit Kristus ne ingon jo kep bipia igyai niyaijo nijep cem bit Noni.

⁹ Lewo ikan tut bipia Allah kon Kristus hanyen leu nimai eisi tu. Noni mai hanyen bu bi sren. Nimai eisi tak kep Noni bu bi.

¹⁰ Noni ndo nimai eisi bak sisar bihigom leu binhyepo bindei cut sisar de nisindemti ba, hon ei sri. Nogindini niyaijo ba, brim ningkek mem Allah.

¹¹ Suar jeni cem ma jiyok ngon kep bipia jindo jimai eisi bak sisar noro jiyaijo tug hon jide ninok gom kin Allahti tug hon Kristus Yesus.

¹² Ma jisindui sut ba, sisar tak kep jide niyaijoti di mipror yon ug rin au. Leu binhyema sisar dima bindei ba, jibit jingut pri kepti di sibut bibor nya bu au.

¹³ Ma jikes jingut nimbumbati nya ei sisar nindati leu binhyepo sisar ba nimbumbati dima yok bibon mun di kinei au. Noro ma jikes jenti ei Allah nindati tereu nok yo di Noni kon yok hanyen leu imai eisi bigyai niyaijo nijep. Ma jikes jenti njem ei Allah nindati leu binhyepo Noni ba jingut bibon mun bit leu ningon kanti.

¹⁴ Harin dima sisar de nisindemti om kep je bu a. Lewo jide niyaijo nijep tug hon Puig Yahudi niggai serti bu bi noro tug hon Allah nisingat tut jeti.

Inok awak di ibit Allah ningon kanti nya

¹⁵ Nogindini irop ninda ndigsi notou i? Isindui sut nyenti bipai “Nnaba ibon kep sisar lewo Puig Yahudi niggai serti tak kep nye bu bi noro Allah nisingat tut nyeti tak kep nye” e? Nok bi!

¹⁶ Jikan tut bipia gino jikuk je bak tungwagom bijibit nihyet lene jinok awak mem no dima lewo ninyeng tak kep je. Gino jikuk je bak sisar bijibit sisar nicuk jeti nya ne gini bindei nimai. Gino jikuk je bak Allah bijibit nihyet ne gini biyai jingon di kwes kin Noni.

¹⁷ Noro ma jikwei ba, ipai sigyo bak Allah! Leu mbro nok gino sisar ubon je bijinok awak nipou su lo, tini bu ne jiba jingon titut yam bibit ningginausi di nijit-jau di Allah yai bije tu.

¹⁸ Allah kwek je leu sisar de nisindemti bibindei ba, nogindini jinok awak mem Allah ningon kantia.

¹⁹ Jingon dorti haigtu bigyo. Gima rino diba dihyet nitu bimbrap bit je. Nipou ne jikes jenti njem ei nok awak mem mun di jingut pri kep kin mun di kinei ba, jingon kanti nya hagom kinei bibor. Noro tini bu ne ma jikes jenti njem ei nok awak mem Allah ningon kanti leu binhyepo jingon gom tut Allah nikos tutti nya mem jeni.

²⁰ Tirigi sisar ubon je bijinok awak ne Allah ningon kanti tak kep je bi.

²¹ Mpe dima lene jitug ndei mindei leu jiyai munti di jimmai sut nogindini nya i? Jiyai munti dima yok hagom bindei nimai!

²² Noro tini bu ne Allah kwek je leu sisar de nisindemti ba, jinok awak mem Noni. Jiba jekep jingon di gom tut Noni apino niyaijo nijep di jo kikau ntun him.

²³ Lewo sisar birop jimuhup nimai eisi hanyen bije. Noro Allah yai niyaijo nijep di jo kikau bit ide Tuhan Yesus Kristus binye mikuisi.