ROMA 16 - ALLAH NIHYET MEM TUNGWATU NYA

Paulus nonti nipigo nisut bat nya ei minu ndig Roma

¹ Dijoi sut ikwohop Febe di ningon jo kep Tuhan lewo noni mpu yo di mbusyamei ei minu ndig Kengkrea.

² Ma jiya um noni nok jisut di ningon jo kep Tuhan. Mun di bon ninyeng rino ma yo di ingon jo kep Allah igya um yam. Gino Febe suar mun di bahati tut nonti lene ma jikwas mun di suar tut noni lewo noni mpu tungwatu nya imang bibor bitut dani cem tu.

³ Dipigo Priska kin Akwila. Yoni ne dingon kieti nya rin ba, igyai midyai mem Kristus Yesus noyam kin da,

⁴ binggok imai eisi tut da mpe di iteu da bidingwes ngun pima. Gima rino dipai sigyo biyok lo, dangkom he bi noro mbusyamei ngkiai nya cem yahagom ipai sigyo biyok.

⁵ Dipigo yo di mbusyamei di induk yam ei ide ig bei cem. Dipigo disut Epenetus di dingon kieti cem. Nongkom ba ningon com Kristus bibie ei hanjop Asia.

⁶ Dipigo Maria cem lewo noni com nahanggwap tut je nindig bibor.

⁷ Dipigo Andronikus kin Yunias di intun mben Yahudi him noyam kin da di isima ei ig bui nsi bit da. Yo cin dini iba ingon com Kristus bibie leu da. Ba, yo di mbusyamei ijoi sut yok drek dip ide nibrim ingkek bitri tut Nihyet Di Keisi.

⁸ Dipigo Ampliatus di dingon kieti di nok gom kin Tuhan noyam kin da.

⁹ Dipigo disut Urbanus di yai midyai mem Kristus bit nyeni. Dipigo dingon kieti di ninyeng Stakhis cem.

¹⁰ Dipigo Apeles cem. Apeles nide ningon gom tut Kristusti jo nibreisi mem nye. Dipigo Aristobulus kin nide ig bei nsi nya cem.

¹¹ Dipigo Herodion di ntun mben Yahudi him. Dipigo disut bat yo di ingon jo kep nya di intun Narkisus him cem.

¹² Dipigo Trifena kin Trifosa di igyai midyai sindem bibor mem Tuhan. Dipigo Persis di dingon kieti. Noni cem yai midyai sindem bibor mem Tuhan.

¹³ Dipigo Rufus kin nipmem di bibon da tereu nok nipmot. Tuhan dimig Rufus ba, nindigsi inggei sut noni.

¹⁴ Dipigo Asinkritus kin Flegon kin Hermes kin Patrobas kin Hermas kin yo di ingon jo kep nya di iba yo bikum yok cem.

¹⁵ Dipigo Filologus kin Yulia kin Nereus kin nikwohop yoni kin Olimpas kin yo di ingon jo kep nya di iba yo bikum yok cem.

¹⁶ Ma jipigo yam tereu nok yo di ingon ce yam bi nya. Kristus de mbusyamei nya hagom iba srat dini bipigo jeni.

Paulus nisok kep yokti ningwigsi

¹⁷ Disut bat jen, ditigtai je leu binhyepo jitindei ser yo di ibindei di jiba nitok biyam kin yo di ibindei di yo di ingon jo kep nya ingon kiowi tut ide niba ningon comti lewo igyai munti dima srep tut ningginau jeti di nijit-jau di jiyai nipou su. Ma jimbres jenti leu yok.

¹⁸ Lewo yo di igyai nok gima igyai midyai mem ide Tuhan Kristus bi noro mem yonti ingut kanti nya. Iba ighyet mini kin ighyet di mmau biris ei yo di ingon mbum nya dip.

¹⁹ Tungwatu nya yahagom imiap tut jinghapti bikan tut bipia jingon gom tut Nihyet Di Kei leu Allah ningginau jeti nya. Gima rino dillei ngwig sut je. Dijoi sut gi jingon ki tut mun di kei nya lo, jingon mbum tut mun di sibut.

²⁰ Jei bi lene Allah di bindei ba, jibong kei jigwam kei mico kep Bilis binem-nnai ei bijehei jimig jou tug hon nisindemti di Noni yai bije. Handei kon ba, ide Tuhan Yesus Kristus mikum ei nisingat tut jeti!

²¹ Timotius di dingon kieti pigo jahagom ba, Lukius kin Yason kin Sosipater di intun mben Yahudi him ipigo jahagom.

²² Da di Tertius dipas kep srat bokti dini dipigo je tug hon ide nitig mbier tut yamti ei Kristusti.

²³ Gayus cem pigo je. Dibong bit noni ba, yo di mbusyamei induk yam ei nide ig bei cem. Erastus di nyohou dimig mitiei pemerinta de ei minu ndig dini cem pigo je ba, isut Kwartus cem pigo je bu. [

²⁴ Handei kon ba, ide Tuhan Yesus Kristus singat tut jahagom. Igbit ri.]

Paulus ninggei sut Allahti binggam kep srat dini

²⁵ Ma inggei sut Allah! Noni bon nisindemti mem gima sindem tut je leu binhyepo jiba jingon com Noni bibor. Gi dipai dini bicim tindei Nihyet Di Kei di ditri tut Yesus Kristus. Nihyet di ditri tut bicim tindei mimun nyeng gom di Allah mbot kep tut. Ingon dorti tut mimun di jo nding leu tungwatu mem nijam di mimbrek ngan dima bi.

²⁶ Noro tini bu ne Allah di niyaijo kikau mbot kep tut mimun dima brei bak mben dihyeisi dini hagom tug hon srat di nabi nya ipas ei su nya leu binhyepo tungwatu yahagom iba ingon com Noni bibit nihyet.

²⁷ Nongkom ne Allah gom ngat rin ba, ningon dorti tut mun nyeng hagom. Handei kon ba, tungwatu yahagom inggei sut Allah drek dip Yesus Kristus niyai munti nya bijo ninno bijo kikau! Igbit ri. Nipigo leu dani, Paulus, Kristus Yesus de awak