ROMA 14 - ALLAH NIHYET MEM TUNGWATU NYA

Ma jiba jihyet biyai no di Kresten hiter au

¹ Ma jiya um no di Kresten di ba ningon com Yesus bibor bigyo ba, bikum je ei jide mbusyameisi. Ma jisrep noni drek dip ningon kanti nya au.

² No di ba ningon com Yesus bibor yem njita kin mikwau bit leu ningon kanti. Noro gi hi di ba ningon com Yesus bibor bigyo yem kep njita nitu he yo.

³ Harin dima no di yem njita nyeng hagom ningwes pri gau gi hi di yem njita nitu he yo a. Harin dima no di yem njita nitu he ba nihyet biyai no di yem njita nyeng hagom a. Lewo Allah joi sut no dima cem.

⁴ Nggon rino aba ahyet biyai hiter nide awak i? Awak dima niceu nongkom kos tut bak awak dima drek dip nicutti e, he nikiju hanyenti e. Ba, awak dima mikiju biya nddong kei lewo Allah sindem mem gima bindei no dima kiju biya nddong kei.

⁵ Igom kan bipia njap ngon bou hi bon ninyeng noro hiter kan bipia bikwop njap nya hagom noyam. Ma bikwop tungwagom-gom ningon nddong kei sut nonti niyaisi a.

⁶ No di kan bipia njap ngon bou bon ninyeng ne no dima ba niyaisi dima binggei sut Allah. Gi hi di yem njita ninyeng hagom ba niyaisi dima binggei sut Allah lewo noni pai sigyo biNoni tut njita. Gi hi di yem njita nitu di map kuisi bi ba mun di noni yem bi binggei sut Allah leu api pai sigyo biNoni.

⁷ Igyaijo mem nyeti he bi. Ide niyaijo ningwig honti cem mem nyeti he bi.

⁸ Gino igyaijo lene ma iba ide niyaijoti binggei sut Tuhan lene ma iba ide niyaijo ningwig honti cem binggei sut Tuhan. Gima rino Tuhan nyeng tut nye mem ide niyaijoti kin ide niyaijo ningwig honti.

⁹ Lewo Kristus mai leu api kiju hanyen leu nimai eisi ba, niyaijo hanyen bu leu binhyepo yo di igyaijo nya kin yo di imai su nya ipai bipia Noni ne ide Tuhan ri.

¹⁰ Gima rino disut bat jen, nggon rino jiba jihyet biyai jisut no di ningon jo kep i? Nggon rino jingwes pri gau noni i? Lewo yahagom migya ei Allah nimig him leu binhyepo Noni mbus ingonti.

¹¹ Allah Nihyet pai, “Tuhan Nonti preu ei mem nye bipia tungwatu dihyeisi hagom mikuk yonti ei dimig him leu api isimbot dat bipia Dangkom ne Allah ri.”

¹² Gima rino bikwop nyeni yahagom mibuhup hanyen bak Allah tut igyai munti nya.

Ma jibindei jisut no di ningon jo kep srawir au

¹³ Lene ma jiba jihyet biyai yam bu au. Noro ma jibingon-ngon nyen leu binhyepo mun di jiyai nya srou jisut no di ningon jo kep ba, noni cut ei sisarti au.

¹⁴ Dinok gom kin Tuhan Yesus. Gima rino dikan tut mungkun bipia Allah nipai testi bon mun di kinei nyeng hi bi. Noro gino tungwagom ba ningon bisrip huk bipia mun nyeng hi kinei ne mun dima kinei mem noni.

¹⁵ Gino jiba njita di jiyem bisibui jisut di ningon nddong bi ningonti ne jiyai munti dima tug hon ningon ngakei yamti bi. Kristus mai mem no dima. Gima rino ma jibindei srawir no dima tug hon njita di jiyem au.

¹⁶ Ma jibon nituti mem yo di hiter biba ighyet biyai je drek dip mun di jiba jingon bisrip huk bipia kei bibor au.

¹⁷ Lewo Allah ninyeng tak kepti ket ei njita di igyem kin ndia ngei di idut bi. Noro coi ei nibit Allah ningon kanti kin ningon jo nyahanti kin ningon llei biborti ba, mun dini yok hagom ntun Allah Ninnei him.

¹⁸ No di yai midyai nok awak mem Kristus ba nisinati dima biyai Allah ningon llei bibor ba, tungwatu nya cem ijoi sut noni.

¹⁹ Gima rino ma inai hammi igyai munti nya di biyai tungwatu nya ingon kwes kin yam bibiwin kep yam ngonti cem.

²⁰ Ma jiba njita di jiyem binggek tut Allah de midyai nya au. Njita ninyeng hagom kei mem nye noro gino jiba njita di jiyem bibindei ba, hiter cut ei sisarti ne jibon mun tunggwei sut noni.

²¹ Gi kei mem jimbres jenti leu mikwau di jiyem kin ba anggur ningei di jidut kin jiyai munti nindigsi nya di bindei dino jisut no di ningon jo kep cut ei sisarti.

²² Asindui sut ba, tut mun dini ne ma ayai igbit angon jo kepti ei Allah Nongkom niyai him a. No di ningon huk niti tut mun di igbit di yai nya ba, kan tunggwei sut bi lene ningon llei bibor ri!

²³ Noro gino noni yem njita njiriek ningon di hukti tut nya ne Allah pai kep noni lewo niyai munti dima ntun him ningon jo kepti bi. Lewo mun nyeng hagom di igyai di ntun ningon jo kepti him bi bindei sisar ntun him.