ROMA 11 - ALLAH NIHYET MEM TUNGWATU NYA

Allah ningon nggriu sut mben Israel

¹ Dihig ser je tut mun nyeng gom kin bu. Allah com Nide limwa nya bihigom tu e? E bi! Dani ne timiei minu Israel gom rin bidintun Abraham him ba, dimbier kim keret Benyamin.

² Noni com Nide limwa nya di Noni dimig yok habiei kwei su hak bi. Jikan tut Allah Nihyet di pai sut Nabi Elia tirigi noni lua sok bak Allah tut mben Israel bipai,

³ “Tuhan e, mben Israel igyai nimai bak Ade nabi nya binggek Ade nimbar hum dok nya bingwig cem tu ba, ug jo dangkom he ridiyaijo lo, ibungwam mem gima igyai nimai bidani cem.”

⁴ Notou Allah buhup Nabi Elia nihyet i? Noni buhup “Dwai, dinyohou tungwatu nya ibou sribu muhwindacan di ikuk yok bak kwar Baal bigyo di inok Ditde limwa nya yo.”

⁵ Tini bu ne nok gima cem. Yo di Allah dimig ei su nya nimangti ibou poi yo rinaha lewo Noni singat tut yok.

⁶ Allah dimig yok drek dip ningon di singat tut yok lo, drek dip igyai munti nya bi. Leu gino Noni dimig yok drek dip igyai munti nya lene ningon di singat tut yokti dima ne nijit rin bi.

⁷ Notou mem yo i? Mun di mben Israel inggok ser wer ninno dima ne ingat bi sren. Noro nimpung mien di Noni dimig yok habiei su nya he imbun nisingat tut yokti. Nindigsi nya imiap Allah nihig yokti bi lewo ingon ndok.

⁸ Lewo Allah Nihyet pai “Allah biyai ingon ndok ba, ingon mbum cem apino bit bon ingon dor Allah nihyetti bimiap nihyet kan bi kikau kwei bipek ammani kep.”

⁹ Daud cem pai sut yok, “Nnaba tirigi ibon pesta lene ma ibiam bon tug hon pesta di srou yok dima di nok juig di bindei cut yok ei nikineisi ba, itug ndei hukum!

¹⁰ Nnaba igyai dindi ser nhyepo ingat mun nyeng hi bi ba, inghim koi drek dip mun di buhun di buhun di tak yok kikau ug!”

¹¹ Dihig ser je tut mun nyeng gom kin bu. Tirigi mben Yahudi indrat mpia ne icut bihigom tu e? E bi! Allah bon nituti tug hon mben Yahudi ide nicutti dima mem ngkiai nya igyai niteu leu sisarti kin niyaijo nijep lene mben Yahudi ingon kinei sut yok drek dip.

¹² Allah njei mun di kei bak ngkiai nya drek dip mben Yahudi di igyai mun tunggwei bibit Allah ningon kanti bi. Gima rino Allah mikum ei ninjei mun di keiti bak tungwatu nya bu drek dip mben Yahudi di ingon kwes kin Noni hanyen bu!

Allah teu ngkiai nya leu sisar

¹³ Nogindini dipai dihyet gom bak je di ngkiai nya. Ei nijam di diya kui Yesus ei ngkiai nya ikieti diba dingon srip huk bipia midyai di diyai nya bon ninyeng nindig bibor.

¹⁴ Mpaba dibiyai dide bat mben Yahudi ibou dut tug hon nisinati di bihi igyai niteu leu sisarti kin niyaijo nijep.

¹⁵ Lewo Allah kou sut Nide limwa nya lene gima bon nikwesti mem ngkiai nya igyai ingon di kwes kin Noni hanyen. Gino Noni joi sut Nide limwa nya hanyen bu ne jo nibreisi bipia gima midem kep nok nimai nya di ikiju hanyen leu imai eisi!

¹⁶ Gino tungwagom yai roti ninggop gi nigom bak Allah lene gima noyam kin gi noni yai roti nitindak titut yam bak Allah tu. Ba, gino Allah nyeng tut biei nigau lene gima bindo bipia ninggrupti cem Nide ri.

¹⁷ Allah sriot biei zaitun nitu (biei dini ne mben Yahudi ri) di Noni nyohou dima ninda hi leu leu api ngot biei zaitun sisron ninda hi hanyen biluei niceti. Je di ngkiai nya jinok biei zaitun sisron dima ninda ri. Allah ngot je kin biei zaitun nitu leu binhyepo jima mben Yahudi ide mun di kei di ntun niyaijo di bitut ninnei him.

¹⁸ Gima rino ma jingwes pri gau ninda nya di Allah sriot leu biei zaitun nitu dima au. Ma jiyok ngon kep bipia jeni ne ninda nya he. Ninda nya yai njita hi bak nigau nya bi noro nigau nya igyai njita bak ninda nya.

¹⁹ Noro jipai bida “Igbit rin noro Allah sriot biei zaitun nitu ninda nya leu leu binhyepo ba nyeni biluei niceti bu!”

²⁰ Igbit ri. Noro Noni sriot ninda dima leu drek dip gi ingon jo kep Noni bi. Lo, jiluei niceti lewo jingon jo kep Noni. Noro ma jingon jei sut au. Ma jidigit tut.

²¹ Leu gino Allah sindui sut mben Yahudi di inok ninda nitu nya ba, intun ninjem him bi lene ma jikan bipia Noni misindui sut jeni ba, jintun ninjem him kikau au!

²² Mun dima yok ndo binye bipia Allah ningon nggriu cem nggwes cem. Ningon nggwes tut yo di ibon sisar noro ningon nggriu sut je gino jiyai munti nya biyai Allah ningon nggriu sut je. Gi bi ne Noni misriot je hanyen leu.

²³ Tut mben Yahudi dima ne gino ittin ser ide sisar ba, ingon jo kep Allah hanyen bu ne Noni mingot yok kin ninjem hanyen. Lewo Noni sindem mem gima ngot yok kin ninjem hanyen.

²⁴ Tirigi Noni sriot je di ngkiai nya leu biei zaitun sisron ninjem leu api ngot jeni kin biei zaitun nitu ninjem lene Noni yai gima njiriek niyai kepti. Mben Yahudi inok ninda nitu nya. Krop kei mem Allah ngot yok hanyen kin ide biei zaitun nitu dima ninjema.

Allah ngondut tungwatu yahagom

²⁵ Disut bat jen, ma jikan kep bipia jingon ki bijikan bidem mun nyeng hagom au. Lewo Allah De mimun nyeng gom no rinaha lo, tungwatu nya ikan tut bi. Noro handei kon ba, jikan tut Nide mimun dima. Mben Israel bihi ingkek ndok noro ide ningkek ndokti dima jo kikau bi. Noro mijo nijoti nok bibou ngkiai nya di mitti kin Allah imangti dem ug e.

²⁶ Gima ne nisinati mem Noni teu mben Yahudi yahagom leu sisar biyai niyaijo nijep biyok. Lewo Allah Nihyet pai, “No Di Teu Tungwatu Nya Leu Sisar mikwei leu Sion leu api miciu ser yo di intun Yakub him nya ide mun di mbuk hagom.

²⁷ Dani kin yo dini minipreu ei mem yam mpe dino diciu ser ide sisar.”

²⁸ Mben Yahudi ikou sut Nihyet Di Kei apino iba nitok bak Allah. Igyai munti dini bon nikwesti mem je di ngkiai nya. Noro Allah ningon ngakei mben Yahudi drek dip ide pung di intun him nya lewo Noni dimig yok ei nipou su.

²⁹ Lewo Allah luei ningon tut yo di Noni dimig yok ei biyai gi kei biyok tu nya bi sren.

³⁰ Mbro nok gino nipou kwei bipek ammani kep je di ngkiai nya jibit nihyet bi lo, tini bu ne Allah yai jingon di ngun drek dip mben Yahudi di ibit nihyet bi.

³¹ Nok gima cem mem mben Yahudi. Nogindini ibit nihyet bi leu binhyepo bon nikwesti mem Allah yai jingon ngun bu. Noro gima bindei ba, igyai Nide ningon nggriu sut yokti hanyen bu.

³² Lewo Allah nggam tungwatu yahagom ba, isima noyam drek dip gi ibit nihyet bi. Ninggam yokti dima bon nikwesti mem Noni ngondut yahagom.

Dem mem gima yahagom inggei sut Allah

³³ Allah nisingat tut nye di tungwatuti kei ngat kei! Ningon kiti cem tot buti! Noni kan tut mun nyeng hagom. Bit bon tungwatu nya igyok igyai kep Allah nikos tutti ba, ingon dorti tut Allah niyai kepti nya kan bi!

³⁴ Lewo Allah Nihyet pai, “Tou rikan tut Tuhan ningon kanti i? Tou risindem mem gima ngginau Noni bipingok ningonti i?

³⁵ Tou riyai mun nyeng hi biNoni leu dima hara Noni mem birop hanyen bak i?”

³⁶ Lewo Allah pai tes mun nyeng hagom ba, mun nyeng hagom jo nijoti tug hon Noni lene jo ei mem Noni cem. Ma tungwatu yahagom inggei sut Allah bijo ninno bijo kikau! Igbit ri.