ROMA 10 - ALLAH NIHYET MEM TUNGWATU NYA

¹ He disut bat jen, dingon bisau sut gima dide bat mben Yahudi igyai niteu leu sisarti kin niyaijo nijep. Duhuk nadi bak Allah kikau mem yok.

² Disimbot dat bipia yoni iba ingon gom bibrim ingkek bikuk yok bak Allah noro ingon tunggwei sut nisinati di nijit mem gima ikuk yok bak Noni.

³ Yoni ikan tut nisinati dino Allah bindei ba, tungwatu nya igyai ningon kwes kin Noni hanyenti bi. Noro ipi bitin puig hi ter bit leu yonti ingon kanti. Ikuk yok bak Allah de nisinati di bindei ba, igyai ningon kwes kin Noni hanyenti bi.

⁴ Kristus yai mun bipek kep Puig Yahudi niggai serti nisindemti tu. Gima rino Allah bindei ba, no di ba ningon com Kristus miyai ningon kwes kin Allah hanyen.

Niteu leu sisarti kin niyaijo nijep mem yahagom

⁵ Musa pas kep bipia no di yai ningon kwes kin Allah hanyenti tug hon nibit leu Puig Yahudi niggai ser noti mitug ndei niyaijo tug hon nibit niggai ser noti dima.

⁶ Noro tut nisinati mem tungwatu nya igyai ningon kwes kin Allah hanyenti tug hon ide niba ningon com Noti ne Allah pai ‘Ma jihig jingon tut no di mikui ug ei gwamti (leu binhyepo buwak Kristus juk hanyen kwei) au.’

⁷ He ‘ma jihig jingon tut no di mijuk ug ei minu nimai nya ide (leu binhyepo win Kristus hanyen leu nimai eisi) au.’

⁸ Noro nimbot kepti pai “Allah Nihyet jo dideu je ei juhui him kin jingonti.” Gima ne nihyet di pai bipia suar tungwatu nya iba ingon com Allah di nitri tut bije.

⁹ Leu gino aba ahui bisimbot dat “Yesus ne Tuhan ri” leu api aba angon com bipia Allah win Yesus hanyen leu nimai eisi tu apino ayai niteu leu sisarti kin niyaijo nijep.

¹⁰ Lewo iba ingon com Allah leu api Noni joi sut nye biyai ingon kwes kin Noni hanyen. Ba, isimbot dat gima ei yuhui him apino Noni teu nye leu sisar biyai niyaijo nijep binye.

¹¹ Allah Nihyet pai “Tungwa tou rino ba ningon com Noni ne ningon ngkwei leu bi sren.”

¹² Nipaisi dima dem mem tungwatu yahagom lewo mben Yahudi kin ngkiai nya ter leu yam bi. Allah gom ngat dima ne Tuhan mem yahagom rin binjei mun di kei ninyeng mang bibor bak yo di yahara Noni.

¹³ Allah Nihyet pai “Bikwop tungwa tou rino hara Tuhan miyai niteu leu sisarti kin niyaijo nijep.”

¹⁴ Noro notou tungwatu yahara Noni gino ingon jo kep Noni bi i? Notou ingon jo kep Noni gino imiap nihyet tut Noni bi i? Notou imiap nihyet tut Tuhan gino hi tri tut nihyet biyok bi i?

¹⁵ Notou hi tri tut nihyet gino Allah cuk noni bi i? Lewo Allah Nihyet pai “Yo di ikwei sut Nihyet Di Kei leu Allah inghapti biyai tungwatu nya ingon kei bibor!”

¹⁶ Tungwatu nya imiap Nihyet Di Kei dima noro yahagom ijoi sut bi. Lewo Nabi Yesaya pai “Na di Tuhan e, tou riba ningon com nyeni nihyet i?”

¹⁷ Gima rino tungwatu nya iba ingon com Kristus ei mpe dino imiap nihyet lene imiap nihyet ei mpe dino hi tri tut Kristus biyok.

¹⁸ Noro dihig ser je tut mun nyeng gom. Yo dima imiap nihyet bi e? E bi! Imiap nihyet tu! Lewo Allah Nihyet pai “Ighyet tibim kikau ug ei dihyei nisurti-nipekti. Ipaisi tibim bipek minu nohon keti tu.”

¹⁹ Dihig ser je tut mun nyeng gom kin bu. Mben Israel imiap nihyet bi e? Disindui sut Musa nok no di ya bibie ba, buhup mun di dihig ser je tut dima. Musa pai “Allah pai ‘Midiba mben hiter di nok mben di mungkun bi bibindei ba, jibou dut. Midiba mben hi ter di ingon mbum bibindei ba, jigga bibor.’ ”

²⁰ Yesaya brim ningkek dor njiriek bu bipai “Allah pai ‘Tungwatu di inggok ser Da bi nya ingat Da bou igyai him tu ba, dindo Danti bak yo di ihig Da nya tu.’ ”

²¹ Noro Yesaya pai sut mben Israel “Allah pai ‘Disu Dinda bikwop njap ngwa hagom ba, dipi bidikrau mben dima inda noro ingkek ndok bibit dihyet bi.’ ”