MBEN ISRAEL IMBUT-MBUT NYEN 23 - ALLAH NIHYET MEM TUNGWATU NYA

¹ Leu api noni cuk Balak bipai “Adingug tig bijo-jo yam dip nok nimbar hum dok ningat muhwindacan ei sirini. Lene ma ajem sapi nikre ningut muhwindacan kin domba nikre ningut muhwindacan kwei bida.”

² Lene Balak yai hagom bit leu nok Bileam nicuk noti leu api noni kin Bileam ibui sapi ningut gom kin domba ningut gom ba, indig kep hum ei nimbar hum dok muhwindacan dima gom-gomti bidem ug.

³ Lene Bileam kuk Balak bipai binoni “Ma aya kui ade nimbar hum dok bibou duug tou kep gino tuhan joi sut da bindo ningon kanti bida ug e. Lene midikwei pai igbit ningon kanti hanyen bina. Gima rino Bileam nongkom kui kikau biya ei mbigdip.”

⁴ Lene Allah kwei um noni. Leu api Bileam pai biNoni “Dibon nimbar hum dok ningat muhwindacan ba, dibui sapi nikre ningut gom kin domba nikre ningut gom bidindig kep hum ei nimbar hum dok muhwindacan dima gom-gomti tu.”

⁵ Lene tuhan pingok Bileam ningonti tut mun di suar noni tri tut bicuk noni ngkwei hanyen ndam Balak leu binhyepo tri tut tuhan ningon kanti bak.

⁶ Gima rino noni ngkwei hanyen bingat Balak di ya kui nide mun di ndig kep hum ba, nibou mben Moab yahagom igya kui noni.

⁷ Lene Bileam tri tut Allah ningon kanti bipai “Balak di nibou ndig mben Moab buwak da kwei leu Aram di jo nungug him bei mpia nipriti leu binhyepo diya luei nohoti ba, dimbriom mben Israel.

⁸ Noro notou midimbriom yo di Allah mbriom yok bi dima i? Notou midikes hukum ei tungwatu nya dip gino tuhan kes hukum ei yok dip bibie bi i?

⁹ Diya ei mbigdip dini bidicap yok tu. Dikui ug ei nipieti leu binhyepo diyok diyai kep yok. Jingat i! Yo dima ne keret di igya biyongkom rin ba, isrig keret hiter nya ikieti kan bi.

¹⁰ Yakub de nintun him yamti di bram yam nya idigek bibor bidem kep nok dihyei ndung di bit bon tungwatu nya ikwop nimangti kan bi. Handei kon ba, dingon sren nok yoni ingon di sren tirigi diyaijo ngwig hon. Handei kon ba, diyaijo ningwig honti noyam kin yo dima igyaijo ningwig honti.”

¹¹ Lene Balak pai “Ayai nok gima tut da leu binggon i? Dihig na kwei leu binhyepo ambriom ditde siceu nya noro ningat ne angat nadi tindei mun di kei mem yok.”

¹² Leu api Bileam buhup “Bit bon dipai dihyet njiriek tuhan ningon kanti mem da kan bi.”

Bileam tri tut Allah ningon kanti nimbican

¹³ Lene Balak pai binoni “Akwei ba, suug ei mpia ttou nsi hiter bu leu binhyepo acap mben Israel ide prak meng nya nite hi bu. Lene suar ambriom yok ei mpia dima.”

¹⁴ Lene Balak buwak noni ug ei briep Zofim ei Nungug Pisga ninggram him. Ei sirima cem noni dingug tig bijo-jo yam dip nok nimbar hum dok ningat muhwindacan bu. Lene noni bui sapi nikre ningut gom kin domba nikre ningut gom bindig kep hum ei nimbar hum dok muhwindacan dima gom-gomti.

¹⁵ Lene Bileam kuk Balak bipai binoni “Ma aya kui ade mun di andig kep hum bibou duug um tuhan ei sirinu mbigom ug e.”

¹⁶ Lene tuhan kwei um noni bipingok ningonti tut mun di suar noni tri tut bicuk noni ngkwei hanyen ndam Balak leu binhyepo tri tut tuhan ningon kanti bak.

¹⁷ Gima rino noni ngkwei hanyen bingat Balak di ya kui nide mun di ndig kep hum ba, nibou mben Moab no igya kui noni. Lene Balak hig ser noni tut tuhan nicuk noti.

¹⁸ Lene Bileam tri tut Allah ningon kanti bipai, “Na di andigpoi Balak di abon acig Zipor e, akwei ngig atingou mem dihyet.

¹⁹ Allah kin tungwatu nya inoyam bi. Noni luei ningonti nyen ba, ris bak tungwatu nya kan bi. Noni yai hagom bit leu nok nipreu eisi tu! Tirigi Noni mbrap lene dem igbit nipaisi!

²⁰ Allah cuk da ba, suar dingat nadi tindei mun di kei mem yo dima. Tirigi Noni yai Nide mun di kei bak tungwatu nya lene bit bon dipos mun di kei dima hanyen leu yok kan bi.

²¹ Dingat bou diyai him bipia Yakub mitug ndei mun di mbuk ei nidipti bu bi ba, mun di buhun mibuhun tak mben Israel bi. tuhan di nok ide Allah ningat rin bit yok. Yahagom isimbot dat bipia tuhan ne Nibou Ndig mem yo ri!

²² Allah buwak yok kwei leu minu Mesir ba, Noni hwen ide siceu nya dem kep nok sapi banteng di bit bon tungwatu nya ipijuk kan bi.

²³ Bikwop seig ut kin nung nya hagom sindem mem gima sigion mben Israel kan bi. Tungwatu nya misimbot dat tut yoni bipai ‘Jingat i! Allah bibon mun di mindur mem yok ninno tu.’

²⁴ Lewo keret dima ikiju kui dem kep nok mindhe singa niwek. Yoni igya ngkiem dem kep nok mindhe singa nikre. Singa dima mibong kep ninghuisi bi bibou ham nimbiam biyem ninghui ba, dut nimbiam ninggrom ug e.”

²⁵ Lene Balak pai “Mbro nok gino akou sut gima ambriom mben Israel lo, ma angat nadi tindei mun di kei mem yok au!”

²⁶ Leu api Bileam buhup “Bit leu nok dipai bina tu. Suar ditri tut hagom bit leu nok tuhan nicuk dati.”

Bileam tri tut Allah ningon kanti nimbiningai

²⁷ Lene Balak pai bak Bileam “Akwei ba, suug ei gumihyep hiter bu. Mpaba Allah mice tut gima ambriom yok mem da ei sirima bu e?”

²⁸ Gima rino noni buwak Bileam ba, ikui ug ei Nungug Peor ninggram him di jo ndam nite bei iggum ndigsi.

²⁹ Lene Bileam pai bak Balak “Adingug tig bijo-jo yam dip nok nimbar hum dok ningat muhwindacan ei sirini. Lene ma ajem sapi nikre ningut muhwindacan kin domba nikre ningut muhwindacan kwei bida.”

³⁰ Lene noni yai hagom bit leu nok Bileam nicuk noti. Noni bui sapi ningut gom kin domba ningut gom bindig kep hum ei nimbar hum dok muhwindacan dima gom-gomti.