MBEN ISRAEL IMBUT-MBUT NYEN 21 - ALLAH NIHYET MEM TUNGWATU NYA

Tentara Israel sindi ihwen mben Kanaan

¹ Mpe dima ne minu Kanaan bon minu ndig Arad di jo nite bei mpia nibiho. Tirigi nibou ndig minu dima miap mben Israel inghapti bipia imbut kak simpak Atarim kwei su lene ya tut nide tentara nya biyuug hwen yok bikat mben Israel ibou poi.

² Lene mben Israel ipreu ei mem tuhan tug hon neheng bipai “Gino Na di tuhan asindem tut nye leu binhyepo ninjei binibindei cut tentara pima yok lene minico kep yok kin ide limwa nya bitut ide minu ndig nya hagom bitimek bingwig.”

³ Lene tuhan buhup biyok bisindem tut yok apino ibindei timek tentara Kanaan pima bingwig. Lene ibindei sar ide limwa nya ba, inggek ide minu ndig nya cem hagom bitimek bingwig. Leu api ijem mpia ttou nsi dima ninyeng Horma.

Musa tas wou di noni ba ngkimom-tembaga bibon

⁴ Lene mben Israel ijo leu Nungug Hor ba, ikak simpak di mbut ndam Akaba ninging leu binhyepo ikriau hanjop minu Edom. Noro bit bon yoom ingon kak puig sinon kan bi.

⁵ Apino isrep tut Allah kin Musa cem bipai “Nggon rino abuwak nye kwei leu minu Mesir leu binhyepo nimai biningwig ei iggum ndigsi di bon njita kin minyei bi dini i? Njita di niyem kep dini nos nye bibon nyeni ningon him wei.”

⁶ Lene tuhan pinak wou piet mang bibor ug ei mben Israel ikieti ba, yaham yok apino imang bibor imai hak.

⁷ Lene ikwei ngat Musa bipai jit bipia Nibon sisar tirigi nisrep tut tuhan kin nani. Ma angat nadi leu binhyepo tuhan mijji wou piet dini yok leu nyeni nikieti. Gima rino Musa ngat nadi tindei yok.

⁸ Lene tuhan cuk Musa bipia ba ngkimom-tembaga bibon wou gom bikes ei biei dip lene tas biei tut bijo anai. Leu binhyepo tungwa tou rino wou ham tu lene no dima mikei hanyen gino noni tou kep wou ngkimom-tembaga pima nggilun.

⁹ Gima rino Musa ba ngkimom-tembaga bibon wou gom bikes ei biei dip lene tas biei tut leu binhyepo tungwa tou rino wou dima ham mikei hanyen gino noni tou kep wou ngkimom-tembaga nggilun.

Mben Israel ijo leu Nungug Hor biyuug ei Mbang Briep Moab

¹⁰ Lene mben Israel ikiju bimbut hanyen bu leu api yuug hok ide prak meng nya ei minu ndig Obot.

¹¹ Tirigi ikiju bimbut leu mpia dima lene yohok ide prak meng nya hanyen bu ei minu ndig Abarim nigkum kroisi ei iggum ndigsi Moab ei nite bei mpia nipriti.

¹² Nidipti bu lene yohok ide prak meng nya hanyen bu ei Mbang Briep Zered.

¹³ Lene ikiju bimbut leu mbang briep dima biyuug hok ide prak meng nya hanyen bu ei Minyei Arnon nite dinyo ei iggum ndigsi di ug ninno bipek kin mben Amori ide minu. Minyei Arnon nyai ne hanjop di bikkin mben Moab kin mben Amori ide minu nya ri.

¹⁴ Gima rino tungwagom pas ei Srat Pran tuhan Deti nok gini “Minu mien Waheb ei hanjop Sufa kin mbang briep nya. Minyei Arnon,

¹⁵ kin mbang briep nya ei nungug nimig nya di ug bipek kin minu mien Ar kikau buug bipek kin minu Moab de minu niya kwas yamti.”

¹⁶ Lene ijo leu sirima biyuug krau Beer ba, ninyeng dima ne ibijem minyei bousi nya ri. tuhan pai bak Musa ei mpia dima nipou su “Acuk limwa nya ba, idem yam lewo midiyai minyei biyok ug ri.”

¹⁷ Mpe di Noni pai nok lene mben Israel ipai diun nok gini. “Minyei bousi jen, jibindei hei jingei kwei lene nyeni miniba diun bicigit.

¹⁸ Pinjoi ndig nya itig minyei bousi. Nibou nya iba ide tom ngkimom nitu di bindo tut ide nisindemti bitig minyei bousi nya.” Lene ijo leu iggum ndigsi dima biyuug ei Matana.

¹⁹ Lene ijo leu Matana biyuug ei Nahaliel. Lene ijo leu Nahaliel biyuug ei Bamot.

²⁰ Leu api yuug krau mbang briep gom ei mben Moab itimieisi. Nipieti dima jo ei Nungug Pisga nimig ba, birok kik iggum ndigsi.

Mben Israel ibindei timek Nibou Ndig Sihon nya

²¹ Leu api mben Israel isok ighyet bak Sihon di nibou ndig mben Amori bipai binoni,

²² “Ma asindui sut nye binikak puig di mbut ei na di Andigpoi ade minu a. Nyenti kin nyende mindhe-ndhe nya minikriek leu puig ba, minicoi ug ei jide miaisi nya kin jide ba anggur nghousi nya ba, minidut minyei ei jide minyei bousi nya cem bi. Andigpoi e, minikriek leu puig ndig bi noro miniya kak puig ndig kikau ba, nibehei leu na di Andigpoi ade minu kep.”

²³ Ipai bak nok noro Nibou Ndig Sihon ce tut bi. Lene noni nduk nide tentara nya keyam leu api injei ug ei Yahas di jo iggum ndigsi ba, ikon pran bit mben Israel ei sirima.

²⁴ Noro mben Israel ibindei timek tentara Amori imang bibor leu api ipos siceu ide minu ba, igyai bigyati. Ba, igyai bigyati leu Minyei Arnon nyai kikau ug nite bei mpia nijjai bipek kin Minyei Yabok nyai di bikkin mben Amon ide minu. Noro injiriek minyei dima bi lewo mben Amon igya ser hanjop dip dima bingkiem bibor.

²⁵ Lene mben Israel ipos mben Amori ide minu ndig nya hagom ba, igyati. Bitut minu ndig Hesybon kin minu mien di jo ttai nya hagom ba, ibong timiei eisi.

²⁶ Minu ndig Hesybon ne nibousi mem Nibou Ndig Sihon de ninyeng tak kepti ri. Nipou yo lene noni kon pran bit nibou ndig mben Moab bibipos nide minu biyati kikau ug bipek kin Minyei Arnon.

²⁷ Gima rino timiei minu Amori nya ipas diun tut minu ndig Hesybon nok gini, “Ma jikwei ba, nyeni yuug ei Hesybon. Nyeni yuug ei Nibou Ndig Sihon de minu ndig a! Nyeni nijoi sut ningat minu ndig dini di iwin bikiju ba, pindi no bijo nijoti hanyen.

²⁸ Mpe di gom ne tentara Sihon ikiju leu minu ndig Hesybon dini dem kep hum di yem minu ndig Ar ei minu Moab bingkiong lene ibiya kep mbigdip nya di sir Arnon bipek kin nibrigya.

²⁹ Aye, mben Moab e, buhun mem jeni! Je di jikuk je bak Kamos e, jisar ri! Jide mun di jikuk je bak dima sindui sut je ba, jinang ug ei jingkiaisi. Nibou ndig mben Amori kat jide sop nya bimbut tut.

³⁰ Noro tini bu ne ide nintun him yamti di bram yam nya yahagom isar bingwig kak puig leu Hesybon kikau bipek kin minu mien Dibon dideu minu ndig Nasyim kikau ug bipek kin minu ndig Nofah di dideu minu ndig Medeba cem.”

³¹ Nok lene mben Israel ibong timiei ei mben Amori ide minu,

³² leu api Musa cuk yok biyuug nggok puig di dem mem gima ibihwen timiei minu ndig Yaezer nya. Lene mben Israel ipos minu ndig dima kin minu mien di jo ttai nya bigyati ba, ijji timiei minu Amori di ibong ei sirima leu.

Mben Israel ibindei timek Nibou Ndig Og nya

³³ Gima leu su lene mben Israel ikriek ba, igya kak puig di ug ndam Basan. Leu api Nibou Ndig Og leu Minu Basan njei sut nide siceu nya mem gima ihwen mben Israel ei minu ndig Edrei.

³⁴ Lene tuhan pai bak Musa “Ma attin tut noni au. Midimpu nani lene midibindei ba, abindei timek noni kin nide tentara nya kin nide limwa nya ei minu dima hagom cem. Ma abibon noni noyam kin gi po abibon Nibou Ndig Sihon di ninyeng tak kep minu ndig Hesybon pima.”

³⁵ Lene mben Israel ibindei timek Nibou Ndig Og ba, igyai nimai bak noni kin nide bat nya kin nide tentara nya yahagom. Hi di niyaijo ei bi. Leu api igyai minu dima bibong timiei eisi.