MBEN ISRAEL IMBUT-MBUT NYEN 20 - ALLAH NIHYET MEM TUNGWATU NYA

Minyei biam kwei leu bor ngug

¹ Lene mben Israel yahagom ikwei krau iggum ndigsi gom di Zin mem bed gi nigom bibong ei Kades. Mpe dima ne Miryam niyaijo ngwig hon ba, itig noni ei sirima.

² Noro gumihyep dima bon minyei bousi hi bi. Gima rino mben Israel yahagom ingwig kep Musa Harun nya.

³ Ba, inso-nso nyen bipai “Nna ba nyeni cem nahagom nimai bit nisut bat po imai ei dimbou hui ei Allah De Prak Meng pima hak ug.

⁴ Nggon rino abuwak nye kikau kwei ei iggum ndigsi dini i? Leu binhyepo nahagom nimai bit nyende mindhe-ndhe nya e?

⁵ Nggon rino abuwak nye kwei leu minu Mesir kikau kwei ei nikineisi di bit bon niyai miai eisi kan bi dini i? Nigingat gandum kin biei ara ningat kin ba anggur ningat kin biei delima ningat mem niyem kep ninggumti bi. Nok gima cem nigingat minyei bousi hi mem nidut kep bi!”

⁶ Lene Musa kin Harun imbres yonti leu mben Israel nindigsi nya biyuug ya kui dimbou hui ei tuhan De Prak Meng. Lene ikuk yok ba, iba ingwak bikik mpia apino tuhan de nikei-kau-keisi piga kei bou igyai him.

⁷ Lene tuhan cuk Musa bipai,

⁸ “Aug yai tom di jiyok ei Brua Gi Preu noho pima kwei leu api Harun jeni jinduk mben Israel yahagom kwei. Lene ma apai bak bor ngug gom di jo dima bou yahagom igyai him leu binhyepo dibindei ba, minyei biam kwei leu ninggreti. Tug hon nisinati dima lene ma abindei ba, minyei mibiam kwei leu bor ngug dima mem tungwatu nya kin mindhe-ndhe nya yahagom idut bindei yok.”

⁹ Lene Musa ug yai tom bit leu nok tuhan nicuk noti.

¹⁰ Leu api noni kin Harun induk mben Israel yahagom bigya hammi bor ngug gom dima noho. Lene Musa pai biyok “Je di jingkek ndok e, jingig jitingou mem dihyet! Jicuk nye bipia nibindei ba, minyei biam kwei leu bor ngug mem jeni e?”

¹¹ Lene noni su tom bibui bor ngug mbican apino minyei ba nimig di sindem bibor srek bibiam kwei mem tungwatu nya kin mindhe-ndhe yahagom bidut.

¹² Noro tuhan srep tut Musa kin Harun bipai “Jiba jingon com Da haigtu ba, jindo Ditde nisindemti di kwes-kwau brei ei mben Israel igyai him bi. Gima rino midice tut gima jibuwak mben Israel ug ei minu po dipreu ei mem yok pima bi.”

¹³ Mun dima cut igkep yok ei minyei bousi Meriba. Lewo mben Israel inso-nso nyen bak tuhan ba, Noni ndo Nide nisindemti di kwes-kwau brei biyok ei sirima.

Nibou ndig mben Edom ggai ser mben Israel dima imbut kak nide simpak

¹⁴ Tirigi mben Israel ingat rin ei Kades lene Musa sok nihyet bak nibou ndig mben Edom bipai binoni “Nye di mben Israel di nimbier kim nani nok adig-ajoi nipai ningon kanti gom bina. Jo nibreisi bipia mun di buhun bibor cut igkep nye tu.

¹⁵ Nyeni nidigup bat-nidigai bat nya yuug ei minu Mesir ba, ibong ei sirinu mem nijam ari bingwam mang bibor. Noro mben Mesir imbuk tut yoni kin nyeni cem.

¹⁶ Leu api nahara tuhan leu binhyepo Noni mikwei mpu nye. Noni buhup nyeni nihyet bipinak malaikati gom kwei leu api Noni bie tut nyeni biningwes ngun leu minu Mesir tu. Nogindini nikwei krau Kades di jo simiak ade hanjop nsi.

¹⁷ Ma ace tut nyeni binimbut kak ade minu dini. Nye di tungwatu kin nyende mindhe-ndhe nya minimbut kak ade simpak hak ug. Minite leu puig ba, nicoi ug ei jide beisi kin jide ba anggur nghousi bi lene minidut minyei leu jide minyei bousi cem bi.”

¹⁸ Noro mben Edom ibuhup “E bi! Nikou sut gima jibikwam tunggwei ug ei nyende minu! Gino jimbut kindi-kindok lene minihwen je.”

¹⁹ Lene mben Israel ipai bu “Minimbut pijum kak jide simpak ndig hak. Gino nye di tungwatu kin mindhe-ndhe nya nidut jide minyei lene minigo. Nyeni nimbut ba, ninjiriek jide minu nya hak ug.”

²⁰ Noro mben Edom ipai hanyen bu “Nikou sut je! Leu api induk ide tentara nindig krop mem gima ihwen mben Israel.”

²¹ Noro mben Israel ikak puig hiter leu bikriau minu Edom lewo mben Edom iggai ser gima mben Israel ibikwam tunggwei ug ei ide minu dima.

Harun niyaijo ningwig honti

²² Lene mben Israel yahagom ijo leu Kades biyuug krau Nungug Hor,

²³ di jo simiak minu Edom niya kwas yamti. Lene tuhan pai bak Musa kin Harun ei sirima,

²⁴ “Harun micoi ug ei minu di dipreu ei mem mben Israel bi. Noni mimai ug rin lewo jahacem jibit dihyet bi tirigi po jingat rin ei minyei bousi Meriba pima.

²⁵ Ma abuwak Harun kin nipmot Eleazar bijikui ug ei Nungug Hor.

²⁶ Lene ma ajuk sinsun imam leu Harun leu api abijuk Eleazar bu. Lewo Harun mimai ei sirima.”

²⁷ Lene Musa yai igbit Allah nicuk noti. Yoni ikui ug ei Nungug Hor bou mben Israel yahagom igyai him.

²⁸ Lene Musa juk sinsun imam leu Harun bijuk ei Eleazarti bu. Leu api Harun niyaijo ngwig hon ei mbigdip dima leu api Musa kin Eleazar ijuk hanyen kwei.

²⁹ Tirigi mben Israel ikan tut bipia Harun mai su lene yahagom ingon ngguk bram noni kikau ei mmun-njap ningot ningai.