MBEN ISRAEL IMBUT-MBUT NYEN 17 - ALLAH NIHYET MEM TUNGWATU NYA

Harun de tom

¹ Lene tuhan pai bak Musa,

² “Acuk mben Israel ba, igyai tom simnaibrimigcan bak nani. Bikwop nibou keret gom-gom yai tom nimbier gom bak nani. Lene ma apas nibou dima yok gom-gom ninyeng ei nide tomti ba,

³ apas Harun ninyeng ei keret Lewi ide tomti. Bikwop nibou keret nya igyai tom nimbier gom-gom bidem yahagom.

⁴ Ma attei tom dima yok ug ei Ditde Prak Meng nsi leu api ayok hagom ei bei Brua Gi Preu noho hammi mpia di duum kep na ngan-ngan eisi.

⁵ Ba, no di nide tom nibiop tug ne no di didimig ei su ri. Tug hon nisinati dima lene midibicut mben Israel ide nilua sok nyen tut nati.”

⁶ Lene Musa tri tut nihyet dima bak mben Israel. Leu api bikwop nibou dima yok igyai ide tom gom-gom bidem keret nya bak Musa. Hagom sok yam ne tom nimbier simnaibrimigcan. Harun de tom cem no jo srigsi.

⁷ Leu api Musa kes tom dima yok ei tuhan De Prak Meng ninsi ei Brua Gi Preu noho.

⁸ Njapti kui tirigi Musa coi ug ei tuhan De Prak Meng nsi lene ngat lo, Harun de tom di nok tom keret Lewi pima nibiop tug su ba, nimar ntun him ba, bibon nitou bingat biei ngat ketapang di nggwop tu cem!

⁹ Musa ug kam tom dima yok hagom leu api ndo bak mben Israel. Tirigi ingat mun di pek kep mem Harun de tom pima tu lene bikwop nibou nya gom-gom igyai ide tom hanyen.

¹⁰ Leu api tuhan pai bak Musa “Akes Harun de tom hanyen ei bei Brua Gi Preu noho ba, jo nijoti ei sirima nok tom nibiyok ngon kep mem mben Israel di yaham imbuk kep nani bikwop dima. Gino ikes hon bi ba, ilua sok nyen lene yoni cem mitug ndei hukum nimai drek dip.”

¹¹ Lene Musa yai igbit tuhan nicuk noti.

¹² Lene mben Israel ipai bak Musa, “Gi nok gima lene buhun bibor mem nyeni ba, minisar ug ri!

¹³ Gino suar yo di idideu tuhan De Prak Meng dima itug ndei hukum nimai lene nna ba nahagom minimai hak drek dip ug!”