MBEN ISRAEL IMBUT-MBUT NYEN 16 - ALLAH NIHYET MEM TUNGWATU NYA

Korah Datan Abiram yaham imbuk kep Musa

¹ Mpe di gom lene Korah di Yizhar nipmot leu Kehat nide bat nya di intun keret Lewi him kin ibou ningai di intun keret Ruben him di inyeng rino Datan kin Abiram di icig ninyeng rino Eliab kin On di Pelet nipmot ingon dindi tut Musa ba,

² yaham imbuk kep noni. Lene nibou di inyeng jei po ide limwa nya ita yok tu pima ibou sratus can ningot muhwi iba yok bikum yo dima.

³ Lene yahagom yuug ngat Musa kin Harun bipai biyok “Musa e, cobi! Ayai hon tiri! tuhan ninyeng tak kep limwa mben Israel yahagom pijum ba, Noni ningat rin ei nyeni yahagom ikieti. Noro nggon rino ayai anyeng jei dor njiriek tuhan de limwa nindigsi nya i?”

⁴ Tirigi Musa miap ighyet rino kuk no biba ningwak bikik dihyei lene ngat nadi bak tuhan.

⁵ Leu api pai bak Korah kin yo di igya kui noni “Njap di hyep bu mem mpia tekti api tuhan mindo igbit Nide imam di ninyeng tak kep pijum. tuhan misindui sut imam di Noni ndo ei su dima nongkom ya dideu Noni ei bei nimbar hum dok.

⁶ Korah e, suar nani kin yo di igya kui nani jahagom juug yai jide srier di mem hum mbom ba,

⁷ jiket hum mbom kin biei di ui-gwang kei bijiyok eisi mem njap tekti ba, jittei ug ei nimbar hum dokti. Mpe dima ne nyeni ibingat igbit imam di tuhan ninyeng tak kep pijum dima. Je di jintun keret Lewi him e, cobi! Jiyai hon tiri!”

⁸ Musa binut bu bak Korah bipai “Je di jintun keret Lewi him e, jintu kep dihyet dini!

⁹ Apo jikan bipia gi po Allah mben Israel dimig jeni leu mben Israel ikieti leu binhyepo jidideu Noni cem jiyai midyai ei Nide Prak Meng nsi bijiyai midyai mem mben Israel bijahati tut yok cem ba, gima hagom bon ninyeng bi e?

¹⁰ tuhan yai nituti bak na di Korah kin yo di intun keret Lewi him ba, jiyai midyai di bon ninyeng mem Noni tu. Gima leu api nogindini ma awit huk leu binhyepo anok imam mem Noni cem!

¹¹ Ningat ne tirigi nani kin yo di igya kui na jahagom jilua-lua nyen tut Harun lene gima noyam kin gi jaham jimbuk kep tuhan ri!”

¹² Leu api Musa hig Datan Abiram nya kwei noro yoni ibuhup “Minihwou ngat na bi!

¹³ Apo gi abuwak nye leu minu Mesir di bon ninnumti di kei bibor ba, abindei binimai ei iggum ndigsi dini dem bigyo e? Akan bipia dem mem gima acuk-cuk nyen nyeni tereu nok mindor e?

¹⁴ Ningat ne agibuwak nye kwei ei minu di nnum ba, apek hanjop mem niyai miai kin biei anggur ninghousi binijem bou nye nok mun ninda rom hi bigyo! Jo nibreisi bipia aris nye! Gima rino minihwou ngat na bi!”

¹⁵ Lene Musa gga bibor bipai bak tuhan “tuhan e, ma arok yok tut mun di ikwas pijum ei tut Nani. Diyai mun tunggwei sut yok bi. Dimbrai mun nyeng gom bitut keledai ningut gom cem leu yok bi sren.”

¹⁶ Lene Musa pai bak Korah “Njap di hyep lene ma aya tut ibou sratus can ba, ningot muhwi di igya kui na pima bijihwou ei tuhan De Prak Meng nsi. Harun cem miningat rin ei sirima.

¹⁷ Suar tungwagom-gom krau nide srier bitut hum mbom di joti bikes biei nggrai di ui-gwang kei eisi. Leu api ma jibikuk je bak tuhan.”

¹⁸ Nok lene njap di hyep bu bikwop tungwagom-gom krau nide srier bikes hum mbom kin biei nggrai di ui-gwang kei eisi lene ya tut kui dimbou ei tuhan De Prak Meng hui bit Musa kin Harun.

¹⁹ Noro Korah nduk yo di itti kin noni yahagom ba, idem yam bigya kui dimbou ei tuhan De Prak Meng nuhui nipou su ba, iba yoho rok Musa kin Harun. Haninyai nipigati di nggai kep tuhan ningat piga mpia dima kros ba, Nide limwa nya yahagom ingat gima brei bou igyai him.

²⁰ Leu api tuhan pai bak Musa kin Harun,

²¹ “Ma jitti bileu limwa dima yok lewo ditin ei mem dibindei sar yahagom ug ri.”

²² Noro Musa kin Harun ikuk yok lene iba ingwak bikik dihyei leu api yahara “Allah e, Nani ne nibousi mem mun di yai niyaijoti nya hagom. Gino tungwagom ngat he bon sisar lene ma agga limwa nya yahagom e?”

²³ Lene tuhan pai bak Musa,

²⁴ “Acuk limwa dima yok yahagom ba, igya bileu Korah Datan Abiram nya ide prak meng yati.”

²⁵ Leu api Musa ya tut nibou mben Israel ba, ison ndam Datan kin Abiram igyati

²⁶ bimbrua ser mben Israel “Ma jiya bileu yo di isibut dini ide prak meng yati lene ma jingget ndigban nyeng gom di inyeng tut nya au. Gino jibit dihyet dini bi lene tuhan mibindei sar jeni cem bit yoni drek dip ide sisar di ibon nya.”

²⁷ Leu api mben Israel igya bileu Korah Datan Abiram nya ide prak meng yati. Mpe dima ne Datan Abiram nya sindi yehei leu ide prak meng nya bigya tut itnem imunggwom bat nya bigya bikwop ide dimbou heisi.

²⁸ Lene Musa pai bak limwa dima yok “Tug hon nisinati dini mijikan tut bipia tuhan cuk da mem diyai mun dini yok hagom lewo diyai munti dini ntun danti dingon kanti him bi.

²⁹ Gino yo dima imai tug hon gi imai nitu leu ba, itug ndei hukum di kwei leu Allah bi lene gima bindo bipia dibit tuhan nicuk dati bi.

³⁰ Noro gino tuhan bibon mindur hi di jimiap tut bi bibor ei nijam dini nok gino dihyei kimbo bipinde yok tut igyaisi jo bitut ndigban di ide nya cem leu api ibicoi ug ei gumihyep nimai lene ma jikan tut bipia yo dima yaham imbuk kep tuhan.”

³¹ Lene haninyai tirigi Musa mbrap bikes nihyet leu su lene dihyei ei yo dima iko behei kimbo kros ba,

³² pinde yok kin ide ig bei nsi nya bitut yo di itti kin Korah yahagom bitut ide ndigban hagom bingwig.

³³ Leu api yahagom icut tut igyaisi jo yo ug ei gumihyep nimai bitut ide ndigban di inyeng tut nya hagom. Dihyei di kimbo dima tap bisur yam ser yok hanyen ba, isar bihigom.

³⁴ Tirigi limwa mben Israel di ingat rin ei sirima yahagom imiap yo dima idinyangti lene inang leu ba, yahara “Jinang hak ug! Leu ma dihyei mipinde nyeni cem!”

³⁵ Leu api tuhan kes hum di sror biyem ibou sratus can ningot muhwi po iba srier di indig kep biei nggrai di ui-gwang kei eisi bikuk yok bak tuhan pima yahagom bingkiong bingwig hak.

Srier mem hum mbom nya

³⁶ Lene tuhan pai bak Musa,

³⁷ “Acuk Eleazar di Imam Harun nipmot bikon srier di mem hum mbom pima leu hum yemti leu api gimahap hum mbom di joti nya ug ei mpia ttou nsi hiter lewo srier mem hum mbom dima ne mun di kwes-kwau ri.

³⁸ Srier dima ne yo di itug ndei hukum nimai drek dip ide sisar ide munkwas mem tuhan ri. Srier dima yok kwes-kwau lewo yo dima ittei mem ibikuk yok ei tuhan Noho bei. Gima rino suar jitug srier dima bidile ba, jibinggai nimbar hum dok nitta bei nisai. Gima ne ngkimom-tembaga nibiyok ngon kep di mibisok kep mben Israel nindigsi nya ri.”

³⁹ Gima rino Imam Eleazar ug yai srier di mem hum mbom pima yok kwei lene cuk tukan nya ba, itug bidile mem ibinggai nimbar hum dok nitta bei nisai.

⁴⁰ Gima ne ngkimom-tembaga nibiyok ngon kep di bisok kep mben Israel ri. Yo di intun Harun him yongkom dem mem gima indig biei nggrai di ui-gwang kei mem tuhan lene hiter dem mem gima bi. Tungwa di njiriek nicukti dima lene misar noyam kin Korah kin yo di itti kin noni. Lene mben Israel ibit leu nok tuhan nicuk Eleazarti tug hon Musa.

Harun ya hacan biteu mben Israel leu nimai

⁴¹ Njapti kui bu lene mben Israel yahagom ingon sibui sut Musa kin Harun bipai biyok “Jibindei ba, tuhan de limwa nya wer imang imai su.”

⁴² Ipai nok gima tirigi idem yam ei ba, yaham imbuk kep Musa kin Harun. Hammi tirigi ipai nok rino ikiek yok ndam tuhan De Prak Meng bingat lo, bumbuhui cut binggai Prak Meng dima ba, nipigati di nggai kep tuhan ningat piga mpia dima kros. Yahagom ingat gima brei bou igyai him.

⁴³ Lene Musa kin Harun yuug ei tuhan De Prak Meng nuhui,

⁴⁴ leu api tuhan pai bak Musa,

⁴⁵ “Jisujou leu yo dima. Leu midibindei sar yoni cem ei mpia ttou nsi dima ug ri!” Noro yo cin ikuk yok biba ingwak bikik dihyei,

⁴⁶ leu api Musa pai bak Harun “Ayai ade srier di mem hum mbom ba, aket hum mbom leu nimbar hum dokti ei niti lene akes biei nggrai di ui-gwang kei ei nidip a. Ma abipbur ba, aug ei limwa nya ikieti lene aba hum mbom dima bibon midut nibiyai nikos ser sisarti gau yoni. Abrim amig hak ug! Lewo tuhan nigga biborti cig-cai tu ba, nsuwer ajar cem sindi hwen yok.”

⁴⁷ Lene Harun yai igbit Musa nicuk noti ba, dor ug ei limwa di idem yam ei dima ikieti bingat lo, nsuwer ajar sindi hwen yok. Leu api noni kes biei nggrai di ui-gwang kei ei hum mbom dip lene bibon midut nibiyai nikos ser sisarti gau limwa nya.

⁴⁸ Apino nsuwer ajar dima kes hon ba, Harun no ya hacan ei yo di igyaijo nya kin yo di imai su nya ikieti.

⁴⁹ Mpe dima ne yo di itug ndei nimai imangti ibou sribu simnaibrimigtai ba, sratus muhwindacan. Yo dini ter leu yo di itug ndei nimai drek dip Korah naham nimbuk kep tuhanti pima.

⁵⁰ Tirigi nsuwer ajar dima kes hon lene Harun ngkwei hanyen ndam Musa bigya kui dimbou ei tuhan De Prak Meng nuhui a.