NEHEI LEUSI 34 - ALLAH NIHYET MEM TUNGWATU NYA

Tig mma di nijep-jau can

¹ Lene tuhan pai bak Musa “Ma abon tig mma di noyam kin tig mma timiei can pima ba, attei kwei. Lene midipas kep nicukti pima eisi noyam kin nicukti po jo ei tig mma timiei po abindei ki kukiau pima.

² Atin ei ba, njap tekti di hyep ne akui Nungug Sinai kwei ba, aya ei Doho bei ei nimbigdip.

³ Lene ma tungwa hi bit na kwei au. Nok gima cem ma tungwatu nya isu yo bico nungug dini nisurti-nipekti hagom cem au. Ma jikes sapi nya kin domba nya kep mintu-minta ei nungug dini nimig au.”

⁴ Lene Musa bon tig mma can bu. Njap di hyep lene noni pwoi tig dima bikui ug ei Nungug Sinai mem ha yausi bit leu nok tuhan nicuk noti.

⁵ Lene bumbuhui ttou gom nggai kep tuhan leu api Noni juk kwei biya simiak Musa ei mpia dima bindat kep ninyeng di kwes-kwau ba, ninyeng dima rino tuhan.

⁶ Lene Noni mbut sin Musati bipai “Dani ne Tuhan rin ba, dinok Allah di ngondut tungwatu nya bisingat tut yok cem. Ditde ningon ngakeisi nindig bibor bikum eisi bu ba, dingon gom cem. Dingon sibui sut tungwatu nya haninyai kan bi.

⁷ Dingondut tungwatu nya kikau ug bipek ide nintun him yamti di bram yam nya ibou sribu-ribu. Dikos ser ide sisar kin ide mun di igyai tunggwei nya. Noro bit bon yo di ingon mui nya mingwes ngun leu hukum kan bi. Lewo midikes hukum ei imunggwom bat nya kin ignyon bat-idrot bat nya dip kikau ug bipek ide nintun him yamti di bram yam nya nimpung gi niningai kin nibitai drek dip ide pung di intun him nya ide sisar.”

⁸ Lene Musa kuk no biba ningwak bikik mpia haninyai binggei sut tuhan.

⁹ Lene noni pai “tuhan e, Gino ajoi sut da lene abit nye di mben Israel kak nimbutti nya. Jo nibreisi bipia Ade limwa nya ingkek ndok noro ma akos ser nyende mun di kinei kin nyende sisar leu api asindui sut nye bininok Ade limwa nya.”

tuhan ndat kep mun di Noni preu ei mem yok mbigom kin bu

¹⁰ Lene tuhan pai bak Musa “Nogindini dipreu ei mem mben Israel bipia midibon mindur nya bou igyai him. Midibon mindur nya di nindig bibor dor njiriek mun di mben dihyeisi dini hagom ingat bou igyai him. Tungwatu nya yahagom mingat mindur dima yok bou igyai him lewo Da di tuhan midibibon mun di biyai ingon digit bibor bou igyai him ri.

¹¹ Suar jibit niggai serti di diyai bije njap di ammani. Midijji mben Amori kin mben Kanaan kin mben Het kin mben Feris kin mben Hewi kin mben Yebus yahagom bingwig leu je sindam tirigi jicoi ug ei minu dima.

¹² Ma jeni kin timiei nya ei minu dima jipreu mun ei bit yam au. Leu gi nok lene mijibiam bon nimai.

¹³ Noro suar jinggek ide kwar di ikuk yok bak nya ba, jitam binnir-wap ba, jinggek ide cou tig di ipigig sut ei mem ide kwar di ikuk yok bak nya cem. Lene ma jiwim ide biei di ipigig sut ei mem kwar nisop di ninyeng Asyera cem.

¹⁴ Harin dima jikuk je bijinggei sut kwar nya a. Lewo Dani ne tuhan rin ba, di nok Allah di kou sut kwar nya.

¹⁵ Ma jeni kin timiei nya ei minu dima jipreu mun ei bit yam au. Lewo tirigi yoni ikuk yok bak ide nung nya bindig ndiyok kep hum ei ide nimbar hum dokti bak lene mbigom yoni mihig je bijinjei bit yok.

¹⁶ Leu gino jipmot bat nya miwak sop ngkiai nya lene sop dima yok mibidip huk yok leu binhyepo ikes Da ei leu ba, yuug kuk yok bak ide nung nya.

¹⁷ Harin dima jiba ngkimom nitu bibon nung nya bijikuk je bak a.

¹⁸ Ma jibon midut di ninyeng Njap Ndig Roti Di Dwoi Bi. Ma jiyem kep roti di dwoi bi ei njap nitindur muhwindacan mem bed Abib bit leu nok dicuk jeti tu. Lewo jehei leu minu Mesir mem bed dima nipou su.

¹⁹ Dinyeng tak kep jide munggwom pinai mighumbou nya kin jide mindhe-ndhe nipmot bou nya hagom.

²⁰ Noro ma jiba jide domba nehen pap ningut gom biluei jide keledai nipmot bou nya gom-gom. Gi bi lene jisibui keledai dima ninggibi bimai hak ug. Nok gima cem suar jiyai mun di biluei bikwop jipmot bat mighumbou nya yahagom cem. Bikwop mpe dino jikwei kuk je biDa lene jittei jide mun di jikwas tut Da kwei.

²¹ Diyai njap nitindur muhwindagom bije mem gima jiyai kep jide midyai nya eisi. Noro ma jiyai kep jide midyai nya nok miai di jiyai kin gandum di jike mem njap gi nimuhwindacan au.

²² Tirigi jikinyon ei midyai dino jike jide gandum nintam kin yam lene jibon midut di ninyeng Njap Ndig Ike Gandum. Tirigi jipuk jide biei ngat kwei mem ari bingwam ningwigsi lene jibon midut di ninyeng Njap Ndig Ig Jibei Mpam Meng.

²³ Suar jide pinai nya yahagom induk yam kwei bikuk yok biDa mbiningai bikwop ari bingwam hagom lewo Dani ne tuhan bidinok mben Israel ide Allah ri.

²⁴ Niabiati dijji ngkiai nya leu joho bei lene dibindei ba, minu dima bon nibresti nindig bibor mem je tu lene bit bon jide siceu hi kwei pos minu dima hanyen leu je tirigi jidem yam ei mem nibon midut ninyeng ningai pima kan bi.

²⁵ Gino jibui mindhe bijindig kep hum ei nimbar hum dokti mem Da lene jikwas mun di roti ninjep srigsi tut Da au. Ma jibet mikwau di jibui mem Nibon Midut Njap Ndig Paskah ei mem njap di hyep au.

²⁶ Suar jikon gandum ngan ndrim hi ei Ditde Ig nsi bikwop ari bingwam hagom. Lewo Dani ne tuhan bidinok jide Allah ri. Gino jikwen domba kin kambir pmot ninghui lene jiba nipmem nido ngei bikwen ei yeng gomti au.”

²⁷ Lene tuhan pai bak Musa “Ma apas kep Ditde nicukti dima yok hagom lewo midita mun di dipreu ei mem na kin mben Israel yahagom pima ei nicukti dimati.”

²⁸ Musa bong ei mbigdip dima bit tuhan mem mmun-njap ningot bitai lo, yem njita bidut minyei bi. Lene noni pas kep Allah De Nicukti Simnai di nok nihyet gi preu ei mem mben Israel ei tig mmati.

Musa juk kwei leu Nungug Sinai

²⁹ Tirigi Musa juk kwei leu Nungug Sinai bittei Nicukti Simnai pima kwei lene niimaisi piga kei lewo noni mbrap bit tuhan. Noro noni kan tut niimaisi di piga kei dima bi.

³⁰ Tirigi Harun kin mben Israel nindigsi nya yahagom itou kep Musa bingat lo, niimaisi piga kei lene igya ei minu ting lewo idigit tut.

³¹ Noro Musa hig yok kwei ndam no leu api Harun kin nibou mben Israel yahagom induk yam ttai noni lene noni mbrap bit yok.

³² Gima ngwig lene nide limwa nya yahagom ingwig ttai noni leu api Musa tri tut nicukti po tuhan yai binoni ei Nungug Sinai pima hagom biyok.

³³ Tirigi noni kes nihyet tut nicukti dima yok hagom tu lene ba sinsun nghas gom binggai kep ser niimaisi.

³⁴ Bikwop mpe di Musa coi ug ei tuhan De Prak Meng nsi bimbrap bit tuhan lene noni cug sinsun nghas pima leu niimaisi. Niabiati noni hei hanyen kwei bitri tut tuhan nicuk noti hagom bak nide limwa nya lene,

³⁵ yahagom ingat bou igyai him bipia niimaisi piga kei. Lene noni ba sinsun nghas pima binggai kep ser niimaisi hanyen bu bibou coi ug ei Prak Meng behei bimbrap bit tuhan hanyen ug e.