NEHEI LEUSI 31 - ALLAH NIHYET MEM TUNGWATU NYA

Allah dimig tukan nya ei mem Nide Prak Meng kin nimbumbati nya

¹ Lene tuhan pai bak Musa,

² “Dindo Bezaleel di Uri nipmot di nignyon ninyeng Hur po nimbier kim keret Yehuda pima tu.

³ Ba, diyai Ditde nisindemti ndrim hi binoni leu binhyepo ningon ki tut mun di noni bon bou ninda him leu api noni mikilis ndigban pima yok hagom.

⁴ Noni ba ningon di ki bitin ei gambar kin bindo leu api miba mas kin perak kin ngkimom-tembaga bibon hagom kan.

⁵ Bitut tig permata di rap sinsun minai kin biei di noni heu kan kin midyai tukan nindigsi nya ide.

⁶ Lene dindo Oholiab di Ahisamakh nipmot di nimbier kim keret Dan leu binhyepo noni ya kui Bezaleel bimpu noni. Nok gima cem diyai nisindemti bak tukan nindigsi nya leu binhyepo yoni cem ibon ndigban di dicuk na tut pima hagom kan cem.

⁷ Nok Ditde Prak Meng kin Brua Gi Preu tut nibeng kin Prak Meng nimbumbati nya,

⁸ kin meja tut nimbumbati nya kin mini njeng nidihim di iba mas bibon bitut nimbumbati nya hagom kin nimbar hum dok mem biei nggrai,

⁹ kin nimbar hum dok di indig mindhe kep hum eisi bitut nimbumbati nya kin bokor minyei tut nidihim,

¹⁰ kin sinsun nibon midut mem Harun kin nipmot bat nya di ijuk ei yokti tirigi igyai kep midyai nok imam,

¹¹ kin mini nibon midut kin biei nggrai di ui-gwang kei mem Ninsi Di Kwes. Suar abon mun dini yok hagom bit leu nok dicuk nati tu.”

Njap Nigwam Kep Ninghuisi

¹² Lene tuhan sok nihyet ei Musa dip,

¹³ bak mben Israel bipai “Ma jidimig jide njap gi nimuhwindacan ei leu binhyepo jigwam kep jinghuisi bit leu nok dicuk jeti tu. Njap dima ne njap nibiyok ngon kep ei mben Israel kin Dani nikieti bijo ninno bijo kikau ri. Leu binhyepo mijo nibreisi mem je bipia Dani ne tuhan rin ba, dinyeng tak kep je bijinok Ditde limwa nya.

¹⁴ Suar jinyohou njap dima nok njap di kwes mem gima jigwam kep jinghuisi. Tungwa tou rino gwam kep ninghuisi bi noro yai kep midyai mem njap dima mitug ndei hukum nimai.

¹⁵ Ma jiyai kep jide midyai mem njap nitindur muhwindagom noro njap gi nimuhwindacan dima ne njap ndig rin ba, didimig njap dima ei mem Dani. Tungwa tou rino gwam kep ninghuisi bi noro yai kep midyai mem njap dima mitug ndei hukum nimai.

¹⁶ Suar mben Israel igyok ngon kep njap dini nok mun di bindo tut gi preu pima bijo ninno bijo kikau.

¹⁷ Njap dima ne njap nibiyok ngon kep di bijo ninno bijo kikau mem mben Israel kin Dani ri. Lewo Da di tuhan dipai tes dihyeisi kin mpia-bbed him ei njap nitindur muhwindagom. Lene dikes dinda tut midyai bidigwam kep dinghuisi ei njap gi nimuhwindacan.”

¹⁸ Tirigi Allah kes nihyet hon bimbrap bit Musa ei Nungug Sinai bu bi lene noni kes tig mma can po pas kep Nide nicukti nya eisi pima ei Musa nindati.