NAHUM 2 - ALLAH NIHYET MEM TUNGWATU NYA

Minu Niniwe nicutti

¹ Minu ndig pmem Niniwe e, angig atingou mem nihyet ba, amiap kep! Yo di itin ei mem ibindei ba, atimek bingwig ikwei su! Aya ser tentara nibousi di igya coi nya bingkiem! Amian ser puig ba, aya ser mungkun! Atin ei mem gima akon pran a! (

² Jit, tuhan tin ei mem gima pindi mben Israel ide ninyeng jei biborti di jo habiei hanyen bu noyam kin nijam gi nipou tirigi ide siceu nya icoi di ipos mun ei minu dima bingwig leu yok bigyo.)

³ Siceu ide mun di ibipukep tibor ninggwenti nya di ibicuon ser igyaisi ngwoi kei. Ide sinsun pran di ijuk wer ninggrom. Ide kroba pran di sieng kei dem kep nok hum di yem mpia ba, ide kuda pran nya ipri-pri nyen.

⁴ Kroba pran di ide nya imbut sindem kak simpak ba, yuhuk-huk nyen yam ei biyati di nindig nya dem kep nok hyem di ninjeng cig-cai. Idor sindem bidem kigyei di ninjeng srei a.

⁵ Nibou tentara hig nide limwa nya bikiju kwei leu api ihwen siceu noro indrat mpia kikik. Iba ibinang bibisau ndam ngug tig biyohok ig jibei ser siceu nya ide tibor ninggwenti bicuon ser yo di ikrau dihim di ibihwen dimbou pmem ei ngug tig.

⁶ Ikau dimbou minyei leu minyei ngei nibiamti nya hagom bijo hak leu api minyei su bibiam dek nibou ndig de ig nya lene gima bindei ba, idrui sut ba, ingon ttin bibor!

⁷ Ikat nibou ndig sop leu ba, sop gwam nitta pilei di igya kui noni icot bipim. Iba ingon di buhun bittem ingon him drek dip ide ningon nggukti ba, ighyet dem kep nok hakimoi mbrei nihyet.

⁸ Timiei minu ndig Niniwe nya inang bintek gimahap bidem kep minyei di tis a. Nihyet di pai ser yok jem bram yok bipai “Jingkwei hanyen o! Jingkwei hanyen o!” Noro hi di ngkwei hanyen bi.

⁹ Ndigban ei minu ndig dini mang bibor. Gima rino ma apos mas kin perak nya hagom hak ug!

¹⁰ Minu ndig pmem Niniwe timek hak leu api mpia ntus bram ba, wer iggum ndigsi. Timiei nya ingon kou sut lewo ittin. Ibiau mbris bidigit cem. Yahagom iimaisi hai bisieng kei bi.

¹¹ Nogindini minu ndig dima no hantou i? Minu ndig dima dem kep hak mihyeti di singa itot yaham eisi kin mpia di ibrig-brig nyen mun di igyem bigyai bak singa pmot nya eisi. Bidem kep mpia di singa nikre kin niwek nya yuug eisi kin mpia di singa pmot nya igya coi.

¹² Nipou yo ne singa nikre brig-brig nyen mun di yem ei mpia dima. Lene brig mun di yem dima mem niwek kin nipmot nya lene gima bindei ba, yaham mpung tut mun nghui di brig di kwei sut nya.

¹³ tuhan Di Sindem Bibor pai “Ade nitok rino Dani. Midindig ade kroba pran nya hagom bingwig ei humti ba, ade tentara nya mimai nimbiam ei pranti. Midiyai mun di apos leu yo di hiter nya hagom leu na. Ahyet di buhun di asok ei ade nibou niya hacanti ntus hak ba, hi ngig nitingou mem bu bi.”