NAHUM 1 - ALLAH NIHYET MEM TUNGWATU NYA

Nitriti

¹ Gini ne Allah nisok nihyetti tut mben Niniwe ri. Allah ndo nisok nihyetti dini tug hon ningat-hi-ngat di Nahum ngat. Nahum ne nabi gom di nitimieisi leu minu mien Elkos ri.

tuhan nigga mben Niniweti

² tuhan Allah kou sut yo di iba Noni bikek tug hon gi ikuk yok bak kwar nya. Yo di ico kep Noni mitug ndei hukum hak. Noni ba Nide nigga biborti bibuhup ide nibon munti di kinei bibor hanyen biyok.

³ Ningat ne tuhan gga haninyai bi. Noro Noni sindem bibor apino bindei ba, bit bon no di bon mun tunggwei ningwes ngun leu hukum kan bi. Hou di nimig ten bibor cut ei mpia di tuhan mbut eisi. Dihyei ndung wer bumbuhui ei mpia di nimig co eisi.

⁴ Noni pai bak muk ngei bibindei ba, ningei pingge leu api minyei nya hagom ningei ngwig leu. Nungug Karmel kin ngoi dumti nya ei minu Basan ngak cai ba, mitou ei minu Libanon nya hagom nimeng mbris.

⁵ Nungug nya ugwa-kwei nyen ei Noho bei lene mbigdip nya cem jet ningwig a. Gino Noni tau kep nye ne dihyei bingmai ba, dihyei kin timiei dihyeisi dini yahagom ingon bingmai.

⁶ Gino tuhan gga bibor ne tou rino ya ngkiem i? Hi di ningwes ngun leu nigga biborti bi. Ba, Noni bindei mbut niggati di cig-cai di bindei ba, tig nya timek binok dihyei ndung ei Noho bei.

⁷ tuhan ningon nggriu ba, nyohou Nide limwa nya ei mpe di igwam coi Noni drek dip ide ningon buhunti ba, Noni ya ser yok.

⁸ Nibindei timek Nide siceu nya dem kep minyei di su nindig bibor di hwen tungwatu bicom yo di ibrim ingkek kep Noni di ihwen bit Noni yahagom ug ei minu nimai nya ide bisar hak.

⁹ Jo nibreisi bipia angon kanti di akos tut ei mem gima ahwen bit tuhan micut hacan. Noni mibuhup hanyen bak Nide siceu nya tut ide nibon mun kinei biborti ug ei mbican bram yam bi.

¹⁰ Noni mindig na noyam kin gandum nintam di mui kin war ndia nggwen di pai yam-ngot yam nyen cem.

¹¹ Minu ndig pmem Niniwe e, tungwagom di nibou ngwakti mpung tut nikos tutti di kinei bibor di tin ei nya tau kwei leu akieti tu. No dima tin ei ningon kanti di kinei mem gima hwen bit tuhan.

¹² tuhan pai bak Nide limwa di mben Israel “Mbro nok gino mben Asyur isindem ba, imang bibor cem lo, midibindei timek yok leu api ipror hak. Ditde mben jen e, dibindei ba, jitug ndei ninghuisi wei tu lo, midiyai nok gima tut je bu bi.

¹³ Nogindini midibindei ba, Asyur ninyeng tak kep jeti kes hon ba, lante ngkimom nitu di ibiteu je bitun hak.”

¹⁴ Gini ne tuhan nikos tutti di bitut mben Asyur ri. Yoni mimbun imunggwom di intun yok him mem gima ibinut ide nintun yam him yamti di bram yok nya bu bi. Midibindei timek kwar di ikuk yok bak ei ide kwar nibousi nya hagom. No ditin ei jui mem mben Asyur tu lewo dem tut gima igyaijo bu bi!

¹⁵ Angat i! Dipinak tungwagom di kak puig ei nungug him kwei ba, mikwei sut nihyet di kei. Nihyet di kei dima bindei timek siceu nya. Timiei minu Yehuda e, ma jibon midut kep jide njap ndig ba, jigo jide nitto ei mem Allahti. Yo di isibut nya minyeng tak kep jide minu bu bi. Lewo itimek bingwig bibor bihigom tu.