MIKHA 3 - ALLAH NIHYET MEM TUNGWATU NYA

Mikha pai kep nibou nya di ibie tut mben Israel

¹ Je di nibou mben Israel e, ma jimiap kep dihyet! Suar ma jikan bidem tut nikos tutti di sren kei nya,

² noro jingon mpo tut mun di kei leu api jiba joho rok mun di mbuk. Jeet Ditde limwa nya ingkek leu bijicug inghui bingwig leu injum nya.

³ Jiyem Ditde limwa nya nok jiyem mikwau. Jeet ingkek leu bijikinam injum cem. Jidigo inghui noyam kin mikwau di jikwen ei yengti.

⁴ Jei bi ne jahara tuhan bikwei mpu je noro Noni kou sut gima buhup jihyet lewo jirom je kep jiyai munti di mbuk bibor nya.

⁵ Jingot kep nabi nya leu binhyepo itri tut mun di kei di mipek kep mem tungwatu nya noro iba nitok bak yo di ingot kep yok nya bi. tuhan pai bak nabi dima yok,

⁶ “Je di nabi nya e, nituti mem jiyai midyai dima bingwig dideu su. Nituti di jiyai midyai kimbas leu je ug ri. Jingat ningat-hi-ngat bijitri tut Ditde nikos tutti bu bi.”

⁷ Nabi nya di itri tut mun di mipek kep ei nidipti bu mimmai sut yonti lewo mun di itri tut mipek kep mem tungwatu nya bi. Yahagom mimmai sut yonti lewo Allah mibuhup ighyet bu bi.

⁸ Noro tut danti ne tuhan kes ninnei kin Nide nisindemti ei dingonti bipingok dingonti tut nisren-srausi. Noni bindei ba, mimbri kui dingkek leu binhyepo dindo mben Israel igyai munti di mbuk bibor brei biyok.

⁹ Je di nibou mben Israel di jingon mpo tut nisren-srausi bijikiek nijit-jausi binok mun di nitrowai cem e, ma jimiap kep dihyet!

¹⁰ Jiwin minu ndig Yerusalem di nok Allah de minu bijitig cou ei Nihwen Munti kin Niyai Kepti Di Igbit Biti.

¹¹ Ei minu ndig dima ne nibou nya inyeng tak kep ide limwa nya di iba mitiei bingot kep yok. Imam nya itri tut tuhan nicukti leu binhyepo ibiyai imuhup. Nabi nya yahara Allah mem gima ndo bindo biyok leu binhyepo ibipek mitiei. Ningat ne yahagom ikan bipia tuhan tti kin yok. Ipai “tuhan ningat rin ei nikieti. Mun di buhun bibor micut igkep nye bi sren.”

¹² Gima rino tungwatu nya miba sapi bibrim ngkimom nitu bitem Sion de igkumti ba, jide siceu nya mibindei minu ndig Yerusalem ba, timek bingwig cem. Leu api nungug tou di tuhan De Ig joti miluei nitta binok baham tigotti bu drek dip jiyai munti di mbuk bibor nya.