MAZMUR 97 - ALLAH NIHYET MEM TUNGWATU NYA

Allah ne No di sindem ba, ninyeng jei bibor ri

¹ tuhan ne Nibou Ndig ri! Ma dihyeisi ningon nggei-hi-nggei ba, mios nya cem igyai nillei.

² Bumbuhui kin nidinditi no jo ttai Noni. Ningon sren-srausi kin nisingat tut yamti yahati tut Nide ninyeng tak kep limwa nyati.

³ Hum ninjeng srei mpiati ei Noho bei biyem siceu di igyon ttai Noni.

⁴ Nide kigyei di ninjeng srei piga digai dihyei ninjek dip titut ba, dihyeisi dini ngat ba, digit tut.

⁵ Nungug nya cem jet bidem lilin ngei ei tuhan di ninyeng tak kep dihyei nisurti-nipekti Noho bei.

⁶ Mpia-bbed him tri tut Nide ningon sren-srausi ba, ngkiai nya yahagom ingat Nide nikei-kau-keisi.

⁷ Noni yai nimmai bak yo di ikuk yok bak kwar nya kin yo di illei ngwig sut mun di bon ninyeng bi nya yahagom. Kwar nya yahagom miba ibiau bicom mpia ei tuhan Noho bei bikuk yok bak.

⁸ Timiei Sion kin yo di ibong ei minu ndig nya ei hanjop Yehuda nindigsi nya ingon llei bibor tirigi imiap tut tuhan nikos tutti nya.

⁹ tuhan e, Nani ne No Di ninyeng tak kep dihyei nisurti-nipekti ri. Anyeng jei bibor dor njiriek kwar nya hagom.

¹⁰ Je di jingon ngakei tuhan e, suar jingon mpo tut mun di kinei nya! Lewo tuhan cuon Nide limwa nya igyaisi bikwek yok leu yo di itunggwei tuhan nihyet inda nsi.

¹¹ Nipigati piga mem yo di ingon sren ba, ningon di llei piga mem yo di ingon kwes.

¹² Je di jingon sren nya e, ma jingon nggei-hi-nggei drek dip mun di tuhan bon mem je bijipai sigyo bak Allah di kwes-kwau.