MAZMUR 95 - ALLAH NIHYET MEM TUNGWATU NYA

Doia nibinggei sut tuhan ti

¹ Jikwei ba, inggei sut tuhan. Iba ingon di llei bibor bipai doia bak Noni lewo Noni sindem bibor biya srak ko hagau nye!

² Jikwei ba, yahagom igya ei Noho bei bipai sigyo biNoni ba, iba doia di llei bibor binggei sut Noni.

³ Lewo tuhan ne Allah di ninyeng jei bibor ri. Noni sindem bibor bininyeng tak kep kwar nya yahagom.

⁴ Ninyeng tak kep dihyei nisurti-nipekti ba, ei dihyei nijut biborti kikau ug bipek kin nungug di jei bibor.

⁵ Noni pai tes muk ndigsi ba, ninyeng tak kep. Noni pai tes dihyeisi dini ba, ninyeng tak kep.

⁶ Jikwei ba, ikuk nye ei nimig him binggei sut Noni. Iba ibiau bicom mpia ei tuhan di pai tes nye Noho bei.

⁷ Lewo Noni ne ide Allah ri. Nyeni ne Nide limwa nya rin ba, Noni nyohou nye bibie tut nye dem kep nok gembala di bie tut nide domba nya. Ma jingig jitingou mem nihyet ei njap di ammani. Noni pai,

⁸ “Ma jingkek ndok dem kep nok jidigup bat-jidigai bat nya di yuug ei Meriba bingat rin ei iggum ndigsi Masa au.

⁹ Mbro nok gino yoni ingat mun di mindur nya di dibon mem yok lo, ibingon kikep Da.”

¹⁰ Dikou sut yok mem ari bingwam ningot bitai bidikan “Yo dima ingon mang ba, ingkek ndok tut Side nicuk yokti nya.

¹¹ Singon sibui sut yok nindig bibor bisisigion yok lene sisindui sut ba, icoi ug ei minu dima bibong kei bigwam kei bit Sa bi sren.”